Conto 'ona': anak ara roo ina-ama' ra
6
'Ona' naa boe anak ara! Hei musi rena ina-ama ma ra, huu naa nandaa noo hita Lamatuan hihii-nanau na.a 2 Sia Lamatualain Susura Meumaren nenesura' 'oi, “Ho musi fee had'a-hormat neu inam noo amam.” Ia, Lamatualain parenda fefeun nendi' hehelu-fufuli'. 3 Te lele' Lamatualain fee parenda' naa, Ana helu-fuli nae, “Mete ma ho tao tungga ta'o naa, dei fo ho hambu papala-b'ab'anggi' nae-nae, ma ua-nale naru'.”b4 'Ona' naa boe, Ina-ama' ra, e! Ama 'afi' tao deres mbali ana ma ra, te naa tao se ramanasa. Malole lena' mete-se'u se noo malole, ma nenori se eni' a 'a'ana na ra fo tungga Lamatualain dala na. Mete ma ara sala, na, mitud'u matetun tungga Lamatualain hihii-nanau na.c
Conto 'ona': atahori mana tao ues roo malangga ra
5 'Ona' naa boe, atahori mana tao ues re! Hei musi mimitau ma rena malanggam, mana parenda nggi sia raefafo ia. 'Afi' tao-ues noo rala seseri', te tungga teb'e-teb'e' Malangga hihii-nanaun, 'ona' hei o tungga teb'e-teb'e' Kristus hihii-nanau na boe. 6 Huu hei ia ra o, Kristus atahori mana tao-ues na ra boe. De sia raefafo' ia, 'afi' manggate 'a lele' malangga sia mata ma ra, te mae ana nese o tao-ues teb'e-teb'e' fee neu e boe. Huu Lamatualain hihii-nanaun ta'o naa. 7 Dad'i milalao ue-tatao ma ra noo manggate', 'ona' hei tao-ues fee hita Lamatualain na, te nda 'ona' ue-tao fee atahori sa. 8 Huu hita bub'ulu' tae, dei fo Lamatualain bala-b'ae atahori mana tao dala malole'. 'Ita' mae sira, atahori mana tao ues do, malangga do, ate do, atahori mana leo ao' do, Ana bala-b'ae fee basa se.d
9 'Ona' naa boe, malangga re! Ama 'afi' mi'itatau' atahori mana tao-ues ma ra. Te ara ra'ena Lamatualain sia sorga, 'ona' hei ena ma boe. Ana nda pili-tad'a sa, ma Ana rena sud'i 'a see. Mae malangga do, mana tao ues o, ana rena basa se.e
Minea mihere' mendi' Lamatualain bab'aa aon noo tee-tande na ra
10 Rena malolole au 'o'ola ma'ab'ui ngga ia. Hei musi to'u mihere' nemehere ma ra neu Lamatualain. Huu Eni, hei malanggam, mana na'ena hak parenda nggi ma koasan manaseli'. Naa mana tao ma'ad'ere' nggi. 11 Sold'ad'u ra pake bab'aa ao' noo tee-tande' fo lab'an musu na ra. Lamatualain nae pake nggi 'ona' sold'ad'u ra boe. Ana nau hei lab'an basa dud'u'a de'ulaka' fo nitu ra malanggan tao' ra. Naa de hei musi mihehere mendi' basa Lamatualain bab'aa-aon noo tee-tande na. 12 Te hita ia ra, tatati! Hita nda tatati lab'an atahori sa, te tatati lab'an koasa de'ulaka' fo nda tita' a sa, lab'an mana to'u parenda' ra, lab'an koasa ma'ahatu', ma lab'an dala-d'ala de'ulaka' ra. 13 De hei musi mihehere mendi' basa Lamatualain tee-tande na. Naa fo, mete ma fai de'ulaka' nema, na, hei bisa lab'an mikindoo losa nate'e. Huu mete ma hei nda tud'a sa, na, hei bisa mi'itataa' losa misenggi'.
14 Dad'i hei musi mihehere fo minea mihere'! Mimihere 'a Lamatualain Ded'ea-'o'ola ndoo-tetun, huu naa 'ona' hei pake sold'ad'u ra bob'ori na.f Misod'a noo ndoo-tetu', huu naa 'ona' hei pake bad'u besi' fo bab'aa tenda ma ra.g 15 Mihehere fo mii mifad'e Hara-lii Malole' mana natud'u dala' fo atahori rasod'a noo mole-d'ame roo Lamatualain, huu naa 'ona' hei pake sold'ad'u ra sapatu na ra.h 16 Mimihere mikindoo 'a neu Lamatualain, huu naa 'ona' bab'aa besi' fo pake basili mendi'. Hei bisa pake tee-tande' naa fo mimate' basa nitu de'ulaka' ra bub'usu ain fo ara busu' nisi' hei' a. 17 To'u mihere' nemehere ma ra, mae hei hambu masoi-masod'a' mia Lamatualain, huu naa 'ona' sold'ad'u ra pake solo besi baja. To'u mihere' Lamatualain Ded'ea-'o'olan mia Dula-d'ale Meumaren, huu naa 'ona' sold'ad'u ra to'u tafa'.i
18 Mete ma hei mae mimbirii' mihere', na, hei musi hule-o'e mikindoo 'a mendi' Lamatualain Dula-d'ale Meumaren koasa na. Minea mikindoo 'a, 'afi' miloe' hule-o'e fee basa Lamatua' atahori na ra sud'i 'a sia bee. 19 Ma 'afi' lilii' hule-o'e fee au boe. Mo'e fo Lamatualain fee au hehelu-fufulin, naa fo au bisa 'ufad'e relo-relo Eni dud'u'an fee atahori laen ra boe.j 20 Mae au dad'i atahori bui ena o, Lamatua' Yesus denu au dad'i ded'enu na. Dad'i hule-o'e fee au, fo 'afi' 'umutau 'ola' noo matetu', huu mema' au ues ngga na!
Paulus nate'e susuran
21 Au nau hei bub'ulu' au tetende-nemberii ngga. Huu naa, au fee Tikikus neti. Eni, au toronoo susue ngga, ma ana manggate dui-b'engga Yesus Kristus ue-tatao na.k 22 Hela fo ana dui so'al hai masod'a ma ra sia ia. Ma au o nau fo ana tao manggatee rala ma ra boe.l
23 Au hule neu Lamatualain, fo hita Aman, noo Yesus Kristus, fo hita Lamatuan, fo Ara tao basa toronoo' ra esa dame noo esa, ma esa sue esa, huu hei mimihere Se. 24 Au o hule-o'e, fo hita Lamatuan Yesus Kristus natud'u rala malolen neu basa atahori mana sue rakandoo E.
Au susura ngga losa 'a ia ena!
Sod'a-mole',
Paulus