Hita musi taloe-tad'ae rala ta ra 'ona' Yesus Kristus
2
De toronoo susue ngga ra, mana dad'i Yesus Kristus Atahori na ra! Ana fee dala malole' nae-nae neu nggi ena. Dad'i hei musi tao manggatee esa moo esa rala na. Hei fee nenori' mana ma'oka' mia hei susue ma ra. Hei leo-lao misod'a malole' esa moo esa, huu Lamatualain Dula-d'alen ue-tao sia talad'a ma ra. Ma mitud'u rala susue malole ma ra esa moo esa. 2 Mete ma hei tao ta'o naa, na, rala ngga namaho'o. Lelenan fai, mete ma misod'a noo susue' ma rala' esa, ma hihii' esa, ma mi'etu' fo ue-tao mi'ib'ue. 3 'Afi' tao saa-saa fo sangga' a hahambu' soa' neu 'a ao ma ra. Ma 'afi' mae hei malole lena' atahori laen. Tao-tao te koao ma ra nda na'ena huu-pata' sa. Ata musi taloe-tad'ae rala ta ra, fo tae atahori laen lena' nggita. 4 'Afi' mete-se'u neu 'a hei esa-esa' ue-tatao na. Te hita o musi mete-se'u atahori laen ra to'a-taa na ra boe.5 Hita rala-d'ud'ua ta ra musi 'ona' Yesus Kristus ralan boe.
6 Te mae mata-aon 'ona' Lamatualain,
ma Eni o Malangga, 'ona' Lamatualain,
te Ana mbo'i hendi hak na,
ma nda pake panggat na sa.
7 Boe ma Ana 'onda raefafo' nema,
pake atahori mata-aon.
Ana lao hela basa hak na ra,
fo tao aon 'ona' atahori ded'enu'.
8 Ana nda 'ona' a atahori anad'iki' sa,
te tao aon 'ona' atahori mana tud'a-loloe' boe,
fo tao tungga Lamatualain hihii-nanau na.
Mae atahori risa e sia hau nggangge' o, Ana simbo' a,
ma Ana mate 'ona' Eni atahori de'ulaka'.
9 Huu naloe-nad'ae ralan,
naa de Lamatualain so'u nananaru E.
Ma fee Ne nara manaseli'.
Nda hambu nara' esa manaseli' lena' E sa boe.
10 Lamatualain so'u nananaru naran ta'o naa,
fo basa atahori fee had'a-hormat neu E.
Naeni: atahori sia lalai,
ma atahori sia raefafo'.
Atahori masod'a' ma atahori mates ra.
Dei fo basa atahori sende' lulu-langga na ra fo be'utee neu E.
11 Ma dei fo basa atahori rae, “Yesus Kristus naa, teb'e-teb'e' Malangga mana na'ena hak parenda au!”
Noo ta'o naa, ara o koa-kio Ama' Lamatualain boe.a
Hita 'ona' nduu maronda' mana naronda sia raefafo' ia
12 Toronoo susue ngga ra, e! Rena malolole! Lele' au fe'e sia kota Filipi, hei rena au, de tungga Lamatualain dala ndoos na. Ia naa hita saranggaa esa' noo mamanan, te au hule fo ama ue-tao mihere' mikindoo fo misod'a ndoos. Misined'a te, mete ma hei nda rena Lamatualain sa, na, dei fo mita neu' a ena! Huu Ana mana fee masoi-masod'a' neu nggi mia basa sala ma ra. De ama musi misod'a mindaa, huu hei dad'i atahorin ena. 13 Te Lamatualain mana ue-tao sia rala ma ra. Ana Mana soi dala' fo ama rena neu E. Ma Ana mana fee koasa neu nggi fo ama nau tao-ues fo tao ralan namaho'o.
