Lamatua' atahorin mana nalalao Hehelu-fufuli Feu' a
3
'Afi' du'a mae, hai mulai 'ola' koao, fo so'u-so'u' hai ao ma ra. Hoko', o! Se'utee hai 'ona' atahori laen mana parluu nendi susura nemehere' fee nggi, dei fo fe'e milalao ue-tataos ra, do? Do, hai parluu mo'e susura nemehere' mia nggi fo mendi neu atahori laen? Hoko', to? 2 Huu hai susura nemeherem sia ena. Susura naa, naeni hei ena. Huu hai mihine nae' so'al hei masod'a ma ra. Dala' naa ra nenembed'a' sia hai rala ma ra ena. Basa atahori baca rahine hei masod'a feu ma ra; mia naa ara rahine hai ue-tatao ma ra. 3 Huu meu' ena 'oi, hei 'ona' susura esa fo Kristus sura' ena. Ma na'atoto'u' neu hai. Kristus nda sura' susura naa nendi' tinta sa, te Ana pake Lamatualain Masod'a' a Dula-d'ale Meumare na. Kristus o nda paa Ded'ea-'o'olan neu fatu beb'ela' sa, 'ona' Lamatualain tao fee neu Musa. Te Ana sura' sia hita rala masod'a ta ra.a4 Hai mimihere mae, hai bisa mimihere neu Lamatualain mae, basa dala' ia ra mema' teb'e, huu Kristus mana natud'u ta'o naa ena. 5 Mete ma mia 'aka' hai ao ma ra, na, hai nda mi'ena koasa fo tao saa sa boe. Huu koasa ma hak mana sia hai ia, na'oka sia Lamatualain. 6 Lamatualain naa, mana so'u hai dad'i atahorin mana tao ues dui-b'engga neu atahori so'al Eni Hehelu-fufuli Feu na. Te Eni Hehelu-fufuli Feun, nda so'al atahori tao tungga 'a hohoro-lalane' mata'-mata' sa, te so'al atahori musi nenepa'a' roo Lamatualain Dula-d'ale Meumare na. Mete ma atahori sad'i' a tao tungga-tungga 'a hohoro-lalane' ra, naa 'ona' sira rala na ra mate ena, ma nda hambu masod'a ndoo-tetu', nda manaetu' sa. Te mete ma atahori masod'an nenepa'a' noo Lamatualain Dula-d'alen, eni hambu masod'a ndoo-tetu' naa.b
7 Dalahulun, lele' Lamatualain paa Hohoro-lalanen sia fatu beb'ela' ra, mema' naa manaseli'. Te mae atahori tao tungga basa Hohoro-lalane' ra, ara fe'e saranggaa mia Lamatualain. De lele' Musa simbo nala Hohoro-lalane' ra, matan naronda nala seli. Naeni de atahori Isra'el ra nda bisa mete matan sa. Te doo-d'oo ma, ronda' naa mopo.c 8 Dad'i mete ma mana nenesura' sia fatu dad'i manaseli' 'ona' naa, na, 'ona bee neu saa fo Lamatualain Dula-d'alen mbed'a' sia rala ta ra? Tantu manaseli' lena' fai, to? 9 Naa, Hohoro-lalane' naa natud'u nae, hita musi hambu hukun mate fo saranggaa mia Lamatualain, huu hita nda tao tungga basa Hohoro-lalane' naa ra sa. Mae 'ona' naa o, Hohoro-lalane' naa fe'e manaseli' boe. Te Lamatualain Dula-d'alen manaseli' lena', huu natud'u dala' fo ata malolole bali' too Lamatualain. 10 Dad'i Hohoro-lalane' fo lele ulu' a atahori rae manaseli', 'ale' ia nda manaseli' 'ona' naa sa ena. Huu ia naa hambu manaseli' lena' ena. 11 Naa, Hohoro-lalane' naa ra manaseli na ra, 'ona' ba'i Musa matan, mana naronda lele ulu' a, dei de rondan mopo. Musa noo Hohoro-lalanen fe'e manaseli', te manaseli' lena' fai, naeni manaseli' mana na'atataa' nakandoo nda nama'etu sa.
12 Basa hai mimihere mae, Lamatualain Hehelu-fufuli Feun nae na'atataa' nakandoo, nda nama'etu sa. Naa de hai 'ola' relo-relo, nda bambi-b'ambi sa. 13 Hai nda 'ona' ba'i Musa sa. Huu ana musi bab'ata matan nendi' teme', naa fo atahori Isra'el nda rita rondan mopo ena sa.d 14 Te Lamatualain tao atahori Isra'el ra 'uta na ra mbaka. Huu losa fain ia boe o, mete ma ara baca sia Lamatualain Susura Meumaren Hehelu-fufuli Mbaraan, naa 'ona' teme' sa bab'aa nala langga na ra, de ara nda nau rena sa, ma nda nau rahine sa. Nda hambu atahori laen bisa soi rala na ra, fo rahine. 'Aka' Kristus mesa' ne. 15 Losa lele' ia o, mete ma atahori Yahud'i ra baca ba'i Musa susuran, ara rena, te nda rahine matetu' sa. Huu sira nda rena rendi' rala na ra sa, 'ona' hambu saa esa tatana nala rala na ra.
16 Te mete ma hambu atahori mulai namahere neu hita Lamatuan Yesus Kristus, na, Kristus soi atahori naa ralan fo nahine teb'e-teb'e'. Naa 'ona' nenesura' sia Lamatualain Susura Meumaren rala 'oi, “Ana si'u hendi teme' mana bab'ata nala matan ena.”e 17 Naa, sia Lamatualain Susura Meumaren, lele' ba'i Musa 'ola' nae, “Lamatua'”, eni masud na Lamatualain Dula-d'ale na. Mete ma hita hambu Dula-d'ale' naa, Ana tao nggita nenembo'it. 18 Noo ta'o naa, ana tao nggita dad'i manaseli' tungga-tungga fai, 'ona' Eni boe. Nda bab'ata hita matan sa. Boe ma ata dud'u'a takandoo 'a so'al hita Lamatualain manaselin, huu Dula-d'alen tulu-fali nggita 'ona' naa.