Sin neki Usif Yesus he na'eku nok gubernur Pilatus
(Nai Mateos 27:1-2, 11-14; Nai Lukas 23:1-5; Nai Yohanis 18:28-38)
15
Nesi noi anmiu, afeek lasi sin, sin anneek-mesen he namate Nai Yesus. Es on naan sin anfutu nekij he na'eku nok gubernur Pilatus.
Nai Markus 15:1-32
2 Tabug sin anteen gubernur, in antoti Nai Yesus am nak, “On mee? Namneo ho le' ii atoni Yahudis sin Kesel, ai'?”
Nai Yesus natael am nak, “Namneo! Ama' gubernur ho guabam naan, namneo.”
3 Lalit anaak lasi palsait Yahudi sin anakaf sin naguab een nok gubernur am nak, “Atonij ii In sanat namfau le'uf!” Ma sin anso'i In sanat sin mese-mese. 4 Lalit gubernur naan antoti nteni Nai Yesus am nak, “Ho ka mneen fa sin aguab een nane, kah? Sin nasaeb ko sanat namfau. Iti ho mutae miit fe'!”
5 Mes Nai Yesus ka natae fa fefa' mese amsa', tal antee gubernur ansanmaak.
Gubernur Pilatus nafeek hukum amaten noi Usif Yesus
(Nai Mateos 27:15-26; Nai Lukas 23:13-25; Nai Yohanis 18:39-19:16)
6 Tonan-tonan kalu atoni Yahudis sin anmo'en fesek Paska, bijaas too mfaun sin anbeti naan atoni buij tuaf mese, he gubernur nafetin na'ko ume buij. 7 Tabug naan, anmu'i atoni buij tuaf mese, kanan nai Barabas. Nahunu sin nhekel natuin in anlaban anaa' aplenat pah Roma, ma in nlolo atonij amsa'. 8 Natuin fesek Paska naan anpaumaak een, es on naa atoni amfaut sin annaon noi gubernur Pilatus ma ankolelon am nak, “Ama' gubernur! Neno naek Paska anpaumaak een. Kalu lekog mufetin atoni buij tuaf mese, on le' tonan-tonan.”
9 Lalit gubernur natae sin am nak, “On nane, au he ufetin ki sekog? Kalu au ufetin ki atoni Yahudis sin Kesel le' ii, hi mlomi, ka?” 10 Gubernur naguab on naan, natuin in amneot, in nahine nalali nak, anaak lasi palsait Yahudi sin anakaf sin neki Nai Yesus noi ne, natuin sin neek een namenan anmaten noi Nai Yesus.
11 Mes ale' anaak lasi palsait Yahudi sin anakaf sin anmo'e a'koke ma naseke too mfaun sin he sin antoti noi gubernur am nak, “Hai ka mlomi maan Je fa! Mufetin kai nai Barabas.”
12 Lalit gubernur antoti nteni' sin am nak, “Kalu on nane, au he 'mo'e saa' 'noi Nai Yesus, le' sin anteek nanij nak ‘atoni Yahudis sin Kesel’ iij?”
13 Es on naan sin anhunun ok-oke' am nak, “Mumatel! Amkuus mupeti noi hau nehe!”
14 Lalit gubernur antoti mnak, “In saant ee saa'? Au 'palekas ulali, mes au ka upeni fa sanat mese msa'!”
Mes sin ala sin anhunun nahelan anteni' am nak, “Mumatel! Amkuus Ee nai noi hau nehe!”
15 Natuin gubernur he nhaliin too mfaun sin, sin neek een, es on naan in nafetin nai Barabas natuin sin alomik een. Lalit in naplenat atoni apaot sin he sin annao antepoa Nai Yesus anpaken aguel. Antepo nalali, solalus sin neki Nai Yesus anpoi annaon he nkuus namate anbi hau nehe'.
Solalus sin antepo nakteni Usif Yesus
(Nai Mateos 27:27-31; Nai Yohanis 19:2-3)
16 Lalit solalus sin anheel neki Nai Yesus noi sin benteng in kintal.b Anbi naan, sin no'en nabguab solalus pukan mese, of oni' tuaf natun niim. 17 Ma sin napakeb Nai Yesus neki soo balu mnanu' le' in masan amtaas ungu, on le' kesel sin bijaas anpakel. Lalit sin naiti nono katila' ma sin anlii' anmo'e atobe mese. Ma sin annene' nataam 'tobe katila' naan noi Nai Yesus In anakan, he sin nala'un on le' he nasaeb 'pilug noi kesel fe'ug.
