Hai haitua susura ia fee neu basa atahori mana ramahere neu Yesus Kristus sia kota Filipi. Ma hai nau fo basa malangga atahori sarani', ma mana tulu-fali malangga atahori sarani' ra, rahine malolole susura ia isi na.

2 Lamatualain naa, hita Ama na. Ma Yesus Kristus hita Malangga na. Hai mo'e fo ratud'u rala malole na ra neu nggi, fo ama misod'a noo mole-d'ame.

3 Doo' ena au nda 'ita hei sa, te au nda lilii' nggi sa! Lele' au 'usuned'a nggi, na, au 'o'e makasi neu Lamatualain, huu hei mimihere mikindoo neu E. 4 Lele' au hule-o'e fee nggi, na, rala ngga namaho'o, 5 huu eni' a fai' fo hei simbo Lamatualain Hara-lii Malolen, hei dui-b'engga mikindoo ue-tataon mi'ib'ue moo au. 6 Naa natud'u 'oi, Lamatualain mulai ue-tao sia rala ma ra ena. Ma au 'uhine teb'e-teb'e' 'ae, Ana ue-tao nakandoo ue-tatao malolen losa dad'i matetu-manad'ai' lele' Yesus Kristus bali' nema.

7 Mema' nandaa au sue nggi, huu rala ngga nenepa'a-sii' noo nggi eni' a doo' ena. Lele' naa, hei ue-tao tungga au boe, lele' au 'ufad'e Lamatualain Hara-lii Malolen neu atahori, ma 'utaa-'uselu 'oo atahori mana lab'an Hara-lii Malole' a. Mae au bui rala 'uu o, hei nda mela hela au sa. 8 Lamatualain bub'ulu' nae, rala ngga ma'ahee seli neu nggi. Huu Au susue ngga neu nggi, 'ona' Yesus Kristus susuen boe.

9-10 De au hule-o'e fee nggi, ta'o ia: au 'o'e fo hei esa boe sue esa mikindoo ma au o hule fo Lamatualain fee nggi mihine teb'e-teb'e' dala' bee malole', fo masod'a ma ra dad'i ndoo-meu'. Dei fo, lele' Kristus na'etu' ded'eat fee basa atahori, na, Ana nafad'e nae, hei nda sala saa-saa sa boe, 11 huu mesa' ne mana tao rala ma ra ndoo-meu' de leo-lao noo ndoo-tetu' boe. Noo leleo-lalao ma ra ta'o naa, atahori laen ra so'u rananaru Lamatualain, ma koa-kio E boe.

12 Toronoo susue ngga ra, e! Au nau nggi mihine mae, hambu atahori tao doid'oso au, de tao au bui rala 'uu. Te nda bub'ulu' sa te, Lamatualain Hara-liin nened'ui-b'engga' nakandoo, 13 sambe sold'ad'u mana ranea sia ume panggat, ma basa atahori laen o bub'ulu' rae, au bui rala 'uu huu au tungga Yesus Kristus.^a 14 Lamatualain atahori na ra sia ia rita rae, Lamatualain tao ta'o naa lele' au sia bui ia rala. Naa de ara boe rambarani, de nda ramatau sa ena. Boe ma ara 'ola' relo-relo Lamatualain Ded'ea-'o'olan sia bee-b'ee.

15-17 Sia ia hambu atahori mata' rua mana manggate ranori so'al Kristus. Naeni, hambu ruma ue-tao noo rala ndoos, ma ruma ue-tao rendi 'a rala banggi-b'anggi na ra. Mana ue-tao noo rala ndoos, rala na ra malole roo au. Ara rahine teb'e rae, au lemba-d'oi doid'oso' ia, huu au lao' tao ue-tatao ngga, nda 'u'ud'ea' mbei sa boe.

