Usif Yesus anmoni nfaan!
(Nai Mateos 28:1-10; Nai Markus 16:1-8; Nai Yohanis 20:1-10)
24
Neno kleij nok-nok ana', bifeen naan nekin miin fomeni' ma atuna' le' sin nanutu nalali sin naan, ma annaon an'anin Nai Yesus In naten. 2 Tabug sin anteen nael ee te, sin nail niit fatu naek le' antobe opu fatug naan, natnani nalaal je noi nine'. 3 Es on naan sin antaam anfinin noin opu fatug naan, mes Nai Yesus In ta'un amates ka mamnita' fa anbi naan. 4 Es on naan sin namkakan. Nok askeken, atonij nuug anpaken bale nalim-liim, neman anhaken anpaumaak sin. 5 Bifeen naan namtaun nmaten, lalit sin nlituun ma naluli' een anteen naijaan. Es on naan atoni nuug een naan antoti sin am nak, “Nansaa' am es hi iim mami amonit anbi amates in balan? 6 Nai Yesus ka et fa iij ee lee! In anmoni anfaan jen. Hi of oni' mniken mani le' In naguab niit ki tabug hi fe' ambi Galilea, ai'? 7 In naguab nani nak, sin of nasosa' Mansian Namneo-Namneo le' iij noi amaufinut een sin aniimk een. Lalit sin ankuus namate Le anbi hau nehe'. Mes anmiu, In anmoni nfaan.”a8 Annenan on nane, na' sin namnau niit Nai Yesus In aguaban unu' naan. 9 Es on naan sin anbelok nfanin labah, he natonan lasin le' iij ok-oke' noi Nai Yesus In asimo anoni' sin tuaf bo'es am mese ma tuaf-tuaf abjaan anteni le' natuin Nai Yesus. 10 (Bifeen le' anbin opu fatug naan, es le': nai Yakobus in inaf, es le' bi Maria; bi Maria na'ko kuan Makdala; bi Yohana; ma bifeel abjaan antein. Sin ala sin le' naan es le' annaon ma natu'in lasin le' iij ok-oke' noi Nai Yesus In haef een.)
11 Mes tabug asimo anoni' sin annenan tu'in naan, sin nateenb een am nak, sin namoen.
12 Mes nai Petrus anpoi ma naen an'ani opug naan. Antee nael ee te, in nkiso ntaam, mes in niit ahaa tais le' an'aumu Nai Yesus In ta'un amates naan anmees. Es on naan in anbelok anfani ma nnao naten-tenab am nak, “On meel es le' ii?”b
Asimo anoni' tuaf nuug nateef nok Usif Yesus anbi lalan Emaus
13 Nenog nane msa', Nai Yesus in asimo anoni' tuaf nuug annaon noi kuan mese, kanan, Emaus. In aloon ee of oni' kilog bo'es am mese na'ko koot Yerusalem.c 14 Sin annaon naguab een anmatoom lasij le' Nai Yesus In amaten. 15 Nok askeken, Nai Yesus nekin On anpaumak-maak sin, ma nnao nabgua nok sin. 16 Mes sin ka nahine Le fa, natuin Uisnenog anmo'e sin he sin naik nahine Nai Yesus. 17 Es on naan Nai Yesus antoti sin am nak, “Hoi! Hi nua ki miguab saa'?”
Annenan on nane, sin nua sin nasnasan. Sin huumk een on le' ansusan nmaten. 18 Lalit tuaf es, kanan nai Klopas antotij Ee mnak, “Ho on le' atoni fe'ug le' ka muhine fa saa'-saa' le' anjali anbi Yerusalem. Koijoo, lasi iij fe', fe'-fe'u.”
19 Es on naan Nai Yesus antoti sin am nak, “Sa'an?”
Sin nataen am nak, “Nai Yesus na'ko Nasaret naan! In namneo-namneo Uisnenog In mafefa knino'. Uisnenog anfee Ne kuasat ma In nmo'e lasi sanmakat huma'-huma'. In nanoni' atonij amsa' mahinen kah. Too mfaun sin anmalinan Ee. Ma Uisnenog amsa' anmalinan Ee.
20 On nane, mes hai anaak lasi palsait Yahudi sin anakaf sin ma atoni mnasi halat sin anheke Le. Lalit nana'at Ee anbi gubernur he anhukum namatel Ee. Es on naan sin ankuus namatel Le anbi hau nehe'. 21 Nahunut, hai mifneek Ee mmak, In le' naan, Kristus le' neem he nsoi napoitan hai pah iij na'ko anaa' aplenat pah Roma le' antali hae kai. Mes nenog naan, neno nima, sin anlolog.
22 Tabug iij hai mfaikali'ug amteni. Lelon na bifee nuug neman ma natonan am nak, nok-nok ana' ee sin annaon anbin opug. 23 Mes sin nak, Nai Yesus In ta'un amates naan namneek. Lalit sin niit Uisnenog In ahaket nuug na'kon sonaf neno tunan, le' natonan am nak, Nai Yesus anmoni nfaan! 24 Hai mneen on nane, hai amnono tuaf fauk naenan n'anin opug naan. Es on naan sin niit paap mese on le' bifeen naan. Sin ka niit fa Nai Yesus In ta'un amates naan.”
25 Sin nua sin anpe'on nalalin on nane, Nai Yesus nak sin am nak, “Hi olem een kah.! Nansaa' am es hi ka mpalsai fa saa'-saa' le' Uisnenog In mafefa knino' een natoon nani sin neno unu'! 26 Sin anluul am nak, Kristus naan lo he napeni mane'at on le' naan, na' In ansimo tola ma kuasat matani'.” 27 Es on naan Nai Yesus nanoni' sin ale' saa'-saa' een le' Uisnenog In mafefa knino' sin anluul sin anmatoom nok Kristus, anmulai na'ko baba nai Musa in lulat sin, tal antee mafefa' abjaan sin lulat een amsa'.
