3 Anneen on nane, gubernur antoti Nai Yesus am nak, “Namneo, aa oo? Ho le' iij atoni Yahudis sin kesel ee, oo?”

Es on naan Nai Yesus natael am nak, “Namneo. On le' ho muguab ee naan.”

4 Anpalekas nalali Je on nane, gubernur na'aiti matan ma naguab noi anaak lasi palsait Yahudi sin anakaf sin ma too mfaun sin. Lalit naguab am nak, “On ii! Au ka 'tae 'iit fa Atonij iij In sanat ba-baun amsa'!”

5 Mes sin naprotes am nak, “Kahaf, aam! Atonij le' iij, annao nbi meel am meel aah, ma nanoni', in nakos-kosu' toog ee he anlaban aplenat. In anmo'e taisibug, anmulai na'ko propinsi Galilea tal antee koot Yerusalem ii.”

6 Anneen on nane, gubernur antoti sin am nak, “Kalu on nane, in le' iij, atoni Galileas, ai'?”

Es on naan sin nataen am nak, “Namneo. In na'ko Galilea!” 7 Nahine on nane, gubernur anlelu sin he neki Nai Yesus an'ali kesel Herodes, le' annaa' aplenat et propinsi Galilea. Tabug naan, in anbi koot Yerusalem. 8 On nane, kesel Herodes naan anneen nalali benog anmatoom nok Nai Yesus, ma in anlomi he niit Nai Yesus alaloog gen amsa'. In nafneek piut-piut he nabe'i niit Nai Yesus naklila' naan lasi sanmakat mese ai' nuug. Es on naan tabug sin neki Nai Yesus noi nael ee te, in anmaliin. 9 Es on naan In antoti lasij huma'-huma' noi Nai Yesus, mes ka tiit fa haan taes. 10 Nai Herodes naguab nok Nai Yesus fe', mes anaak lasi palsait Yahudi sin anakaf sin ma kulu agaam sin, anmulai ntu'matan anteni Nai Yesus nok In sanat sin huma'-huma'. 11 Lalit kesel Herodes nok in solalus sin anmulai nakle'at-nasi'ug ma na'akan Nai Yesus. Es on naan sin napakeb Ee soo balu mnanu alekot mese on le' kesel in soo balug, ma sin nakle'at Ee piut. Lalit sin nlelu ma neki Je anfani noi gubernur Pilatus. 12 Nahunut, gubernur ma kesel Herodes anmamusun. Mes anmulai nenog naan, sin nua sin anmasoob lekon.

13 Lalit gubernur Pilatus no'en anaak lasi palsait Yahudi sin anakaf sin, atoni mnasi halat Yahudi abjaan sin, ma too mfaun sin, he nabguan. Lalit in natoon lasij in atfekan. 14 In naguab am nak, “Hi meki Nai Yesus neem noi kau, ma misuub Ee mmak In nakosu too sin he anlaban aplenat pah Roma. Au palekas ulali Je namnutu anbi hi maatm een, mes au ka 'tae 'iit fa In sanat mese amsa'. 15 Kesel Herodes anpalekas nalali Je, mes ka ntae niit fa in sanat mese amsa'. Es on nane, in anlelu tuaf he neki Je anfani neem noi kau. Atoni le' iij, ka nsaan fa saa'-saa', es on naan au ka ube'i ufeek fa he 'hukum umatel. 16 Es on naan au ufeek 'ak on ii: au uplenat he mtepog, lalit au ufetin.”

17-18 Annenan on nane, sin aal sin anmulai ankua' een ma anhunun een am nak, “Ka nabe'i fa! Mumatel! Mufetin kai nai Barabas.” [Sin ankua' een on naan, natuin tonan-tonan, atoni Yahudis sin tabug fesek Paska te, gubernur nafetin atoni hukum tuaf mese, natuin atoni Yahudis sin alomik een.]^a 19 (Nai Barabas le' iij, antaam ume buij natuin in es anpes-pese toog, alaban anaa' aplenat pah Roma anbi koot Yerusalem, ma in anlolo atonij amsa'.)

20 Mes gubernur he nafetin Nai Yesus. Es on naan in antoti nafani' too mfaun sin nane mnak, “On mee, kalu au ufetin 'oi Nai Yesus le' iij?”

21 Mes sin ala sin ankua' een ok-oke' am nak, “Ka nabe'i fa! Amkuus mu'peti Ee anbi hau nehe! Amkuus mu'peti Ee anbi hau nehe!”

