3 Au hule-o'e neu Lamatualain, hita Aman, noo Yesus Kristus, hita Lamatua na. Au 'o'e fo ratud'u Sira rala malole na ra neu nggi, fo ama bisa misod'a noo mole-d'ame.

4 Lele' au 'usuned'a nggi, na, au 'ola-'ola' 'oo Lamatualain ngga 'ae, “Makasi naen seli soa' neu atahori Korintus ra nemehere na ra!” Lamatualain natud'u rala malolen neu nggi, huu mimihere mikindoo neu Yesus Kristus, fo Ana haitua nema' a. 5 Ma Ana fee nggi beb'e'i-b'ara'ai' fo bisa milalao basa ue-tataos mata-mata', huu ama nenepa'a' moo Eni ena. Naa tao rala ma ra ramasu'i. Naeni de ama mihine teb'e dala-d'ala manaseli' so'al dala masod'a na. Hei o bub'ulu' dala' saa malolen seli fo nafad'e atahori so'al Kristus. 6 Basa dala' naa ra ratud'u 'oi, dala-d'ala' fo hai mifad'e neu nggi so'al Kristus naa, na'oka nahere' sia rala ma ra ena. Naeni de hei fe'e mimihere mae, dala' naa ra teb'e. 7 De hei simbo basa dala malole' ra ena, fo Lamatualain Dula-d'alen banggi fee neu atahori na ra ena. Nda to'a saa sa boe. De hei nea-nea fain, fo dei fo Lamatualain natud'u relo-relo hita Malanggan Yesus Kristus neu basa atahori. 8 Kristus naa, mana nae tao ma'ad'ere nggi fo ama mi'itataa' mikindoo losa Ana bali' raefafo' ia nema. Noo ta'o naa, hei nda tud'a sa, ma nda hambu atahori bisa ra'atutud'a' nggi sa, ma nda hambu atahori bisa fua sala' neu nggi sa. 9 Hita bisa tamahere Lamatualain Ded'ea-'o'olan, huu Ana 'ola' saa, na, Ana tao e dad'i. Dei fo Ana nau tao dala' ia ra fee neu nggi. Huu Eni mana soi dala' fo hei mihine malolole Anan, naeni hita Malanggan Yesus Kristus.

10 Toronoo susue ngga ra, e! Sia dala' ia, au 'ola' 'endi' hita Malanggan Yesus Kristus nara na. De au hule noo teb'e-teb'e' fo ama miloe' mireresi leo. Ma ama usaha fo misod'a noo rala' esa, 'afi' sea-saranggaa. Ama musi dud'u'a naru' 'ona esa', naa fo ama bisa mihine mae, hei to'u dud'u'at esa' a.

11 Huu hambu atahori mia te'o Kloe ume isi na ra rema rafad'e au rae, hei ruma 'aka' mireresi mikindoo 'a. 12 Au masud ngga ta'o ia: hambu hei ruma mae, “Au ia, Paulus atahori na!” Boe ma hambu ruma rae, “Au ia, Apolos atahori na!” Ma ruma fai 'ola-'ola' rae, “Au ia, tungga to'o Pe'u!”^b Ruma fai rae, “Au ia, rena neu 'a Kristus!”^c

13 Hei dud'u'a ma ra ta'o bee? Kristus bob'onggi na ra nda bisa saranggaa sa. Do, hei du'a mae, au mana mate sia hau nggangge' ata soa' neu nggi, do? Hoko', o! Do, lele' ara sarani nggi, ara 'ingga au nara ngga fo hei maso' dad'i au atahori ngga, do? Hoko', to? 14 Au 'o'e makasi nae' mbali Lamatualain, huu lele' au mia naa 'oo nggi, au nda sarani atahori sa. Au sarani 'aka' 'a'a Krispus noo 'a'a Gayus.^d 15 Noo ta'o naa, nda hambu atahori bisa rae, “Ara sarani au rendi' Paulus naran, de au dad'i Paulus atahori na.” 16 (Ee, au fe'e 'usuned'a ena. Au o sarani atahori ruma mia Stefanus ume isin boe. Te au nda 'usuned'a au sarani atahori laen fai, do hoko' sa.)^e

17 Huu Kristus nda denu au fo 'uu sarani atahori sa. Au ue-tatao huu ngga, naeni 'ufad'e atahori so'al Eni Hara-lii Malole na. Te mete ma au 'ufad'e atahori ta'o naa, na, Ana nda hii au 'ola' 'endi' ded'ea mad'iku' fo 'utud'u mahine ngga sa, do 'utud'u netehuu manaseli' ra. Huu mete ma au 'ola' ta'o naa, na, naa 'ukura' koasa mia dud'uit so'al Kristus mamaten sia hau nggangge' a.

