Sin naguab een on naan, natuin anmiu ntein atoni Yahudis sin nateef nok neno naek ‘Paska’, ma ‘Fesek Utunu' ka Maselo Lalu Taif fa’. Anbin nenon le' naan, sin fesek een he namnau nafani' tabug ahunut, le' Uisnenog napoitan sin baabf een na'ko pah Masir.^a

3 Anbi kuan Betania, anmu'i atonij mese, kanan nai Simon. Nahunu atoni anmainisin, natuin in nameen atho'al-atlaku'. Mes tabug ii, in naleko nalaal je.

Es on naan tabug neno naek ka ntee fa fe', Nai Yesus sin annaon ma anbukaen anbi nai Simon in umel. Tabug sin anbukaen, bifeel es neem na'eku nok Nai Yesus. In annaa' neki boti fatug mese, le' antisi nok miin foo meni' le' ma'upa'.^b Lalit bifeel naan an'ipu anpolin botil naan in neon. Ma in nalolib babaun-babaun noi Nai Yesus In anakan he nfani taka nak in ntola Nai Yesus.

4 Mes anbi naan, anmu'i atonij fauk le' anbukaen nabguan nokan amsa'. Tabug sin niit bifeel naan anmo'e on le' naan, sin namaunun ma naguab een nanaeb ok am nak, “Huu! Bifee sa'an es le' ii, in anpolin nale'u miin foo meni' ma'upa' le' ii!? 5 Leko nnesi in nasosa' mina' le' naan! Lalit in anbati loit een naan noi amamu'it sin! Natuin miin foo meni' naan in upan paap mese nok tuaf mese in seeb anbi toon es.” Lalit sin nakain ee nok matani'.

6 Mes Nai Yesus natae sin am nak, “Hi naik misusab bifeel le' iij! Moki msuu'! Au 'maliin, natuin in n'oop nalali miin foo meni' noi Au aok. 7 Amamu'it sin nok ki nenog-nenog. Es on naan hi ambaban sin leka haa. Mes ka loog fa Au ka ubgua 'teni' fa 'ok ki.^c 8 Au 'monik ii ka loog fa len. Ma bifeel le' nalolib mina' noi Kau, in npaloli nani Au aok on le' in nkiku' nani atuna' noi Au aok-ta'uk. 9 Mimnau milek-leko'! Uisnenog In Tu'in Alekot of nanaob on anbi mee-mee anbi pah-pinan iij, ma tuaf of natu'in ma natoon anmatoom nok bifeel iij in amo'en alekot. Maut he ale' mansian een namnaug.”

10 Lalit anmu'i tuaf mese na'ko asimo anoni' tuaf bo'es am nuug, kanan nai Yudas Iskariot. In anpoi annao ma nami anaak lasi palsait Yahudi sin anakaf sin, he nasosa' Nai Yesus noi sin. Tabug in na'eku nok sin, in natoon in salit. 11 Tabug anakaf sin anneen nai Yudas in aguaban naan, sin namlilen anmaten. Ma sin anpaa' ee mnak, “Kalu ho he musosa' Nai Yesus noi kai, hai of ambaen ko.” Lalit nai Yudas anpoi ma anmulai nami lalan he nana'at Nai Yesus noi sin.

12 Nenog naan, neno ahunut na'ko neno naek atoni Yahudis sin. Anbi nenog naan, sin bijaas antunun utunu' le' ka npake fa lalu taif ma sin anlolon 'bibi-kase msa'. Es on naan Nai Yesus In asimo anoni' sin neman ma antoti mnak, “Aam! Nenog ii, hit neno naek Paska. Es on naan Ho lomim he hai amnao miloitan balel fesek Paska anbi mee?”

13 Lalit Nai Yesus anlelu In asimo anoni' tuaf nuug am nak, “Hi amnao mihunu nai moi koot. Anbi naan, of hi mi'eku mok atonij mese le' nasae oel anbi kusi aan es. Hi amnao mituin ee. 14 Kalu in annao antaam noi umel mee, hi amtaam mituin ee. Lalit hi mitoon noi ume tuaf naan am mak, ‘Aam! Hai Kulug antoti balel he anmo'e fesek Paska nok In asimo anoni' sin.’ 15 Lalit atoni naan of annone ki noi ke'an meinuan mese, anbi ume ktuta' naan in tunan. In naloitan nalali ke'an naan. Es on naan hi nua ki miloitan bukael anbi naan.”

16 Lalit sin nua sin annaon noin koot. Anbi naan, sin na'ekun nok ale' saa'-saa' le' Nai Yesus natonan nalali sin. Es on naan sin nabalab he Nai Yesus sin anbukaen fesek Paska anbi naan. Lalit sin nua sin annao naskau Nai Yesus nok In asimo anoni' abjaan.

17 Tabug manas he anmouf, Nai Yesus nok In asimo anoni' bo'es am nuug annaon antaman noin balel naan.

18 Anbi balel naan, sin antokon ma anbukaen nabguan. Tabug sin anbukaen, Nai Yesus naguab am nak, “Hi mneen! Anmu'i tuaf mese na'ko ki le' of nasosa' Kau noi atonij abjaan.”^d

19 Tabug sin annenan on nane, sin neek een natselan. Lalit sin es nok es antoti Nai Yesus am nak, “Aam! Le' Ho mteek ee naan, ka au fa, oo?”

