Paulus susuran
fee neu atahori mamahere' sia
Kolose
Sod'a-mole'
1
Sod'a-mole' mia au, Paulus. Lamatualain mana pili au fo dad'i Yesus Kristus ded'enu na. Sia ia o hita toronoon Timotius fee nggi hara sod'a-mole' boe.2 Au sura' susura ia fee nggi, naeni Lamatualain atahorin sia kota Kolose, mana tao tungga Yesus Kristus dala masod'a na.
Hai mo'e Lamatualain, hita Aman, natud'u rala malolen neu nggi, naa fo hei bisa leo-lao noo mole-d'ame.
Paulus hule-o'e fee atahori mamahere' ra sia Kolose
3 Hai hule-o'e mikindoo 'a fee nggi sia ia, ma hai mo'e makasi mbali Lamatualain, naeni hita Malanggan Yesus Kristus Ama na. 4 Hai rena dala' nae' so'al hei nemehere ma ra neu Yesus Kristus, ma so'al hei susuem noo rala malole ma ra neu basa atahori mamahere' ra. 5 Hei tao ta'o naa, huu hei bub'ulu' dala-d'ala malole', mana nenembed'a' fee nggi sia nusa tetu' a. Dala ia ra, hei rena mia ded'ea-'o'ola ndoo-tetu', naeni Lamatualain Hara-lii Malolen, 6 fo atahori reti rafad'e neu nggi eni' a ma'ahulu na. Hara-lii Malole' a nened'ui-b'engga' sia bee-b'ee sia raefafo' ia, ma hambu buna-b'oan noo malole', huu ana 'ub'a atahori masod'an dad'i malole'. Hei masod'a ma ra o neneob'a' 'ona' naa boe, eni' a mia fefeun fo hei rena Hara-lii Malole' a, ma mihine teb'e-teb'e Lamatualain rala malole na.
7 Hei minori dala' ia ra mia 'a'a Epafras, naeni hita nonoon mana tao ues fo hita sue' a. Te ana manggate tao Kristus ue-tataon sia talad'a ma ra.a 8 Ana dui hai sia ia so'al hei dala susue ma ra, fo Lamatualain Dula-d'alen fee nggi' a.
9 Huu naa, eni' a mia fefeun fo hai rena so'al hei dala ma ra, hai hule-o'e mikindondoo' a fee nggi. Hai mo'e Lamatualain fo fee nggi mihine teb'e-teb'e' hihii-nanaun, ma mihine dala' nae' tungga saa fo Dula-d'ale' a nanori neu nggi. 10 Noo ta'o naa, hei bisa misod'a mindaandaa ma mendi Lamatualain nara malole na. Ma hei o bisa tao mimiho'o Lamatualain ralan sia basa dala' ra. Mete ma hei mitud'u rala malole ma ra neu atahori, na, hei boe mihine Lamatualain.
11-13 Hai o hule-o'e mo'e Lamatualain fee koasa mandete-masa'an, fo ama bisa mi'itataa' lemba-misaa basa dala' ra. Hai hule fo rala ma ra sofe' noo nemeho'ot, fo mo'e makasi mikindoo neu Ama' Lamatualain. Te Ana soi dala' de hei simbo bab'anggi' mia hata-heto' mana sia nusa tetu'. Hata-heto' naa, Ana fee basa atahori mana ramahere neu Yesus Kristus ra. Huu Ana mbo'i hendi nggita mia koasa ma'ahatu' a, de fee nggita dad'i Yesus Kristus atahorin, fo leo sia manggarelo' a. Ana so'u nanaru Yesus Kristus, dad'i hita Mane na. Yesus naa, Lamatualain Ana susue na. 14 Lamatualain fee hendi Anan naa, fo soi-tefa nggita ma 'ose hendi sala-singgo ta ra.b
Kristus sia ata' lena' basa e
15 Kristus naa, mata' esa noo Lamatualain,
fo atahori nda bisa rita' a sa.
Ana sia na'ahulu' mia basa e,
ma Ana dad'i Malangga neu basa saa fo Lamatualain tao' ra.
16 Huu Lamatualain pake E,
fo tao nala lalai ma raefafo' noo basa isi-oe na.
Ana tao sud'i 'a saa fo atahori bisa rita' ra,
ma atahori nda bisa rita' ra sa boe.
Conto 'ona', mana to'u parenda, mana to'u koasa,
mane' ra, roo malangga-malangga ra.
Basa saa fo Lamatualain nae tao' ra,
Ana tao fee neu Yesus kristus,
ma Yesus mana ue-tao basa naa ra.
