3 Ca lod'o hari, pe d'ara hake tèlu nihia sa, na abhu tanila. Na ladhe nèdhi iia-iia ana pajuu Ama Lamatua èci puru mai nèti sorga, ka na paroa ne, peka na, ‘‘Kornelis!’’

4 Ropa Kornelis ladhe nèdhi ana pajuu nèti sorga, ka na madha'u titu kèna. Hèia na karèi, aku nèngu na, ‘‘Tasamia, ama?’’

Ka ana pajuu ne dhaa, na, ‘‘Lamatua tadèngi le lii manèngi-mangaj'i èu, aa Na ne'a le d'ara hua iia èu mi dedha dhèu leo. Ka Na sanèd'e èu. 5 De pua dhèu lasi asa kota Yope, ho paroa rèti dhèu èci, ngara na Simon Petrus. 6 Dhèu èèna manubha ètu èmu cue ètu sebhe dhasi, unu Simon, tuka pamèu ka'uri badha.’’

7 Ropa ana pajuu nèti sorga ne tèke eele Kornelis, ka na paroa ana sab'a na dhèu dua, dènge sordad'u èci dhu d'èi padètu dènge Lamatua kahèi. 8 Kornelis lolo aa'i ngaa dhu nèngu nèdhi èèna, ka na pua si lasi asa kota Yope.

9 Ka asa bèli èèna, pe d'ara lod'o titu mera sa, dhèu paleha nèti Kornelis sèra oe d'ai le Yope. Lod'o èèna, Petrus ca'e la'e neo manèngi-mangaj'i asa kalaga dedha èmu Simon.

10 Ropa na manèngi-mangaj'i, na rasa manganga. Na mate dhèu lalau nganga'a-nginu. Ropa nèngu manèngi-mangaj'i era, na abhu tanila kahèi. 11 Na nèdhi sèmi liru bhoka. Ka hahèla-koi bhèla aae ca bèla puru mai, dhu èki re suu-suu èpa na. 12 Ètu d'ara hahèla-koi èèna, nèngu ladhe nèdhi rupa-rupa badha, nuka badha ai èpa, badha rod'o-kakara, dènge rupa-rupa manu-bhui kahèi.

13 Hèia na tadèngi lii èci pua ne, ‘‘Petrus! Kèd'i ka! Kèj'i badha se, ho mu'a!’’

14 Te ngaa Petrus dhaa, aku nèngu na, ‘‘Bisa boe, Ama! Baku sèmi èèna! Te ja'a ku'a kèdhi mèka sisi badha sèmi se'e! Ji'i dhèu Yahudi luri sisi badha se'e aa'i-aa'i ra!’’

15 Te ngaa lii ne b'ala hari, peka na, ‘‘Ladhe Ama Lamatua peka mèdha ngaa dhu mèu, èu baku peka kaj'alu!’’ 16 Hahèla-koi èèna cèu tèlu hari, èle èèna ka ca'e hari asa dedha-liru la'e.

17 Hèia Petrus pajiko la'e-mai sasoa tanila deo na. Kabèdhi laa, ana paleha Kornelis sèra d'ai madha èmu Simon. Ra titu ètu hèb'a èmu. 18 Ka ra lii, peka na, ‘‘Ji'i tenge dhèu èci dhu manubha ètu èmu ne'e. Ngara na, Simon Petrus. Ele boe ama tadhe, do?’’

19 Ropa Petrus pajiko sasoa tanila na era. Ka Roh Lamatua dhu Mola-Mèci peka dènge ne, ‘‘Petrus. Dhèu^a mate èu ka haha si. 20 De puru ho lamu ka dènge si. Èu baku mage-mage ia ka. Masi ka ad'a Yahudi aj'a, na, dhèu Yahudi hud'i madenge dènge dhèu leo, te ngaa èu baku madenge dènge rèngu, lula Ja'a ka dhu pua rèngu mai rare èu.’’ 21 Ka Petrus puru la'e paraga dènge dhèu sèra. Hèia na peka, aku nèngu na, ‘‘Ja'a ne'e ka dhu miu tenge. De miu parluu ngaa?’’

22 Ka ra dhaa, aku rèngu na, ‘‘Komedhaa sordad'u Roma èci pua ji'i mai asa ne'e. Nèngu èèna, komedhaa nèti cangasu sordad'u. Dhèu ne d'ara mola, aa na d'èi padètu dènge Ama Lamatua. Dhèu Yahudi ae dhu re'a le babe'a dhèu ne'e. Med'a na, heka ana pajuu Ama Lamatua puru mai nèti sorga, ho pua lamatua ji'i manèngi èu lamu asa èmu na, ho na neo nanene unu na nèti èu.’’