20 Nai Yesus natael am nak, “Tuaf le' nakepa' utunu' nok Kau anbi 'pik-oef ii, of in es le' nasosa' Kau. 21 Mimnau, oo! Au, Mansian Namneo-Namneo le' ii, lo he 'maat, on le' malula nalali anbi Uisnenog In Sula Knino'. Es on naan ampaant om! Atonij le' nasosa' Kau naan, of in nsutai kuun in amle'ut! Leko nnesi bati in inaf naik nahonis nanij.”

22 Tabug sin anbukaen, Nai Yesus naiti naan utunu' afgua mese, ma antoti makasi noi Uisnenog. Lalit In an'ebi utunu' naan pisa'-pisa', ma anfee sin noi In asimo anoni' sin. Lalit In naguab am nak, “Utunu' le' iij, Au aok. Maiti ma mbukae nai.”

23 Lalit In naiti naan a'klaas amninut le' matua' tua min-kase. Ma In antoti makasi noi Uisnenog. Lalit In annona' aklaas naan noi In asimo anoni' sin, he sin ninun. 24 Ma In naguab am nak, “Tua min-kase iij, Au naa'. In of nat'oop he ansoi nafetin too mfaun. Naa' le' iij, anjali taka le' namnauba' kit nak, saa' le' Uisnenog anba'an nalali sin naan, anjalin es le' ii. Maiti ma minu nai.^e 25 Amneen milek-leko'! Anmulai faij ii, Au ka nuug fa he 'inu 'teni' tua min-kase on le' ii. Tal Au 'ok Au Ama' amtuun Om ma miplenat mibgua anbi sonaf neno tunan, na' Au 'inu 'tein.”

26 Lalit sin ansii siit mese, he npules ma nbo'is Uisnenog. Lalit sin anpoin tabug faij, ma annaon noi anu'af Saitun.

27 Tabug sin annaon nabguan naan, Nai Yesus natoon nani sin am nak, “Faij ii, hi ala ki of maen misaitan Kau. Fun malula nalali anbi Uisnenog In Sula Knino' nak,

28 Namneo, Au lo he 'maat. Mes kalu Au 'moni 'faan, Au of a'nao uhunun ki 'oi propinsi Galilea.”^g

29 Lalit nai Petrus anprotes am nak, “Aam! Maski sin naen nasaitan Ko, mes au ka nuug fa he 'aen usaitan Ko!”

30 Nai Yesus natael am nak, “Pe'u! Naat mumnau! Faij ii, nahunu na'ko manug ankokle'o hana' nuug, ho mutotan mulali Kau hael tenu mak, ho ka muhine Kau fa!”

31 Mes nai Petrus hanan ansae mnak, “Kahaf, Aam! Kalu Ho maat, au 'mate 'ok Ko. Au ka nuug fa he 'aen usaitan Ko!”

Nai Petrus in aon-abjaan sin es-es naguab on nane msa'.

32 Lalit Nai Yesus nok sin annaon nfinin ma anteen po'an mese et anu'af Saitun, kanan ‘Getsemani’. Es on naan Nai Yesus naguab noi sin am nak, “Amtoko mpao Kau anbi le' ii. Au 'nao he 'onen 'oi le' nae.”

33 Ma In no'en neki nai Petrus, nai Yakobus, ma nai Yohanis, he nnao nabgua nokan. Anmulai na'ko tabug naan, In nekan ansuus ma ka ntainine' fa. 34 In naguab noi sin am nak, “Au nekak ansuus anmaat! Au 'naben Au he 'maat leh. Hi amtoko ma mpao mbi le' ii.”

35-36 Lalit In annao nteni' babaun, lalit anli'tuu ma an'onen am nak, “Ama' amanekat! Kalu Ho mloom Au naik a'sutai mane'at naan tal antee he 'mate on le' ii. Au uhine ulali 'ak, ka tiit tani fa saa' le' Ho ka mube'i fa he ammo'e maan. Es on naan kalu lekog Ho maiti muloob lasi hamu'it le' iij na'ko Kau. Mes naik mutuin Au lomik; maut nai he mutuin Ho lomim.”

37 Lalit In anfani noi In asimo anoni' tuaf tenu sin naan, mes sin antuup anfinin. Es on naan In npoo' nafena' sin, ma naguab noi nai Petrus am nak, “Hoi! Pe'u!^h Ho mtuup kuum, oo? Au 'bi nael ee labah, mes hi he mpao babaun amsa', hi ka mibe'i fa! 38 Mimiu maatm een naan fe'. Lalit amfeen he ampao mok Kau! Hi nekam sin anlomin he hi mmo'e lasi alekot, mes hi aom sin naklati'. Es on naan leko nnesi hi m'onen, he kalu asu'at neem naik niis ki.”ⁱ

39 Lalit Nai Yesus annao n'onen haef es antein. In ntoti nteni he Uisnenog naiti naloob lasi hamu'it le' naan na'ko In aon. 40 Lalit In anfani neem noi In asimo anoni' tuaf tenu naan. Mes sin ntuup anfinin, fun sin maatk een anmafeen le'uf. Es on naan In npoo' nafena' anteni sin. Mes sin ka nahinen fa, he natae Nai Yesus nak saa'.

