2 Naa! Lamatualain, hita Ama na. Ma Yesus Kristus, hita Malangga na. Au hule fo Ara ratud'u rala malole na ra fo hei leo-lao noo mole-d'ame.

3 Koa-kio Lamatualain! Koa-kio hita Lamatuan Yesus Kristus Aman Lamatualain. Te Lamatualain fee hita papala-b'ab'anggi' mata'-mata' mia sorga, huu hita dad'i Yesus Kristus atahorin ena.

4 Te lele' raefafo' fe'e nese, Lamatualain sue ma pili nala hita ena, fo dad'i teu Kristus atahori na. Ana nau fo hita tasod'a noo meumare' fo atahori nda bisa rundu sala' neu nggita sa. 5 Ana na'etu' basa eni' a ma'ahulun, fo pake Yesus Kristus tao hita dad'i anan. Ia mana tao ralan namaho'o. 6 Naa de hita koa-kio E. Huu Ana natud'u rala malolen neu nggita, fo tasod'a ta'ab'ue too Ana susue na.

7 Mae ma'ahulun hita nda tasod'a meumare' tungga Lamatualain dala masod'an sa o, Ana natud'u rala malolen, ma haitua Anan, fo raan nandali losa mate. Noo dala' naa, Anan soi-tefa nggita mia sala-singgo ta ra.^c 8 Huu Ana sue naseli' nggita, de Ana o tao manggarelo hita ralan boe, fo ata bisa tahine hihii-nanau na. 9 Ma'ahulun, Lamatualain nda fe'e nafad'e basa hihii-nanaun neu atahori sa. Te 'ale' ia, Ana fee hita tahine tae, eni' a lele ulu' a Ana na'etu' nala nae pake Yesus Kristus fo nad'ame' atahori noo Lamatualain. 10 Dei fo losa fain, na, Yesus Kristus dad'i Malangga fo nalalao basa mana sia raefafo' ma sia sorga ra.

11-12 Huu hita tasod'a too Kristus, naa de hita simbo tala hata-heto' mia Lamatualain. Te mia fefeun, Ana pili hai atahori Yahud'i, dad'i Eni atahorin ena. Ana nae pake hai fo soi dala' fee neu nusa' laen ra, naa fo basa atahori bisa ramahere Kristus. Basa ia ra dad'i, tungga saa fo Ana na'etu' basa ena. Noo ta'o naa, basa hita bisa so'u-b'oti' Lamatualain nara manaseli na.

13 Huu hai soi dala' ena, naa de hei mia nusa' laen o bisa maso' dad'i Kristus atahorin, sad'i hei mimihere Hara-lii Malole matetun naa. Huu Hara-lii Malole' naa fee masoi-masod'a' neu nggi.

Mete ma mimihere ta'o naa, na, hei simbo Lamatualain Dula-d'ale Meumaren fo Ana helu-fuli' a. Te Dula-d'ale Meumare' naa, 'ona' cap fo dad'i tatanda' 'oi, hei dad'i Eni 'enan ena. 14 Dula-d'ale Meumaren o dad'i tanda nemehere' 'oi, dei fo Lamatualain fee basa saa fo Ana helu-fuli' naa, losa soi-tefa hita dad'i Eni atahori na ra. Naa de hita koa-kio mandete-masa'an.

15 Au rena nae' ena, so'al hei nemehere ma ra neu Hita Lamatuan Yesus Kristus, ma susue ma ra neu atahori mamahere' ra. Naa de 16 au nda 'uloe' 'o'e makasi neu Lamatualain sa. 17 Au hule-o'e 'ae, “Ama Bonggi'! Ama', au Lamatua ngga Yesus Kristus Lamatualain na. Ma Ama' mandete-masa'a'. Au 'o'e fo Ama' fee Dula-d'alem neu atahori Efesus ra, fo rahine dala-d'ala ndoo-tetu', ma rahine Ama' noo malole'. 18 Au 'o'e fo Ama' Lamatualain soi rala dud'u'a na ra, ma tao munggurelo rala na ra, fo rahine basa saa fo Ama' helu-fuli nae fee neu se. Au o nau fo ara rahine hata-heto' fo Ama' helu-fuli mae fee neu se. Te hata-heto' naa manaseli' teb'e, na! 19 Au o 'o'e fo Ama' tulun, fo rahine malole selu' Ama' koasa manaselim. Huu Ama' pake koasa naa fo tulun atahori mamahere' ra. 20 Te Lamatualain koasan naa manaseli' teb'e! Ana tao nasod'a bali' Yesus Kristus mia mamaten nendi' koasa naa. Basa ma Lamatualain so'u Yesus Kristus sorga neu, de na'e'endo E sia Lamatualain bob'oa 'onan sia mamana' nenefee had'a-hormat seli.^d 21 Ana sia ata' lena' basa mana sia raefafo' ma sia sorga ena. Huu Ana manaseli' lena' basa koasa, ma mana to'u parenda' ra. Ana to'u koasa manaselin naa, nda 'aka' lele' ia sa. Huu Ana to'u nakandoo losa doo ndu'u-doo na. 22 Lamatualain mana fee basa' e be'utee neu Kristus. Ma Ana o mana so'u Kristus dad'i Malangga fo nauli basa dala' mana nato'u' noo atahori mamahere' ra.^e 23 De mete ma Ana dad'i Langga', na, hita atahori mamahere' ra dad'i 'ona' Eni ao na. Dei fo hita mana tao tab'asa' saa fo Ana tao lele' Ana fe'e mia raefafo'. Huu Eni mana na'ena koasa fo tao basa' e dad'i, tungga Lamatualain hihii-nanau na.”^f

Au hule-o'e fee nggi ta'o naa.