14 Dad'i mete ma ama tao sud'i a saa, na, 'afi' au-au' ma 'afi' mireresi. 15 naa fo hei dad'i atahori rala ndoos, ma atahori nda ma sala' sa. Hei misod'a sia atahori de'ulaka' ma mana peko-leleko' ra talad'a na ra. Te 'afi' tungga se! Musi misod'a noo meumare', huu hei, Lamatualain ana na ra. Boe ma musi mironda fo mitud'u dala' neu atahori, 'ona' nduu' ra rondan raronda sia ma'ahatu' sia raefafo' ia.b 16 Ma misod'a noo ndoos ma tao tungga Lamatualain Ded'ea-'o'ola na. Noo ta'o naa, dei fo hei tao rala ngga namaho'o lele' Yesus Kristus bali' nema. Ma beb'engge ngga hambu buna-b'oa malole', huu nda nenenggari hendi parsuma 'a sa.
17-18 Te 'ita' mae au fee basa masod'a ngga, fo dad'i tutunu-hohotu', fo 'ona bee na mimihere ma ra boe manggatee ma lao' dui-b'engga Lamatualain ue-taon, na, au simbo noo nemeho'ot. [Naa, 'ona' malangga agama mbori anggor oe' neu mei tunu-hotu' fo be'utee neu Lamatualain.] Noo ta'o naa, basa nggita bisa tamoho'o teu esa, huu tutunu-hohotu' a nda parsuma 'a sa.c
Timotius ue-tataon
19 Au 'umuhena 'ae, nda doo sa te Lamatua' Yesus soi dala' fo au denu Timotius neu tao manggatee rala ma ra. Basa naa, ana bali' ia nema, fo nafad'e au hei tetende-nemberii ma ra, ma tao manggatee rala ngga. 20 Au nda denu atahori laen sa. Au denu 'aka' Timotius, huu eni rala' esa noo au. Boe ma ana sue nggi teb'e-teb'e'. 21 Ana o nda 'ona' toronoo' laen ra sa. Te sira, du'a 'aka' ue-tatao na ra, te nda ue-tao dala-d'ala' pantiin soa' neu Yesus Kristus sa. 22 Hei bub'ulu' ena mae, Timotius tao ues nita' mamaten fo dui-b'engga Lamatualain ue-tatao na. Ana ue-tao noo au, 'ona' ana' esa tao ues fee ama na. Hai ru'a nggi mii dui-b'engga Lamatua' Yesus Hara-lii Malolen sia bee-b'ee ena. 23 Mete ma ra'etu' basa ded'ea ngga sia ia ena, dei fo au fe'e fee Timotius neti ena. 24 Te ia naa, Lamatua' tao manggatee rala ngga nae, nda doo' sa te, au bisa 'eti se'u nggi boe.
Epafrod'itus ue-tataon
25 Fe'esa'an, au hambu sususa'. De hei denu hita toronoon Epafrod'itus nema se'u au. Ana dui-b'engga Lamatua' ue-tataon na'ab'ue noo au, 'ona' sold'ad'u ra manggate tungga malanggan parenda na. Te ia naa, au du'a na au musi fee ne bali' neti nisi' hei e. 26 Huu ralan ma'ahee nae bali' neu se'u nggi. Boe ma ana du'a-d'u'a' nggi, huu bub'ulu' nae, hei rena eni hed'i-hed'i'. 27 Teb'e ta'o naa. Fe'esa'an namahed'i baraat losa nae 'a mate. Te Lamatualain sue nala e seli, de tao nahai' e. Ma Lamatualain sue au boe, de Ana tao nahai' Epafrod'itus, fo au sud'i boe susa fai. 28 Naeni de au 'ae denu bali' E neti, fo hei mindaa moo e noo nemeho'ot. Mete ma ta'o naa, na, au rala ngga teer ena. 29-30 De hei musi simbo e noo malolole, huu eni o, Lamatua' atahorin boe. Ma hei musi fee had'a-hormat neu basa atahori mana 'ona' e boe. Huu ana neu dui-b'engga Kristus ue-tataon, losa nae 'a mate. Te ana nda dinggo' mbei sa boe, huu ana nae tulu-fali au nggati nggi. Sad'i hei musi simbo bali' e noo rala malole'.