Paulus susuran
fee neu atahori sarani' sia
Galatia
Sod'a-mole'
1
1-2 Sod'a-mole' mia au, Paulus, Lamatua' ana ded'enu na. Au fee susura ia neu toronoo mamahere' mana sia jama'at-jama'at sia profinsi Galatia. Toronoo' mana roo au sia ia ra o, haitua sod'a-mole' fee nggi boe.Au fee nesenened'a' neu nggi 'ae, atahori nda denu au sa, te Ama' Lamatualain noo Yesus Kristus. Yesus Kristus naa, naeni Atahori fo Lamatualain fee nema' a. Kristus mate, te Lamatualain tao nasod'a bali' E. Ma Sira mana denu au fo 'uu 'ufad'e atahori ra so'al Hara-lii Malole' ia.
3 Au hule-o'e neu Lamatualain, naeni hita aman, noo Yesus Kristus, hita Malangga na. Au 'o'e fo ratud'u rala malole na ra neu nggi, fo misod'a noo mole-d'ame. 4 Kristus mate fo soi-tefa hendi sala ta ra, ma mbo'i nggita mia de'ulaka' mana sia raefafo' ia. Basa naa ra, tungga Ama' Lamatualain hihii-nanau na. 5 Huu naa de, hita musi koa-kio E takandoo 'a! Teb'e ta'o naa!
Paulus namanasa huu atahori Galatia ra rasad'ea hela nenori matetu' a ena
6 Toronoo ngga ra, e! Au nda 'ita' 'ae dud'u'a ma ra ta'o bee sa boe! Lamatualain pili nala nggi ena, huu Ana nau fo ama mihine Eni rala dud'u'a malole na. Te ta'o bee de misid'ea tute 'a fo mii mimihere neu nenori' laen 7 nda matetu' sa? Fe'esa'an, au 'unori matetu' so'al Yesus Kristus Hara-lii Malole na. Te ia naa mana peko-leleko' ra rema 'esu-b'ab'ali' Hara-lii Malole' naa, losa tao hei bingun.
8 Besa-b'esa! Dei fo Lamatualain sumba-ndoon atahori mana nema nanori Hara-lii Malole' fo nda 'ona' hai minori' naa sa. Mae atahori naa mia hita, do Lamatualain aten esa mia sorga o, dei fo eni hambu sumba-ndoon boe! 9 Hai mifad'e dala' ia eni' a dalahulun ena. Te au 'ae fee nesenened'a selu' fai, ta'o ia: mete ma hambu atahori nema nanori laen mia Hara-lii Malole' fo dalahulun hei simbo' naa, na, dei fo Lamatualain o sumba-ndoon e boe.
10 Au 'umburani 'ola' ta'o naa, huu au 'ae tao Lamatualain ralan namaho'o, te nda atahori ralan sa. Hei du'a mae au 'ae sangga rala' 'oo atahori, do? Hoko'! Te mete ma au tao ta'o naa, na, au nda 'undaa dad'i Kristus atahori ded'enun sa.
Paulus dui selu dalan ta'o bee de eni dad'i Lamatua' Yesus ded'enun
11 Toronoo ngga ra, e! Au 'ae 'ufad'e relo-relo ta'o ia, Hara-lii Malole' fo au 'unori neu nggi naa, atahori nda ander-ander sa. 12 Au nda simbo naa mia atahori sa, ma atahori nda ranori naa neu au sa boe. Te Yesus Kristus mana nafad'e sosoan neu au.
13 Tantu hei rena basa dud'uit so'al au dala masod'a dalahulu ngga, lele' au fe'e tungga agama Yahud'i, to? Lele' naa au tao Lamatua' atahori na ra doid'oso rita' mamate na ra, fo 'ae tao 'ulutu se.a 14 Lele' naa boe o, rala ngga ma'ahee 'unori agama Yahud'i dalan, lena' atahori Yahud'i laen fo ded'ena' roo au' ra. Ma au o, manggate lena' tao tungga basa bei-ba'i' ra 'ad'at na noo agama hohoro-lalane na.b
15-16 Mae ta'o naa o, Lamatualain na'etu' basa fo fee au 'uhine Ana na. Mama ngga nda fe'e bonggi au sa, te Ana pili nala au ena, huu Ana nae natud'u rala malolen neu au. Ana o denu au, 'uu 'unori atahori nda Yahud'i ra sa boe. Lele' Ana denu au ta'o naa, au nda 'uu 'o'e dud'u'at mia atahori laen sa.c 17 Au o nda 'uu 'undaa 'oo atahori lasi-lasi Kristen ra, fo mana dad'i Yesus ded'enun ena sia Yerusalem. Te au lao tute' rae Arab 'uu. Basa ma, au bali' 'isi' kota Damsik fai.
18 Too telu boe ma, au 'uu 'undaa 'oo Petrusd sia Yerusalem fo 'ae sangga dud'ui feu' mia e. Boe ma au leo mia naa fai sanahulu lima.e
19 Lele' naa, au 'undaa 'oo Lamatua' Yesus 'od'i bonggin, naran Yakob'is. Te au nda 'undaa 'oo Lamatua' ded'enun laen ra sa. 'Aka' ru'a se. 20 Saa fo au sura' ia, mema' teb'e ta'o naa! Au nda leleko' sa! Lamatualain bub'ulu'!
21 Basa naa ma, au lao 'isi' profinsi Siria noo profinsi Kilikia 'uu. 22 Lele' naa, Kristus atahorin mana sia Yud'ea ra nda fe'e rahine au sa. 23 Ara rena 'a hara' rae, “Atahori fo fe'esa'an mana tao doid'oso hita' a, ia naa nanori Kristus Hara-lii Malole na. Naa te fe'esa'an ana mana sob'a tao nalutu nggita.” 24 Basa se rena rala au 'umuhere neu Lamatua' Yesus Kristus ena, ma ara so'u rananaru Lamatualain.