17 Lele' basa' e nda fe'e sia sa,
te Ana sia mema' ena.
Basa saa mana dad'i' ra nenepa'a-sii' roo E,
ma Eni mana ator neu se.
18 Ana dad'i Malangga neu basa atahori mamahere' ra,
ma atahori mamahere' ra dad'i 'ona' aon boe.
Te Eni mana nalalao basa' e.
Mia basa mana mate' de rasod'a bali' ra,
Eni pantiin lena' basa se,
ma Eni mana sia ata' lena' basa se.c
19 Basa mana sia Lamatualain aon,
hambu sia Kristus aon boe,
ma naa tao Lamatualain namaho'o.
20 Lamatualain pake Yesus Kristus,
fo d'ame noo basa saa fo Eni tao' ra.
Ana fee Anan,
dad'i tutunu-hohotu' fo raan nandali,
ma mate sia hau nggangge',
naa fo basa mana sia lalai,
noo basa mana sia raefafo'
bisa dame bali' roo Lamatualain.d
21 Fe'esa'an, hei misod'a mi'id'oo' mia Lamatualain. Hei musu E, de misod'a saranggaa mia E, huu rala ma ra de'ulaka' ma 'aka' tao de'ulaka' lab'an E mikindoo 'a. 22 'Ona' naa o, ia naa Ana mana soi dala' fo hita dame bali' too E. Ana mana denu Anan dad'i atahori. Ana mana fee Anan dad'i tutunu-hohotu', ma mate sia hau nggangge' fo hita d'ame bali too E. Yesus Kristus tao ta'o naa, fo Ana noo nggita teu tisi' Lamatualain matan, fo dad'i teu atahori meu-mare' ma rala ndoos, mana nda na'ena sala' saa sa boe. 23 Matetun, hei musi mi'itataa' mikindoo moo nemeherem ma ra. To'u mihere' fo 'afi' minggongga'! 'Afi' dinggo' hela Hara-lii Malole', fo hei simbo eni' a fefeu na. Te Hei bisa mimihena neu Hara-lii Malole' naa. Atahori reu dui-b'engga Hara-lii Malole' a sia bee-b'ee sia raefafo' ia ena. Ma Lamatua' denu au, Paulus, fo 'uu dui-b'engga Hara-lii Malole' naa.
Paulus tao ues fo mete-se'u Lamatua' atahori na ra
24 Lele' Yesus fe'e mia raefafo' ia, Ana hambu doid'oso' nae'. Ma 'ale' ia, au o lemba doid'oso' mata'-mata' boe. 'Ona' naa o, au 'umuho'o 'ukundoo 'a. Mete ma hambu atahori musi doid'oso, na, hela neu fo au lemba doid'oso' naa fee se, 'ona' Kristus lemba atahori na ra doid'oso na ra. Te atahori na ra, dad'i 'ona' aon boe. 25 Lamatualain fee au ue-tataos fo mete-se'u atahori na ra. Naa de au 'unori lutu'-lelo' Ded'ea-'o'olan neu nggi. 26-27 Mia fefeun, atahori rena Lamatualain Ded'ea-'o'ola na ra. Te nda fe'e rahine Ded'ea-'o'ola' ra sosoa-ndandaan noo malole sa, huu sosoa-ndandaan fe'e ma'afuni'. Te ia naa, Lamatualain na'etu' fo natud'u masud naa, neu atahori na ra tungga Yesus nenema na. Eni masud na, hara-lii manaseli' fee neu basa leo-leo ra sia raefafo' ia. Hara-lii manaseli' naa, naeni:
Kristus nasod'a sia hei rala ma ra!
Naa, mana tao nggi mimihere mikindoo mae,
dei fo Ana tao dala malolen seli fee hei sia nusa tetu'.
Ia ia, fo hita atahori nea-nea eni' a fai ma'ahulun neu.
28 Dad'i hai mifad'e basa atahori so'al Kristus. Hai minori basa atahori ma fee nesenened'a' neu se mendi' basa dud'u'at fo Lamatualain fee neu nggita' a. Hita tao ta'o naa, fo tao ma'adere basa atahori mana tungga Kristus losa ara dadi matetu-manad'ai' fo ara bisa rambarii' sia Eni matan noo nda mae-mae' sa, huu rala na ra ndoo-tetu' rakandoo 'a. 29 Naa de au manggate tao ues soa' neu nggi. Au bisa 'u'utataa' manggate tao ues ta'o naa, huu Kristus koasan tao fee au ma'ad'ere. Ma koasan naa, manaseli'!