28 Tabug sin he anteen Emaus, Nai Yesus anmoo'l on on le' he anfiin je. 29 Mes sin nua sin naseon Ee mnak, “Aam! Amtuup mok kai faij iij, natuin manas he anmouf gue.” Es on naan Nai Yesus anlomi ma antaam nok sin noin umel.
30 Tabug sin antokon he anbukaen, Nai Yesus naiti utunu' afgua' mese. Lalit In an'onen antoti makasi noi Uisnenog, ma In an'ebi utunu' naan. Tabug In nnona utunu' nane noi sin nua sin, 31 na' sin nahinen nak, Atonij le' naan, Nai Yesus. Mes nok askeken, In namneku na'ko sin maatk een! 32 Es on naan sin nua sin naguab een am nak, “Hoi! Tabug hit atneen In naguab mafefa knino' een sin lulat een lelon na, hit tnaben hit nekak on le' napeni ha'tanis.”
33 Tabug nane msa', sin nua sin anfani nanin noin Yerusalem. Sin na'eku nok Nai Yesus In asimo anoni' sin tuaf bo'es am mese, ma tuaf abjaan antenin nabguan anbin naan. 34 Es on naan asimo anoni' sin naan natonan tuaf nuug een nane mnak, “Namneo! Usif Yesus anmoni nfaan! Lelon In nakliil On noi nai Petrus.”d
35 Lalit tuaf nuug een naan anpe'on sin saa'-saa' le' sin annaben niit sin anbin lalan, tal antee sin nahine Nai Yesus, tabug In an'ebi utunu'.
Usif Yesus nakliil On noi asimo anoni' sin
(Nai Mateos 28:16-20; Nai Markus 16:14-18; Nai Yohanis 20:19-23; Haef een sin Tu'in 1:6-8)
36 Tabug sin anpe'on on nane fe', nok askeken, Nai Yesus anhake nbi sin atnaank een. In naseon sin am nak, “Saloom!”
37 Mes sin naskeken ma namtaun, sin nak oni' kutuluu'.
38 Mes Nai Yesus naguab am nak, “Nansaa' am es hi mimtau on le' iij? Hi ka mpalsai fa mmak Au 'moni 'fani, oo? 39 Mail kiim Au 'nimak ma Au haek. Au es le' ii. Ampaumaak he mpoe Kau! Maut he hi mpalsai mmak, Au le' iij, ka kutuluu' ee fa. Fun kutuluu' ee ka nmu'i fa aof, mes hi ok-oke' mail miit Au aok ee!”
40 Tabug In naguab fe', In naklila' sin In fakel le' anbin In animan sin ma In haen een. 41 Sin anmalinan nmaten, natuin Nai Yesus anmoni nfaan je. Aal sin namkakan, natuin sin ka nabe'i nahine nalek-leko' fa, noi saa' am es anjali on le' naan. Es on naan Nai Yesus antoti sin am nak, “Hi meku saa' ambi iij?” 42 Es on naan sin anfee Ne iik tunu' tuuk ana mese. 43 Nai Yesus ansimo iik tunu' naan, lalit in nekug anbi sin maatk een.
44 Es on naan In naguab am nak, “On mee? Hi mimnau tabug Au ubgua 'ok ki fe', ai'? Au utoon ki tabug nane 'ak, ale' saa'-saa' le' Uisnenog In mafefa knino' sin anluul sin anmatoom nok Kau naan, lo he anjalin. Es le': na'ko baba nai Musa, na'ko mafefa knino' abjaan sin, ma na'ko suul Siit Pules-Bo'is sin.”
45 Lalit In natoon noi sin namnuut, he sin nahine namneo-namneo Sula Knino' In otek een. 46 In naguab anteni am nak, “Uisnenog In mafefa knino' sin anlulan nalalin am nak, Kristus le' Uisnenog anleek nani Je naan, lo he napeni mane'at huma'-huma', lalit In anmaat. Mes of anmiu, In anmoni nfaan. Sin anluul nani sin eeh! 47 Tabug iij, Au 'fee ki kuasat he hi meki Tu'in Alekot iij noi ale' uuf ma pah, anmulai na'ko koot Yerusalem le' ii. Mitonan sin am mak, atonij le' anmanaku' noi in ansaan ma anbelok anfani noi Uisnenog, Uisnenog of annose nani in sanat sin ok-oke'. 48 Hi lo he mjali saksiij he mitu'in mak, Au upeni mane'at, lalit Au 'maat, mes amoni 'faan. 49 Au of a'sonu' ki Asmana Knino' le' Au Ama' anpaa nalali Je. Mes hi lo he ampao mbi koot Yerusalem le' iij, tal antee hi msimo kuasat na'ko sonaf neno tunan.”e
Usif Yesus na'aiti On noi sonaf neno tunan
50 Tabug mese, Nai Yesus nok sin anpoin na'kon koot in nanan. Tabug sin anpaumaak kuan Betania, In na'aiti In animan ma naguab anfeen sin tetus.f 51 In naguab anfeen sin tetus fe' on nane, In na'aiti On ansae noi sonaf neno tunan. 52 Nail niit on nane, sin nlituun ma nabesan noin Ee. Lalit sin anfanin noin koot Yerusalem nok neek malinat anaek. 53 Nenog-nenog, sin nabguan anbin Ume Onen Uuf, he ansiin ma anpules nanaeb Uisnenog.
Aam Teofilus! Au tu'in le' iij, utu'ab sin anbin le' iij nai.
Tabe,
na'ko au, nai Lukas kau.