Timotius na'ab'ue noo Paulus ma Silas
16
Basa ma, Paulus se lao ra'ahulu' risi' kota Derb'e. Basa de, ara lao risi' kota Listra. Sia naa, ara randaa roo atahori soru' esa, naran Timotius. Aman, atahori Yunani. Ma inan, atahori Yahud'i mana namahere neu Yesus ena. Timotius o dad'i Yesus atahorin ena boe. 2 Basa atahori mamahere' sia kota Listra ma kota Ikonium, bub'ulu' Timotius atahori malole'. 3 Paulus nau fo Timotius tungga noo se. Te atahori Yahud'i sia naa, bub'ulu' Timotius aman atahori Yunani, de ana nda sunat tungga 'ad'at Yahud'i sa. Naa de, Paulus ator fo ara sunat Timotius.a 4 Boe ma, ara lao mia mamana' esa risi' mamana' esa, de rafad'e ne'etu' fo Lamatua' Yesus ded'enu na ra roo lasi-lasi Kristen ra ra'etu' mia Yerusalem. 5 Noo ta'o naa, ara tao manggatee atahori mamahere' ra rala na ra. Tungga fai, atahori mamahere' ra, boe ramaheta.
Ara ro'e Paulus nisi' Maked'onia
6 Basa naa ma, Paulus se lao rakandoo. Ara risi' nusa Frigia ma nusa Galatia, huu Lamatualain Dula-d'ale Meumaren 'ai se fo 'afi' rafad'e Lamatualain Hara-lii Malolen sia profinsi Asia. 7 Ara losa mamana' esa natad'a noo profinsi Misia ma, rae maso' sob'a risi' profinsi Bitinia. Te Yesus Dula-d'alen 'ai se fo 'afi' naa reu.b 8 Basa de, ara lao seli profinsi Misia, de losa kota Troas sia tasi suu na.
9 Tetemba' naa Lamatualain natud'u Paulus 'ona' meit e. Ana nita atahori sa nambarii' sia tasi seri', sia profinsi esa, naran Maked'onia. Atahori naa nggasi no'e tutulu-fafali' nae, “Ama'! 'Uma tulun hai dei!” 10 Paulus nita ta'o naa ma, haic mi'etu' fo mii sia Maked'onia. Hai mimihere mema' Lamatualain denu hai mii mifad'e Dala Masod'an neu atahori sia tasi seri'. Naa de Ana 'ai fo 'afi' misi' mamana' laen.
Mama Lid'ia namahere Lamatua' Yesus mia kota Filipi
11 Basa ma, hai sae 'ofa' mia kota Troas, misi' pulu ana' esa, naran Samotrake. Mbila' neu, ma hai lao mikindoo misi' kota esa, naran Neapolis. Basa ma, hai 'onda mia naa. 12 Mia naa, hai lao tungga mad'a ata misi kota monae' esa, naran Filipi. (Filipi, kota mana seli' esa sia nusa Maked'onia. Mana parenda Roma o to'u koasa sia naa boe.) Hai leo fai hira mia naa.
13 Nandaa noo atahori Yahud'i ra fai hahae aon, hai mii sangga atahori Yahudi ra mamana hule-o'en. Hai mae ne'o mamana hule-o'e' naa, sia loe a suu na. De hai lao dea mii mia kota a, losa hambu loe esa. Sia naa, mindaa moo ina' hira.d De hai 'endo' 'ola-'ola' moo se. 14 Ina' naa ra, esa naran Lid'ia. Ana mia kota esa, doo' mia profinsi Asia, naran Tiatira. Ana naseo teme dula maranggeo' felin seli, fee neu atahori monaen ra. Ana manggate hule-o'e neu Lamatualain. De ana rena Paulus 'o'olan ma, ana simbo neu' ena boe.
15 Boe ma hai sarani mema' mama Lid'ia noo ume isi na ra. Basa ma, ana no'e hai nae, “Ama ngga ra, e! Mete ma hei du'a mae au ia 'umuhere teb'e neu Lamatua' Yesus, na, 'ima numban sia ume ngga.” Ana 'aka' a kokoe, de hai tungga.
Ara tao Paulus noo Silas bui rala reu mia Filipi
16 Fai' esa hai lao-lao' misi' mamana hule-o'e', boe ma mindaa moo ana feto' esa mia dala'. Eni, atahori ate na. Nitu de'ulaka' tao e, de ana bisa nafad'e atahori ua-nale na ra. Ana o bub'ulu' ded'eat ra huu-pata na ra boe. De atahori hetar hii fee ne doi' fo ro'e mete sira ua-nale na ra. Te doi' naa ra, ana feto' a malangga na ra hambu se, de ramasu'i. 17 Fai' naa, hai lao ma, ana feto' naa 'aka' tungga-tungga' hai. Ana randu nae, “Atahori ia ra, Lamatualain Mana sia Ata-ata' a ana ded'enu na ra. Ara rema rae ratud'u dala' ta'o bee fo atahori bisa rasod'a, ma nenembo'it mia sala na ra!”
18 Ana feto' naa randu ta'o naa losa fai hira. Doo-d'oo ma Paulus mbera rena rarandu na. De ana heo' dean, de mete nahere' e, ma parenda nae, “Hee! Nitu de'ulaka'! Noo Lamatua' Yesus koasan, au parenda nggo lao hela ina' ia, 'oras ia boe!” Paulus 'ola' basa ta'o naa ma, nitu a nela dea neu boe.
