2
Dad'i mesa' nggo 'u'etu' 'ae, au nda dad'i 'eti se'u nggi sa, fo basa atahori ra rala na ra 'afi' ramed'a baraat. 2 Huu, mete ma au tao rala ma ra ramab'era, na, seka mana tao au rala ngga namaho'o fai? 'Aka' hei ena. Te, mete ma lele' ia au 'eti, au tao rala ma ra susa. 3 Naa de au sura' susura fe'e lai-lai' ia 'ae, au nda dad'i 'eti sa. Au fe'e 'uhani mbei fai, naa fo ama urus mala ded'ea ma ra dei. Basa fo, mete ma au dad'i 'eti, na, au nda umed'a baraat huu ded'ea ma ra sa. Te matetun, hei, mana tao rala ngga namaho'o. Au 'uhine basa nggi. Dad'i au 'umuhere, mete ma rala ngga namaho'o, na, hei rala ma ra o ramaho'o 'ona' naa boe. 4 Lele' au sura' susura naa fee nggi lai-lai' ia, au susa ma rala ngga baraat. Au o nggae 'ala seli. Te au sura' ta'o naa, naa fo ama mihine susue ngga neu nggi. Te au nda sura' dala' naa fo tao nggi susa sa.Lilii' hendi atahori salan
5 Sia hei atahori sarani' mana sia naa, hambu atahori sa mana tao atahori hetar rala na ra susa, huu Ana hohongge. Au susa boe huu atahori naa tatao-nono'i na. Tao-tao te, tatao-nono'in naa, mema' nda talalu dai au sa, te nanaen dai neu nggi ruma. 6 Au nda sud'i 'ola' nae' sa. Huu hei hetar 'ai e ena, de ana naloe' ena boe. 7 Dad'i ia naa, hei musi lilii' hendi salan, ma musi 'ola' malolole moo e. Te 'afi' losa mopo nemeheren huu ana susa seli. 8 Naeni de au hule fo ama mi'ib'ue fo mifad'e teb'e-teb'e' neu e mae, hei sue eni boe.
9 Au sura' susura ngga fe'e lai-lai' ia, fo 'ae sob'a hei. Huu au 'ae 'uhine, ama tao matetu', ma 'ena-'ai mana hohongge' a tungga parenda ngga. 10 Mete ma hei nda mbed'a' rala' sa ena, ma lilii' hendi atahori salan, na, au o tungga saa fo ama mi'etu' a ena. Mete ma hambu salan fo au parluu lilii', na, au o lilii' atahori naa salan boe. Au tao ta'o naa sia Kristus matan, fo dad'i conto malole' neu nggi. 11 Huu au nda nau nitu ra malanggan hengge nala nggita sa, do, nasenggi' nggita sa. Hita musi tahine dud'u'a manggenggeo na ra. Dad'i 'afi' miminggoa, e!
Paulus ralan nda fefeet sia Troas sa
12 Dalahulun, lele' au 'uu mia kota Troas, fo 'unori atahori so'al Kristus Hara-lii Malolen, Lamatualain soi dala' fee au sia naa. 13 Te rala ngga nda fefeet sa, huu au nda 'undaa 'oo toronoo ngga Titus sia naa sa, fo ana bisa dui au so'al hei. Boe ma au 'utea atahori mamahere' mana sia Troas ra, de lao 'uu sangga Titus sia profinsi Maked'onia.a
Kristus tataon de ata tasenggi'
14 Mae au sia bee o, au 'o'e makasi nae' mbali Lamatualain. Huu Kristus natati lab'an dala de'ulaka' ra, de nasenggi' se, ma hita o nenepa'a' too E. Naeni de Lamatualain natud'u nakandoo nae, hita ia ra, Eni atahori na. Dad'i lele' hita tafad'e atahori so'al Kristus, naa 'ona' ma'ameni' sa fo basa atahori hae rala. 15-16 Dalahulun, lele' atahori Yahud'i ra tao tutunu-hohotu', foon hene nisi' Lamatualain de tao namaho'o rala na. Hita o 'ona' ma'ameni' sa mana fee nesened'a' neu Lamatualain so'al Kristus. Te soa' neu atahori ruma, hita 'ona' ma'afoo mburu' sa. Te mete ma atahori masod'a na ra ra'ad'oo' mia Lamatualain, rita masod'a ta ra, naa tao se du'a-d'u'a rae, ne'o sira mate, boe ma saranggaa roo Lamatualain. Te soa' neu atahori ruma fai, hita 'ona' ma'ameni' sa. Huu mete ma atahori mana rasod'a ndoo-tetu', rita masod'a ta ra, naa tao se rasaned'a ta'o bee fo Kristus fee masoi-masod'a' neu sira, ma fee se masoi-masod'a' nda mana'etu ma manab'asa' sa. Atahori se bisa tao nala basa dala ia ra? Nda hambu sa, to?
17 Misined'a, te hai ia, nda 'ona' atahori laen mana nanori 'aka' Lamatualain Ded'ea-'o'olan fo sangga hahambu', 'ona' ara danggan rendi' Lamatualain Ded'ea-'o'ola na. Hoko'! Mete ma hai 'ola', basa atahori bisa rita meu-meu rae, hai minori noo rala meumare'. Hai 'o'olam naa, na'oka mia Lamatualain. Ma hai masod'a ma ra nenepa'a' noo Kristus.