Te mana ue-tao noo rala banggi-b'anggi', ara ue-tao noo rala mera', sangga rala' ma sangga nara'. Ara tao saranggaa atahori mamahere' ra, sad'i hambu ruma tungga sira. Ara sangga dala' fo koa-b'o'u ao na ra rae, sira manaseli' lena' au. Ara du'a rae, mete ma hambu atahori tungga se, na, naa ne'o tao au boe susa sia bui a.

18 Te hela neu ena! 'Ita' mae atahori ranori noo rala ndoos do hoko' o, au nda 'ita' 'ae ta'o bee sa ena boe. Pantin na, sad'i ranori Yesus dalan! Naa mana tao rala ngga namaho'o.

Ma au 'umuho'o teb'e-teb'e', 19 huu au bub'ulu', hei hule-o'e fee au, ma Yesus Kristus Dula-d'alen tulu-fali au. De au bub'ulu' sia fai ma'ab'uin na o, mole-d'ame! 20 De mae au 'usod'a do, mate o, nda saa sa boe. Sad'i Lamatualain pake au fo koa-kio so'u boti' Lamatua' Yesus naran, ma 'unori relo-relo so'al E, losa nda hambu saa na'amamae' au sa boe. Au 'umuhena 'ukundoo basa ia ra mia ma'ahulun losa ia.

21-23 Au du'a ta'o ia: mete ma au 'usod'a, na, au 'usod'a 'u'ub'ue 'oo Kristus, ma au lao' 'ukundoo dui-b'engga ue-tatao na. Naa malole'. Te mete ma au mate, na, au hambu hahambu' lena' naa fai. Huu au lao hela raefafo' ia, ma 'usod'a 'u'ub'ue bali' 'oo Kristus sia sorga. Naa de rala ngga ma'ahee, ma nda 'ita' 'ae bee malole' lena' sa boe! 24 Dad'i, ta'o ia! Huu hei fe'e nau au sia ia, de malole lena' au leo 'u'ub'ue 'oo nggi sia raefafo' ia. 25 Au 'umuhere fe'e 'u'ena ua-nale naru', fo leo 'u'ub'ue 'oo nggi. Lamatualain fe'e nau au tao manggatee rala ma ra, fo ama boe mimihere neu E noo rala nemeho'ot. 26 Dad'i dei fo hei bisa koa-kio so'u minanaru Yesus Kristus naran, huu Ana soi dala' de au bisa 'uma 'undaa 'oo nggi fai.

27-28 Mae ta'o bee o, masod'a ma ra musi ndoos, huu hei ia, Lamatua' atahori na ra. Dad'i hei musi leo-lao nendaa, ma tao tungga saa fo Kristus Hara-lii Malolen nafad'e neu nggi. Basa fo, mete ma au dad'i bali' 'eti se'u nggi, do, rena mia 'a atahori rae, hei masod'a ma ra malole', na, au 'umuho'o ena. Au bisa bub'ulu' 'ae, hei misod'a noo rala' esa, huu Dula-d'ale' a pa'a-sii hei mii esa ena. Ma au bisa bub'ulu' 'ae, hei manggate de mi'ib'ue milalao Lamatualain Hara-lii Malolen, fo atahori fea' ra ramahere boe. Ma hei o nda mimitau sa boe, 'ita' mae atahori lab'an nggi. Naa dad'i neu tatanda' soa' neu musu ra 'oi, Lamatualain nae nggari hendi se. Ma fee masoi-masod'a' neu nggi, fo misod'a mikindoo moo E. 29 Huu Lamatualain malolen seli, de Ana soi dala' fo ama mimihere neu Kristus, ma dad'i atahori na ra. Nda mimihere' a sa, te Ana o hela fee hei hambu sususa' boe, huu hei tungga E. 30 Au rena hambu atahori sia naa lab'an nggi, huu hei tao tungga Kristus Hara-lii Malole na. Misined'a, ma'ahulun ara o lab'an au ta'o naa boe. Losa ia nema o, ara fe'e lab'an 'ona' naa boe.^b