Dhèu dhu d'èlu-mèu ladhe hua-hètu, mai tenge Yesus
2
Lod'o rara iisi Yesus ètu rae Betlehem, ètu propensi Yudea, dhèu aae Herodes dhu nèd'u paredha ètu èèna. Lod'o èèna, dhèu pèri-pèri nèti era kaj'èu, mai nèti bèka dhimu asa kota Yerusalem. Rèngu se, dhu re'a mèu ladhe hua-hètu. 2 Ropa ra d'ai Yerusalem dhèu se pakarèi, aku rèngu na, “Dhèu Aae nèti dhèu Yahudi, dhu heka rara iisi hiu èèna, era na buli mia, ee? Ji'i ngèdhi hua-hètu cue ètu bèka dhimu, dhu j'aj'i mi tadha dhu peka na, rara iisi le Nèngu. Nèti èèna ka, ji'i mai neo pahaha iisi mi Nèngu.” 3 Ropa dhèu aae Herodes tadèngi lii ne'e, hèia d'ara na susa. Nèti èèna ka, dhèu aa'i-aa'i ètu Yerusalem sèra, d'ara ra susa kahèi.4 Èle èèna ka, dhèu aae Herodes paroa nare kètu agama Yahudi dènge mese agama aa'i-aa'i sèra, ka na karèi si, peka na, “Miu peka sèku dènge ja'a la! Kristus, dhu Ama Lamatua padhadha tèke èèna, rara iisi Ne ètu mia?”
5 Hèia ra dhaa, aku rèngu na, “Ètu rae Betlehem, propensi Yudea. Te ca dhèu nèti lii padhai Ama Lamatua, ngara na Mika, dhu suri tèke le karèi nèti uru ka, na:
6 ‘Wee! Miu dhèu Betlehem ètu propensi Yudea sèra.
Baku pangee na, rae miu ne,
ca rae iiki dhu dhèu ige boe.
Te bèli-camèd'a dhèu kapai ca dhèu cèu mai nèti rae ne'e.
Èèna na Nèngu j'aj'i dhèu madhenga mi dhèu Ja'a, dhèu Isra'el.”’a
7 Ropa tadèngi nare sèmi èèna, hèia dhèu aae Herodes paroa mau-mau dhèu dhu d'èlu-mèu ladhe hua-hètu sèra. Ka na karèi, na, “Lod'o mia miu ladhe mèdhi hua-hètu ne cèu ètu dedha-liru?” Hèia ra peka dènge ne. 8 Èle ka, na hia si lasi asa Betlehem. Na moa dènge ra, peka na, “Lami ho tenge palème era, ètu mia Ana ne. Ladhe miu rage, na, lèpa hari mai sèna ka peka dènge ja'a. Te ja'a neo laku pahaha iisi mi Nèngu kahèi.”
9 Ropa tadèngi rare lii padhai dhèu aae, hèia lasi dènge ka. Kaca'a laa, rèngu rèdhi hari hua-hètu dhu uru èèna rèdhi ètu bèka dhimu. Hua-hètu ne cèu ètu madha rèngu, na kako uru nèti rèngu, hèia tèja ètu dedha era Ana ne pea.
10 Ropa rèdhi, hèia ra karej'e titu kèna. 11 Èle ka lasi asa d'ara èmu, hèia ladhe rèdhi Ana ne dènge ina Na Maria. Hèia ra patitu kètu urutuu ho pahaha iisi mi Ana ne. Ka dhèu se bhoke mèdha dhu kab'ua rèti hia Ana ne. Ra hia hualaa, kemenyan dènge raa aj'u hèu mèngi.
12 Nèbhu boe, ka dhèu se abhu nii nèti Ama Lamatua, peka na, “Lami ia ka asa dhèu aae Herodes.” Nèti èèna ka, ra lèpa hari asa rai rèngu re j'ara leo.
Yusuf si rai asa Masir
13 Lod'o dhèu d'èlu-mèu ladhe hua-hètu se lèpa, hèia ana pajuu Lamatua èci nèti sorga, mai peka dènge Yusuf ètu d'ara nii, aku nèngu na, “Yusuf! Pakèd'i dènge ka d'ara lai-lai ne! Mèti Ana ne dènge ina Na lami asa Masir. Pea ètu nèi, toke Ja'a peka d'ai lod'o mia miu lèpa hari. Te dhèu aae Herodes tenge j'ara ho pamadhe Ana ne!”
14 Hèia Yusuf kèd'i nèti bhèj'i. Ka mèda èèna kahèi, nèti dhèu èmu na dènge Ana ne, rai lasi asa Masir. 15 Ra pea ètu nèi toke dhèu aae Herodes madhe. J'ara èèna, nuka sèmi ca dhèu nèti lii padhai Ama Lamatua, ngara na Hosea, suri tèke karèi nèti uru ka, na,
“Ja'a paroa hari Ana Ku, ho lèpa ka nèti Masir.”b
Dhèu aae Herodes pamadhe ana iiki ae-ae ètu Betlehem
16 Ropa dhèu aae Herodes ne'a nare, na, dhèu d'èlu-mèu ladhe hua-hètu sèra leko-monya ne, hèia na nasa titu kèna. Na paredha sordad'u na sèra, aku nèngu na, “Lami asa rae Betlehem nèi, aa asa rae-rae leo dhu padètu ètu èèna. Pamadhe aa'i ana mone iiki dhu dua tèu asa haha mai.” Herodes hia paredha ne, lula na sanèd'e lii lolo nèti dhèu d'èlu-mèu sèra. Na ige karèi nèti rèngu rèdhi hiu-hiu hua-hètu cèu ètu dedha-liru.
17 J'ara se'e aa'i-aa'i j'aj'i madhutu ngaa dhu dhèu nèti lii padhai Ama Lamatua, ngara na Yermia, suri tèke, peka na,
18 “Abhu lii tangi dènge lii roma iisi dhèu nèti kota Rama.c
Rahel tangi d'ara pèd'a,
lula ana-ana na madhe aa'i.
Na d'èi boe ca dhèu sa mai pamako ne,
lula ana-ana na, aad'o heka ca dhèu sa.”d
Yusuf si lèpa nèti rai Masir
19 Nèbhu-nèbhu ka, dhèu aae Herodes madhe. Lod'o èèna, Yusuf si ètu Masir era. Hèia Ama Lamatua pua ana pajuu Na ca dhèu mai nèti sorga, pad'elo rèhu na mi nèngu ètu d'ara nii. 20 Ana pajuu ne lii, aku nèngu na, “Yusuf! Kèd'i ka! Mèti ka Ana ne dènge ina Na asa Isra'el. Te dhèu dhu neo pamadhe Ana ne, madhe le.” 21 Ropa tadèngi nare, hèia Yusuf kèd'i. Èle ka nèti si asa rai Isra'el.
22 Te ngaa ropa Yusuf tadèngi na, Arkalaus, ana dhèu aae Herodes, dhu j'aj'i dhèu aae limuri ne ètu propensi Yudea, ka na madha'u la'e asa Yudea. Èle èèna ka, Ama Lamatua peka hari dènge ne ètu d'ara nii, na, “Yusuf, èu baku pea ètu Yudea.” Nèti èèna ka, lasi pea asa propensi Galilea, 23 ètu rae Nasaret. Dènge j'ara ne lii padhai Ama Lamatua lèke tare'a, nuka sèmi ngaa dhu dhèu rèti lii padhai Na suri tèke, na “Bèli-camèd'a dhèu paroa Ne, Dhèu Nasaret.”e