Hambu atahori sia hei nggarei ma na'amina' ina'
5
Au rena 'oi, hambu atahori esa sia hei nggarei ma na'amina' ina'. Tao-tao te, eni tao' naa, de'ulakan lena' atahori nda fe'e nahine Lamatualain sa. Huu eni 'aka' sunggu noo ina mbala na!a 2 Te hei koao ma ra dei, 'ona' hei atahori sarani ma ra malole' re! Matetun, hei musi mae ma susa. Atahori mana 'ona' naa, musi 'oi hendi e na'ad'od'oo'!3 Mae hita ta'ad'oo' esa noo esa o, au rala ngga sia hei e. Dad'i au 'u'etu' atahori de'ulaka' naa ded'ean, 'ona' au sia naa mema' ena. 4 Au 'u'ena hak fo 'u'etu' ta'o naa, huu Yesus dad'i hita Malanggan, ma au ia, Eni ded'enu na. De ama musi 'endo' mi'ib'ue fo mi'etu' ded'eat naa, mendi' Malangga nara na. Ma au rala' esa 'oo nggi boe. 5 Boe ma ama musi mendi atahori naa nisi' nitu ra malanggan, hela e doo-d'oo fo atahori naa nggari hendi dala-d'ala de'ulaka' mana sia ralan dei. Ma dei fo hita Malanggan bali' nema, na, Ana bisa fee masoi-masod'a' neu atahori naa, sala-kilu na ra.
6 Nda malole' sa mete ma hei 'ola' nae'! 'Afi' lilii' mae, hita seseb'o' bib'it roti mbei 'a, fo tao basa roti a reis. Bib'it roti naa, 'ona' atahori naa de'ulaka na ra. De mete ma hela e 'aka' tao de'ulaka' sia talad'a ma ra, dei fo atahori sarani' laen ra o tao tungga de'ulaka' boe.b 7 Mbuu hendi atahori de'ulaka' naa mia hei nggarei ma, 'ona' ma'ahulun atahori Yahud'i ra nggari hendi basa bib'it roti mia ume na ra fo sad'ia raa fefeta Paska. Noo ta'o naa, hei fe'e bisa dad'i bali' 'ona' atahori fo ralan nda hambu de'ulaka' sa. Hei musi dad'i 'ona' naa boe. Lele ulu' a, ara hala bib'i lombo ana' nda ma sala' sa dad'i tutunu-hohotu Paska. Ma'ab'uin ma ara tao risa Lamatualain Atahori Meumaren, de dad'i tutunu-hohotu' mana tao nameu rala ta ra.c 8 Lele ulu' a, atahori Yahud'i ra raa fefeta Paska rendi' roti lepa-nggees nda mana tao bib'it sa. Lele' ia, hita 'ona' roti nda mana tao bib'it sa. Naeni de tanea ao ta ra fo 'afi' tao dala-d'ala de'ulaka' ra, ma 'afi' tao nemera' atahori laen rala na ra. Ata musi 'ola' ndoo-tetu' takandoo 'a. Noo ta'o naa, atahori mete na rae, hita tao basa-b'asa' e tungga rala malole ta ra.d
9 Ma'ahulun au parnaa sura' susura 'ae, “'Afi' mi'ib'ue moo atahori mana hohongge' ra.” 10 Au nda 'u'ena masud, fo ama 'afi' mi'ib'ue moo basa atahori sia raefafo' ia fo nda mana taoafi' neu Lamatualain sa, do atahori mana bare', do atahori mana peko-leleko' mana laka-ese nala atahori sud'i 'a saa na ra, do mana songgo ra. Huu mete ma ta'o naa, na, hei musi mi'id'od'oo' ao ma ra mia basa atahori mana sia raefafo' ia. 11 Te lele' ia, au 'o'ola ngga naa, naeni: ama 'afi' mi'ib'ue moo atahori mana nae eni atahori sarani', tao-tao te ana hohongge do, mana bare' do, mana songgo do, mana ma'amuti atahori naran do, mana ninu mafu kale-kale do, mana pepeko-leleko' nae ha'i nala atahori sud'i 'a saa na. Ata 'afi' ta'ab'ue too atahori mata' naa ra. 'Afi' 'endo' taa too se fai!
12 Hei mi'ena hak fo nile atahori sarani' ra masod'a na ra. Te au nda 'u'ena hak fo 'u'etu' ded'eat fee neu atahori nda mana ramahere Lamatualain sa. 13 Huu dei fo Mesa' ne mana na'etu' ded'eat fee neu atahori nda mana ramahere neu E sa. Te ama 'afi' lilii' Lamatualain Susura Meumaren sura' 'oi, “Atahori mana nafad'e nae eni Lamatualain atahorin, te 'aka' tao dala-d'ala de'ulaka', na, mbuu hendi e leo!”e