23 Ropa tadèngi nare sèmi èèna, hèia Petrus manèngi rèngu ho j'unu taha mèda ne ètu èèna. Bèli mad'ae èèna, ra pakèd'i, lasi palere. Dhèu unu Lamatua Yesus pèri-pèri nèti Yope lasi kahèi.

24 Mèda èèna rèngu j'unu ètu j'ara. Bèli èèna, heka rèngu d'ai kota Kaisarea kèna. Ropa rèngu d'ai, Kornelis mate mema rèngu. Na pakaboko nare le a'ari na dènge mone-aanga angalai na ètu èmu nèngu. 25 Ropa Petrus d'ai hèb'a èmu, Kornelis mai soru ne, ka madhèdi patitu kètu urutuu ètu haga Petrus, ho na pahaha iisi. 26 Te ngaa Petrus pakèd'i ne, peka na, ‘‘Ama! Baku sèmi èèna! Baku pahaha iisi mi ja'a. Te ja'a ne, dhèu rai-haha sama sèmi èu kahèi.’’

27 Ropa tadèngi nare sèmi èèna, Kornelis kèd'i titu dènge. Ka dua ra padhai lii, kako lasi asa d'ara èmu. D'ai d'ara èmu, Petrus nèdhi dhèu ae pakaboko mate nèngu. 28 Na ladhe palème dhèu sèra, ka na padhai lii, peka na, ‘‘A'ari aa'i-aa'i mi! Miu me'a mema ad'a ji'i dhèu Yahudi. Madhutu ad'a ji'i, na, ji'i bisa boe pa'èci dènge dhèu leo. Ngaa hari, maso asa d'ara èmu ra. Te ngaa Ama Lamatua pad'elo le dènge ja'a, ladhe mèdha ngaa dhu Nèngu peka na mèu, ja'a baku peka na mèdha èèna kaj'alu. De limuri ne, ja'a madenge heka dènge dhèu leo. Ja'a hud'i tao dhèu leo sama sèmi a'ari ja'a kahèi. 29 Nèti èèna ka, lod'o miu lami paroa, ka ja'a mai dènge. Ja'a pamata heka, lula Lamatua peka nare le dènge ja'a sèmi èèna. Miu peka ku laa. Miu parluu ngaa nèti ja'a?’’

30 Hèia Kornelis lole aa'i mèu-mèu, aku nèngu na, ‘‘Èpa lod'o dhu la'e èèna, ropa lod'o nihia, ja'a manèngi-mangaj'i ètu èmu ja'a. Cag'ag'a laa, dhèu mone èci titu ètu madha ja'a. Mèdha-papake na heo loa-loa. 31 Ka na paroa ja'a, aku nèngu na, ‘Kornelis! Lamatua tadèngi le lii manèngi èu, aa Na ne'a le d'ara hua iia èu mi dedha dhèu aa'i-aa'i ra. 32 De lod'o ne'e, pua dhèu lasi rare dhèu èci asa kota Yope. Ngara na, Simon Petrus. Nèngu manubha ètu èmu cue ètu sebhe dhasi, ètu èmu tuka pamèu ka'uri badha. Ngara na, Simon kahèi.’ 33 Nèti èèna ka, ja'a pua dhèu dhiu rare ama. Ji'i manèngi makasi ae, lula ama mai dènge, ropa tadèngi lii paroa ji'i. Nèti èèna ka, ji'i pakaboko ètu ne'e, ho neo nanene ngaa dhu Ama Lamatua pua ama peka dènge ji'i!’’

34 Hèia Petrus padhai lii, peka na, ‘‘Limuri ne, ja'a heka ke'a kèna, na, ètu madha Ama Lamatua, dhèu rai-haha sama èci èèna ka. Lamatua ladhe boe rèhu, mia ka dhèu Yahudi, aa mia ka dhèu leo.^b 35 Dhèu mia dhu d'ara mola, dhu maj'èni manèngi-mangaj'i mi Lamatua, aa madhutu dad'èi Nèngu, rèngu sèra pakarej'e d'ara Na. 36 De miu me'a, ngaa dhu Lamatua peka le dènge ji'i dhèu Isra'el, peka na, Nèngu pua le Kristus, nuka Yesus. Ka Yesus madhe ho padame dhèu rai-haha dènge Ama Lamatua. Aa Nèngu j'aj'i Kètu mi dhèu aa'i-aa'i.