18 Lalit sin naluli' ma nabesan, lalit nakle'at-nasi'uk am nak, “Tabe, Aam Usif Yahudi!” 19 Ma sin naluli' namoen anbi Nai Yesus In matan. Ma sin anpulan hapel tenij-tenij noi In human. Lalit sin ntepog tenij-tenij nekin haug. 20 Sin nakle'at ma nasi'uk nalali on nane, sin ankasu' nani soo balu mnanu' naan. Ma sin napakeb nafani' In pakel. Lalit sin neki anpoi na'ko koot Yerusalem, he ankuus na'peti anbi hau nehe tal anmaat.
Sin ankuus napeti' Usif Yesus anbi hau nehe
(Nai Mateos 27:32-44; Nai Lukas 23:26-43; Nai Yohanis 19:17-27)
21 Tabug sin anpoin annaon na'ko Yerusalem, sin na'ekun nok atonij mese anbi lalan. Atonij naan na'ko koot Kirene, kanan nai Simon. In le' naan, nai Aleksander ma nai Rufus sin amaf. In fe' he antaam noi koot Yerusalem, solalus sin anheel naan ma naseke' he nasae Nai Yesus In hau nehe'.c 22 Sin anheel neki Nai Yesus antee balel mese, kanan Golgota. (In oten ‘balel nui nakaf’.) 23 Anbi naan, sin he na'inut Nai Yesus neki lalu maha'ij maselo malog, he In nabe'i nalan menas. Mes In ka nlomi fa he ninu. 24-25 Lalit sin ankuus nanehet Nai Yesus anbi hau nehe'. Ma sin nahakeb hau nehe naan, of oni' fe' leku seo. Lalit solalus sin anhelan lot he napala' sekog es le' napeni Nai Yesus In pakel.d 26 Lalit sin anluul anbi abena pisa' mese am nak:
“Atonij ii, atoni Yahudis sin Kesel”
Lalit sin ankuus abena pisa' naan, anbi hau nehe nesi fafon, anhaumaak Nai Yesus In anakan. Sin anpake lasi malula naan he anhukum Ee. 27 Anbi naan, sin ankuus namate abulalut tuaf nuug amsa'. Es anbi Nai Yesus In abnapan ane'ug, ma es anteni anbi alii. 28 [Nok lasij naan sin natuin saa' le' malula nani anbi Uisnenog In Sula Knino' le' nak, “Sin anmo'el paap mese on le' atoni amo'e amle'ut.”]e f
29 Ale' too mfaun sin le' annaon natuin lalan naan, niit Nai Yesus naboni' anbi hau nehe'. Es on naan sin nki'un een ma nakle'at-nasi'uk Nai Yesus am nak, “Hoi! Ho es le' mak, Ho he ampukai mule'un Uisnenog In Ume Onen Uuf, lalit mufena' mufani' anbi nenog teen.g 30 Mautu he Ho msanu mu'ko hau nehe naan, he mufetin Ho aom nane nai! Kalu Ho mmo'e on nane, na' hai mpalsai mak Ho le' ii Uisnenog In Anah.”
31 Anaak lasi palsait Yahudi sin anakaf sin nok kulu agama sin nakle'at-nasi'uk Nai Yesus amsa' am nak, “In ansoi nafetin tuaf abjaan sin, mes In ka nabe'i fa he nafetin naan fa In aon. 32 In anteek In aon nak ‘Kristus’, Atonij le' Uisnenog anba'an nanij na'ko unu'. Abjaan nak, In le' naan atoni Israel sin Kesel. Kalu namneo on nane, mautu he In nsanu na'ko hau nehe he hai miit. Lalit hai ampalsai moi Ne.”
Tuaf nuug sin le' napeti' sin nabguan nok Nai Yesus anbi sin hau nehe mese-mese, sin nakle'at-nasi'uk Nai Yesus amsa'.