19 Lele' ana feto' a malangga na ra bub'ulu' rae, sira aten koasan mopo ena, ma ara ramanasa, huu ara nda hambu doi' sa ena. De ara to'u Paulus noo Silas, ma lea rendi se risi' mamana naseo' sia mamana na'etu' ded'eat. 20 Losa naa ma, ara nggasi rahere' rae, “Atahori ia ra, rema fo tao ralulutu hita kota na. Te sira nda hita atahori ta ra sa. Sira atahori Yahud'i mia doo-d'oo' rema, fo rae tao kaco sia ia! 21 Ara o ranori atahori rae, tungga neu 'a sira atoran na, 'afi' taoafi' neu mana parenda Roma ra atoran na.”
22 Ara rena ta'o naa ma, atahori ra ramue, de reu momoko Paulus noo Silas. Boe ma atahori monae mana na'etu' ded'eat ra denu atahori reu sii Paulus noo Silas bua na ra, ma filo se. 23 Ara filo Paulus noo Silas, ma tao se bui rala reu. Ara denu malangga mana nanea' a fo nanea besa-b'esa ru'a se. 'Afi' losa ara rela. 24 De malangga a tao se risi' kama esa sia bui talad'a na. Ma ana langge ei na ra.
25 Mbei ma neofaan ma, Paulus noo Silas hule-o'e ma sod'a koa-kio Lamatualain. Atahori bui laen sia naa ra, rena sosod'a na ra boe. 26 'Aib'oi' ma, rae a nanggenggo' seli, losa ume bui a nanggongga'. Lelesu na ra o soi ao na ra boe. Ma atahori bui ra rante na ra mbasi hendi se.
27 Lele' naa malangga a nggengger de fela, ma nita bui a lelesun basa se manasoi'. Ana nae ne'o basa atahori bui ra rela ena. De ana lesu felan nae mbau nisa ao na. 28 Te Paulus nggasi nahere' ma 'ai nae, “Ama'! 'Afi' mbau misa ao ma! Te basa hai fe'e sia ia!”
29 Malangga a rena hara' naa ma, ana namatau nae mate de nda nita' nae tao saa sa boe. Ana denu rendi fee ne 'ob'or, de bui rala neu, te aon foti ngge'e-ngge'e. Boe ma nna sende' lulu-langgan neu Paulus noo Silas ei na ra.
30 Basa ma, ana noo se dea reu, de natane nae, “Ama ngga ra, e. Au ia, susa seli. De Au musi tao saa, fo au nenembo'i' mia sususa' ia?”
31 Paulus se rataa rae, “Dalan ta'o ia: mumuhere Lamatua' Yesus, fo Ana fee masoi-masod'a' neu nggo moo ume isi ma ra.” 32 Boe ma Paulus noo Silas 'ola-'ola' roo malangga bui a ma basa ume isi na ra. Ara rafad'e Lamatua' Yesus Dala Masod'an neu se. 33 Basa de doo-d'oo ma, malangga bui a noo Paulus ma Silas de reu tao rameu bisu fo ara filo se afis a. Basa ma, ara sarani malangga naa noo ume isi na ra. 34 Boe ma, ana noo se nisi' umen fo ara raa. Ana noo ume isi na ra ramaho'o rala seli, huu ramahere neu Lamatualain ena.
35 Fefetun ma, atahori mana ma'etu' ded'eat ra, fee hara' neu malangga bui naa, fo denu mbo'i Paulus se mia bui a.
36 Malangga bui a rena nala ma, ana nafad'e hara' naa neu Paulus nae, “Ama ngga ra, e. Atahori monaen ra ra'etu' fo mbo'i nggi. De ama' se bali' noo masod'a' leo.”
37 Te Paulus nda simbo sa, de nafad'e mana nendi hara' a nae, “'Afi' ta'o naa! Hai ia, mi'ena hak atahori Roma. De hai mo'e hahambu ma ra. Mana parenda ra musi nggero hai ded'ea ma tungga atoran. Matetun, musi 'endo' paresa' ded'eat, dei fo hukun atahori. Te ara nda tao ta'o naa sa. Ara nda 'endo' paresa' ded'eat sa, fo sangga sala ma ra saa, te ara filo hai neu' ena mia atahori hetar mata na ra. Nda na'ena sala' saa sa te, tao hai bui rala mii. Ia teb'e-teb'e' nda tungga atoran mana parenda Roma sa. Te ia ma, ara rae mbo'i ne'efuni' hai mia bui rala, fo atahori nda rahine hai sala saa sa boe? Nda ta'o naa saa. Denu malangga ra rema mbo'i hai. Ta'o naa dei fo hai nau.”
38 Mana nendi hara' a neu nafad'e bali' Paulus 'o'olan ma, malangga ra fe'e bub'ulu' ru'a se ra'ena hak sia Roma boe. De ara ramatau rala seli. 39 Basa ma, ara bui rala reu, rataa sala na ra ma ro'e maaf mbali Paulus noo Silas. Dei de, mbo'i ru'a se mia bui a ma ro'e se lao hela kota naa. 40 Paulus se lao hela bui a ma, ara risi' mama Lid'ia ume na. Sia naa, ara ra'ab'ue roo atahori mamahere' ra. Ara ranori se ma tao manggatee rala na ra selu' fai. Dei de, ara lao hela kota naa.