22 Mes gubernur naan annaben, nane ka namneo fa, lalit in antoti anteni anfani ha'el tenu nak, “Nansaa' am es au lo he 'kuus u'peti' atonij iij on le' naan? In sanat ee saa'? Au ka 'tae 'iit fa lasij mese he 'hukum umate atonij ii. Es on naan au he lelu he antepo Goe, lalit nafetin.”

23 Mes too mfaun sin ala sin ankua' een nahelan antenin, he naseke' gubernur he ankuus na'peti' Nai Yesus. Es on naan gubernur ka nabe'i an'eek naan fa lee, 24 es on nane in nafeek natuin too mfaun een sin lomik een. 25 Lalit in nafetin nai Barabas, le' alaban aplenat, ma anlolo atonij. Mes in nana'at Nai Yesus noi sin, he sin anmo'e Le natuin sin alomik een kuuk.

26 Lalit solalus Romas sin anheel neki Nai Yesus anpoi na'ko koot Yerusalem. Anbi lalan atnanan, sin nateef atonij mese na'ko koot Kirene. In fe' he antaam noi koot. In kanan, nai Simon. Sin naseke' nai Simon he ansimo Nai Yesus In hau nehe, lalit nasael ee ma annao natuin anbi In kotin.

27 Nenog naan, toog namfau nfiin neman ma nail Nai Yesus. Bifeel abjaan ankaen nse'-se'ul een noi Ne. 28 Anneen sin ankaen on nane, Nai Yesus anike sin am naguab am nak, “Koi, bifeen Yerusalem. Naik amkaen Kau. Leko nnesi hi mkaen hi tuam een nane kiim, ma hi aanh een kiim. 29 Fun nmiu ma nsina' te, susal anaek ee antaam neem, tal antee atonij naguab am nak, ‘Bifeel le' n'ua leko le'uf, es le' bifee ao-'temef, ma ka nasusu niit fa li'ana mee'.’ 30 Tabug susal anaek naan antaam neem, mansian sin anhamu'i jok matani', tal antee sin antotin am nak, ‘Leko nnesi anu'af een nathono he ankuub niis kit nai!’ Sin naguab een amsa' am nak, ‘Atha'mui' jok on le' iij, naleko nnesi nu'af een nathono he ankuub naneku kai nai!’^b 31 Kalu atonij anmo'e hamu'it on le' iij noi tuaf le' ka nsaan niit fa, saa' anteni noi atoni amaufinut?”^c

32 Tabug solalus sin neki Nai Yesus, sin anheel neki atoni amaufinut tuaf nuug he nhukum sin nabgua nok Nai Yesus. 33 Sin anteen balel mese, in kanan ‘Balel Nui-Nakaf’. Es on naan sin ankuus Nai Yesus ma atoni nuug een naan, es-es ate anbi in hau nehe'. Lalit sin nahakeb hau nehen naan. Sin nakfilit atoni amaufinut es anbi Nai Yesus in abnapan ane'ug, es anteni anbi In abnapan aliij. [Tabug naan, Nai Yesus an'onen am nak, “Aam! Naik mumnau mteni atonin le' iij sin saant een, natuin sin ka nahinen fa saa' le' sin anmo'e sin.”]^d Lalit solalus een anhelan suul ana' he napala' Nai Yesus In bale pakel.^e

35 Too mfaun sin neman ma nail anbin balel naan. Atoni Yahudis sin anaakf een neman ma nakle'at-nasi'ug Nai Yesus am nak, “In ansoi naan kuun tuaf abjaan sin, mes In ka nabe'i nsoi naan fa In tuan. Kalu In le' iij ee, Kristus namneo-namneo, Atonij le' Uisnenog anpili nani Je, maut he In ansanu neem kuun na'ko hau nehe le' iij ee nai.”^f

36 Solalus een naan nakle'at Ee msa'. Sin na'inut Ee lalu maha'ij,^g 37 ma ankua' nakle'at-nasi'ug Ee mnak, “Kalu ho namneo-namneo atoni Yahudis sin kesel, amsoi maan om nai!” 38 Sin anluul anbin haug pisa mese nak,

Es on naan sin ankuus hau pisa' naan anbi Nai Yesus In hau nehe fafon, anhaumaak nai Yesus In anakan, he anjali lasij noi saa' es In napeni hukum naan.