Usif Yesus anmate
(Nai Mateos 27:45-56; Nai Lukas 23:44-49; Nai Yohanis 19:28-30)
33 Lalit mesi'okan an'amu nani balel naan, na'ko manas namtetu tal antee leku tenu nenog anmaab.
Nai Markus 15:33-47
34 Tabug leku tenu on nane, Nai Yesus anhunun neki aguab Aram am nak, “Eloi! Eloi! Lema sabaktani?” (Le' neki hit aguab nak, “Koi, Au Usi'! Koi, Au Uisnenog! Nansaa' am es Ho musaitan Kau on le' ii?”)h
35 Tuaf fauk le' anhaumakan anbi naan, sin anneen Nai Yesus In hanan naan. Es on naan sin naguab een am nak, “Hoi! Hi mneen fe'! In nkua' baba nai Elia, Uisnenog In mafefa knino' unu'.” 36 Lalit tuaf mese naen naiti ani'-te'i meto' ma ankeep anbi lalu maha'ij. Lalit anpunak anbi haug mese in panan, ma nalamib Nai Yesus he anmusij. Lalit atonij naan naguab am nak, “Ampao he hit tail tiit! Naik-naika' baba nai Elia neem ma nasanut na'ko hau nehe'.”i
37 Lalit Nai Yesus anhunun anteni', ma In anmaat.
38 Anbi Ume Onen Uuf anmu'i naan tais anini nesu naek mese, nakfili' he nakini Uisnenog In Ke'an Aknino'. Tabug Nai Yesus asnasan natfeek, tais anini nesu anaek naan natpiis anbati nuug na'ko fafon tal antee munin.j
39 Anbi Golgota, anaak solalus mese anhake nhaumaak Nai Yesus In hau nehe'. Tabug in niit Nai Yesus In amaten, in naskeek. Lalit in naguab am nak, “Ai ka! Atonij ii namneo-namneo Uisnenog in Anah!”
40-41 Anmu'i naan bifeel fauk le' napene Nai Yesus In amaten na'ko aloog. Sin es le' nahunut antuthae Nai Yesus nok In asimo anoni' sin anbi pah Galilea. Sin es le' bi Salome, bi Maria na'ko kuan Makdala, nok bi Maria (le' nai Yakobus munif nok nai Yosesk sin inaf), ma bifeel namfau abjaan anteni' le' neem nabguan nok Nai Yesus noi Yerusalem.l
Sin nataam Usif Yesus In ta'un noi opu fatug
(Nai Mateos 27:57-61; Nai Lukas 23:50-56; Nai Yohanis 19:38-42)
42-43 Lalit atonij mese nami lalan he nasanut Nai Yesus In aon ta'un amates na'ko hau nehe'. Atonij naan kanan nai Yusuf. In na'ko koot Arimatea. In le' naan tuaf mese na'ko pukan afeek lasi palsait Yahudi. In nekan naleek. In anpao plenat Uisnenog le' he neem.
Nai Yesus anmaat nok neno nima'. Anmiu na'eku nok atoni Yahudis sin neno onen. Es on nane, anbi neno nima' naan, nai Yusuf he nasanut nahunun Nai Yesus In aon. Nai Yusuf anhatani in nekan, ma annao anbaisenu gubernur Pilatus he nasanut Nai Yesus In aon ta'un naan. 44 Tabug gubernur anneen nai Yusuf in haan totis naan, in ansanmaak. Es on naan in naguab am nak, “Ka ka ka! Atonij naan anmate labah! Anbi au tenab au 'ak oni' ka fe'.”
Lalit in anlelu tuaf he no'en anaak solalus. Tabug in neem antee, gubernur antoti mnak, “On mee? Nai Yesus anmate nalaal je, ai' kaah fe'?”
45 Anaak solalus naan natael am nak, “Namneo! In anmaat leh.” Tabug gubernur anneen on nane, in anfee meinuan noi nai Yusuf he annao nasanut Nai Yesus In aon-ta'un naan.
46 Lalit nai Yusuf annao noi Golgota. Ma in nasanut Nai Yesus In aon na'ko hau nehe'. In an'amu aon-ta'un naan neki tais fe'ug le' ma'upa'. Tabug naan, sin fe' anpahat nalali opu fatug mese anbi nu'af fatug. Lalit sin nataam aon-ta'un naan noi opu fatug. Lalit sin antita' fatu bena anaek mese, he na'eek namate opu fatug naan. Lalit nai Yusuf sin anfanin.
47 Tabug naan, bi Maria na'ko Makdala, ma bi Maria (nai Yoses in inaf), sin nokan anbi nane msa'. Sin nua sin nail nalek-leko' balel le' sin nabela' Nai Yesus In aon-ta'un naan.