18 Hambu atahori du'a rae, basa dala' fo hita dui so'al Kristus mamaten sia hau nggangge' a, naa ded'ea nggoa'. Te atahori mata' naa, dei fo saranggaa mia Lamatualain. Tao-tao te soa' neu nggita, Kristus mamaten naa, natud'u Lamatualain koasan mana fee masoi-masod'a' neu nggita mia sala-kilu ta ra. 19 Naa 'ona' Lamatualain mana 'ola-'olan, Yesaya, sura' nita nae,

20 Lele ulu' a, mema' Lamatualain 'ola' ta'o naa. Te lele' ia, dad'i ta'o bee ena? Atahori mahine' ra, dad'i ta'o bee? Meser agama ra, dad'i ta'o bee? Boe ma atahori mana soa 'a rad'ed'ea, dad'i ta'o bee? Sob'a rena dei, e! Lamatualain tao se 'ona' atahori nggoa' ena! Ana lea hendi basa dud'u'a mana na'oka sia raefafo' ia, ma tao 'ona' nda na'ena sosoa-ndandaa' saa-saa sa boe.^g

21-22 Lamatualain mahinen naa, manaseli' teb'e. Te 'ona' mae atahori rae sira mahine' re o, dud'u'a na ra mesa' se nda dai fo bisa rahine teb'e Lamatualain sa. Mae 'ona' naa, te Lamatualain soi dala' fee neu atahori nendi' mahine na. Huu lele ulu' a, Ana dud'u'a ena nae, “Mae atahori rae ded'enu ngga ra, atahori nggoa' ra o, te 'ona bee o, Au musi denu atahori fo reu rafad'e se dala ndoo-tetu' so'al Au.” Huu Lamatualain na'etu' nae pake hehelu-fufuli' fo ded'enu na ra rendi, fo atahori bisa ramahere Eni. Ana nau fee masoi-masod'a' neu atahori mia sala-kilu na ra nendi' dala' naa.

Te atahori rae Lamatualain dalan naa, nggoa'. Naeni de ara nda nau taoafi' neu ded'enu na ra sa. Huu atahori Yahud'i ra nau 'a ro'e manad'ad'i manaseli' ra, fo rae rita Lamatualain koasa na. Ma atahori Yunani ra nau 'a rena dala-d'ala mahine' mana maso' dud'u'at, tungga 'a sira dud'u'a na ra. 23 Mae 'ona' naa o, hai mana dad'i Lamatua' ded'enu na ra, 'aka' mii mifad'e atahori mae, “Lamatualain haitua Kristus ena, Atahori fo Ana helu eni' a lele ulu' a, nae haitua nema' a. Basa ma atahori laen ra mbaku risa E mia hau nggangge' ata.” Lele' atahori Yahud'i ra rena dud'uit naa, ara rae timba hendi e, huu tungga sira dud'u'a na ra, Atahori fo Lamatualain nae haitua nema' naa, nda bisa mate 'ona' naa sa. Lele' atahori Yunani ra rena dud'uit naa, ara du'a rae, “Naa dud'ui nggoa manaseli'!” 24 Te hambu atahori fo Lamatualain heheli nala mema' dad'i 'ena na. Sira ruma mia atahori Yahud'i, ma ruma mia atahori nda Yahud'i sa. Tungga sira naa, Kristus mamaten natud'u neu se ena nae, Lamatualain koasan monaen seli, ma mahinen, manaseli' teb'e. 25 Mae atahori rae Lamatualain dalan nggoa', te mahinen fe'e lena' se fai. Boe ma mae sira du'a rae Lamatualain nda na'ena koasa saa sa boe o, te koasan fe'e monaen seli lena' sira boe.

26 Toronoo susue ngga ra, e! Naa fo hei bisa mihine au 'o'ola ngga ia, na, ama misined'a hei tetende-nemberii ma ra lele' Lamatualain pili nala nggi dad'i Eni 'ena na. Tungga atahori nile na, na, sia hei talad'a ma ra nda hambu atahori mahine' hetar sa, nda hambu atahori masi'et hetar sa, ma nda hambu atahori hetar mia tititi-nonosi' mana na'ena nara moko-monaen sa. 27 Te Lamatualain pili nala ma nae pake atahori fo ara 'oi nggoan seli, fo na'amamae' atahori mana nae eni mahine'. Ma Ana pili nae pake atahori fo ara rae nda na'ena koasa saa sa boe, fo na'amamae' atahori mana nae eni na'ena koasa. 28 Boe ma Ana pili nala atahori anad'iki' fo nda na'ena nara moko-monaen sa, ma atahori 'aka' raloe-rad'ae se. Huu Lamatualain nae pake se fo tao atahori mana nae eni manaseli', dad'i 'ona' sira nda ra'ena sosoa-ndandaa' saa sa boe. 29 De mete ma atahori reu randaa roo Lamatualain, na, nda hambu atahori esa sa boe bisa to'o tendan nae, eni manaseli'.

30 Huu Lamatualain mesa' ne mana soi dala' fo ama bisa dad'i Yesus Kristus atahori na. Lamatualain mana tao Yesus dad'i Atahori mana fee mahinen neu nggita. Yesus naa, mana soi dala' fo ata bisa bad'ame bali' too Lamatualain. Yesus naa, mana tao hita bisa tasod'a ndoos ma meumare'. Boe ma Eni mana mbo'i nggita mia sala' ra koasa na. 31 Naa 'ona' nenesura' sia Lamatualain Susura Meumaren 'oi,