39 Atoni amaufinut tuaf mese le' ankuus nakfilit ee anbi Nai Yesus In abnapan, nakle'at ma nasi'uk nok am nak, “Ho Kristus Ko, namneo, ai'? Kalu on nane, msoi maan kit ala kit nai!”

40 Mes amaufinut tuaf mese nakain ee mnak, “Hoi! Ho ka mumtausan fa Uisnenog, ka? Ho mupeni hukum amaten on le' In amsa'. 41 Hit nua kit tapeni hukum namnees nok hit maufinug. Mes Atonij le' iij ka nmaufinu kuun fa saa'-saa'.” 42 Es on naan in naguab anteni mnak, “Koi, Yesus! Kalu Ho mtaam moi Ho sonaf, mumnau kau!”

43 Nai Yesus natael am nak, “Au 'ba'an 'ani ko! Nenog iij, ho mtaam am'ani sonaf neno tunan mok Kau msa'.”

44-45 Tabug naan, manas namtetu nfiin. Mes manas naan ka ntana' fa pah-pinan. Lalit mesi'okan an'amu naan balel naan tal antee leku tenu manas anmaab. Anbi Ume Onen Uuf anmu'i naan tai anini nesug anaek mese nakfili he n'eek Uisnenog In Ke'an Aknino' anneis-neis. Nok askeken, tai anini nesug naan natpisu nbati nuug.^h

46 Anbi balel ‘Nui-Nakaf’ naan, Nai Yesus ankua' am nak, “Aam! Tabug iij, Au una'at au smanak 'oi Ho 'nimam.” In naguab nalali on nane, In asnasan natfeek.ⁱ

47 Anaak solalus Romas tuaf mese anhake npaumak-maak anbi Nai Yesus In hau nehe le unun. Tabug in niit Nai Yesus In amaten nane, in nanaeb nalatan Uisnenog am nak, “Haa! Atonij le' iij namneo-namneo neek amneot, oo!”^j

48 Tabug too mfaun sin le' anhaken anbin naan, niit Nai Yesus In a'maten on nane, sin antoof ok, ma anbelok anfanin nok neek susal. 49 Mes Nai Yesus Inin, anhaken anbin aloog, ma nail In a'maten naan. Bifeen le' natuin Nai Yesus na'kon Galilea tal anteen Yerusalem, anhaken anbi nane msa'.^k

50-51 Tabug Nai Yesus anmate on nane, anmu'i atonij mese nami lalan he nasanut Nai Yesus In ta'un amates naan na'ko hau nehe, he ansuub Ee nok alekot. Atonij naan, kanan nai Yusuf, na'ko koot Arimatea. In nekan naleek, namneo, ma anmo'e lasi alekot namfau. In npao msa' he Uisnenog naklila' am nak, In annaa' aplenat. In tuaf mese na'ko tuaf-tuaf le' nafeek lasi palsait Yahudi. Mes in ka nlomi natuin fa sin lasi fekat he anhukum namate Nai Yesus. 52 Natuin in he nasanut Nai Yesus In ta'un amates nane na'ko hau nehe, es on naan in annao nbaisenu gubernur Pilatus, he antoti palmisi he in n'ulus amates naan. 53 Napeni meinuan on nane, in annao nasanut Nai Yesus In ta'un amates naan. Lalit in n'amug lek-leek nok tai ma'upa'. Lalit annao neki Je ma nataam Ee noi opu fatug, le' atoni fe' anpahat nalalij. Opu fatug naan, ka npake niit fa fe'. 54 Nai Yesus In amaten naan nateef nok neno nima'. Tabug nai Yusuf sin ansuub nalali Je naan, manas anmaab len. Kalu manas anmouf gue, atoni Yahudis sin neno onen antaam een.

55 Bifeen le' neman nabguan nok Nai Yesus na'kon Galilea naan, sin annaon natuin nai Yusuf he nitan nak, in antao amates naan et opug meel. 56 Sin nail nalek-leko' opug naan in balan. Lalit sin anbelok anfanin ma naloitn een een atuna' ma miin fomeni'. Tabug manas anmouf, sin nasnasan na'kon mepug, natuin atoni Yahudis sin atolan neno onen. Sin anpaon tabug neno onen naan anfini, na' sin he annaon nkiku een atuna' noi Nai Yesus In aon-ta'un amates.^l