37 Miu tadèngi kahèi, ngaa dhu j'aj'i le ètu palème propensi Yudea. Lii lole èèna mulai nèti Yohanis tuka sarani dhèu, aj'a dhèu ho ra ele-ho'a nèti sasala-sasigo rèngu. Aa rèngu hud'i abhu sarani kahèi, sèna ka j'aj'i tadha, peka na, rèngu pabe'a le dènge Ama Lamatua. 38 Èle èèna ka, Ama Lamatua hia Roh Na dhu Mola-Mèci mi Yesus, dhèu Nasaret. Lamatua hia koasa Na mi Yesus kahèi. Ka Yesus maso-kalua rae-rae, tao j'ara be'a mi dhèu-dhèu. Aa Na puri-pa'èle dhèu dhu dhèu aae nidhu paj'èra si. Na tao sèmi èèna, lula Ama Lamatua sama-sama dènge Ne taruu. 39 Te ji'i se'e ka dhu ladhe ngèdhi unu mi, ngaa dhu Na sab'a ètu kota Yerusalem, aa palème kabarai Yahudi.

Masi ka sèmi èèna, te ngaa dhèu paku pamadhe Ne ètu aj'u palolo-palèbha. 40 Nèngu madhe tare'a, te ngaa asa camèd'a, Ama Lamatua pamamuri hari Ne. Ka Na pad'elo iisi Na, ho dhèu rèdhi, sèna ka ra re'a Nèngu mamuri hari tare'a-re'a le. 41 Te ngaa dhèu ae cahag'e dhu rèdhi boe Ne, dhoka ji'i di. Lod'o Nèngu mamuri hari le, ji'i biasa nga'a-nginu dènge Ne. Ama Lamatua paj'uj'u ji'i ho la'a lole palème Lii Lolo Be'a Yesus mi dhèu ae ètu mia-mia.

42 Aa Lamatua ka dhu pua ji'i la'a lole peka pasaraa mi dhèu, lula-nèti Dhèu dhu Na paj'uj'u nèti uru ka mai, nuka Yesus. Aa Lamatua ded'e Ne j'aj'i Dhèu J'ue Lii Langu, ho pama'ète, na, cee ka dhu bisa mamuri taruu dènge Ama Lamatua, aa cee aad'o. Yesus èèna ka dhu j'ue lii dhèu dhu madhe le, dènge dhèu dhu mamuri era. 43 Nèti uru ka mai, dhèu rèti lii padhai Ama Lamatua aa'i-aa'i ra lole le Yesus, peka na, dhèu cee dhu parcaya Nèngu, na, Ama Lamatua sèmi nare si, aa saku eele sasala-sasigo rèngu kahèi.’’

44 Lod'o Petrus padhai lii nare mèka, cag'ag'a laa, Roh Lamatua dhu Mola-Mèci maso asa d'ara dhèu se'e aa'i-aa'i ra dhu nanene lii padhai lii na. 45 Ètu èèna, abhu kahèi dhèu Yahudi angalai Petrus dhu mai palere dènge ne nèti kota Yope asa èmu Kornelis ètu kota Kaisarea. Ropa rèngu rèdhi dhèu ae sèra abhu Roh Ama Lamatua, ka ra malaa, lula rèngu heka re'a kèna, na, Lamatua hia Roh Na mi dhèu Yahudi boe kahèi. 46 Rèngu tadèngi dhèu ètu d'ara èmu Kornelis sèra padhai lii, pake lii dhu baka-leo. Aa ra koa-kio kolongara Ama Lamatua.

Hèia Petrus padhai lii, peka na, 47 ‘‘Miu mèdhi unu mi! Dhèu se'e se, sèmi rare le Roh Lamatua èci èèna ka dènge èdhi kahèi. De mai ka, sèna ka èdhi sarani si. Dhèu èci sa dhu bisa heka taha rèngu.’’ 48 Hèia Petrus pua si ho sarani Kornelis dènge dhèu ètu sèra sa, ho ra j'aj'i dhèu unu Lamatua Yesus. Ka ra manèngi Petrus pea dènge rèngu pèri-pèri lod'o hari. Èle èèna ka, heka ra hia ne lèpa asa Yerusalem.