41 Lalit Nai Yesus annao nasaitan sin he an'onen hae' tenu. Lalit In anfani neem, ma anpoo' nafena' anteni sin. In naguab am nak, “Ka ka ka! Hi fe' amtuup fe', oo? Noog aah nai! Amfeen nai! Fun atonij le' nasosa' Kau, Mansian Namneo-Namneo le' ii, anpaumaak een. Tabug ii, sin he anheke ma annona' Kau noi atoni amo'e sanat sin. 42 Amfeen nai ma mail nai! Atonij le' nasosa' Kau, neem een. Iim he tnao ta'eku tok sin!”

43 Tabug Nai Yesus naguab on nane fe', nok askeken nai Yudas nok atonij namfau sin neman. Sin neki suni tukaf nok hau tukaf, he anheke Nai Yesus. Sin anmo'e lasij naan, fun sin napenin aplenat na'ko atoni Yahudis sin anakaf sin. Sin ala sin es le' anaak lasi palsait Yahudi sin anakaf sin, kulu agama sin, ma mnasi halat Yahudi sin. 44 Nai Yudas natoon nani sin am nak, “Mail milek-leko'! Au 'neek sekog, amhekel nai! In es le' hi m'etug!”

45 Es on naan tabug nai Yudas nok sin anteen balel naan, in neem anhake anbi Nai Yesus In matan. Ma in naseon Ee mnak, “Aam Kulug!” Lalit nai Yudas anhoo ma anneek Nai Yesus. 46 Lalit too mfaun sin neman he anheke Nai Yesus.

47 Mes Nai Yesus In asimo anoni' tuaf mese anhosu in benas, ma ansapi nanofu atonij mese in luken noon. Atoni luke' papa' naan, anaak lasi palsait Yahudi sin anakaf anaek inij. 48 Lalit Nai Yesus naguab nok tuaf een le' he anhekel nane mnak, “On mee? Hi mak Au le' iij, atoni abulalut Kau, oo? Es manum hi iim he mheke Kau meki suni' ma hau tukaf? 49 Nenog-nenog Au unoni' ki anbi Uisnenog In Ume Onen Uuf, mes ka tiit fa tuaf mese le' neem he anheke Kau. Iim he amheke Kau nai! Fun lasij naan malula nalali na'ko unu' anbi Uisnenog In Sula Knino'.”^j

50 Nai Yesus In asimo anoni' sin namtau nmaten. Es on naan sin naen nasaitan Nai Yesus anmees.

51 Anbi naan, anmu'i atoni munif mese, annao natuin Nai Yesus. In tainuus beti' tukaf mese. Atoni mfaun sin he anheek le msa', 52 mes sin annaa' naan noi in betik. Es on naan in naen moons aah, natuin in namtau nmaat.

53 Lalit sin neki Nai Yesus annao noi anaak lasi palsait Yahudi sin anakaf anaet ee in umel. Anbi naan, kase naek sin nabguan nalalin. Sin ala sin es le' anaak lasi palsait Yahudi sin anakaf sin, kulu agama sin, ma atoni mnasi halat Yahudi sin.

54 Tabug sin anheke neki Nai Yesus, nai Petrus nakolo ma natuin Nai Yesus, tal antee anakaf lasi palsait Yahudi sin anaak anaet in umel. In antaam anbi umel naan in kintal, ma in antoko nok alaal aij sin.

55 Anbi umel naan in nanan, anaak lasi palsait Yahudi sin anakaf sin naguab een nok afeek lasi palsait sin. Sin ala sin an'etun bukti he nasaan Nai Yesus, fun sin he nhukum namatel. Mes sin ka napenin fa bukti saa'-saa'. 56 Lalit sin no'en saksii namfau, he nanofu Nai Yesus. Mes sin aguab een nasulin es nok es.

57 Lalit anmu'i saksiij abjaan le' anfeen anhaken ma naguab een puta-kliun am nak, 58 “Hai mneen atonij ii naguab am nak, ‘Au of useel Ume Onen Uuf, le' nafena neki 'nimaf mansian. Ma nenog tenu anteen Au ufena ufani' Umel naan, mes ka 'pake fa 'nimaf mansian.”’^k 59 Mes sin aguab een nasulin es nok es.

60 Lalit anaak lasi palsait Yahudi sin anakaf anaek anfeen anhake anbi ale' afeek lasij naan sin maatk een. In antoti Nai Yesus am nak, “Too mfaun ankalakan Ko. Mes nansaa' am es Ho m'elah kuum?”

61 Mes Nai Yesus ka natae fa fefa' mese msa'. Es on naan anaak lasi palsait Yahudi sin anakaf anaet antotij am nak, “Ho mutoon miit! In amneot Ho le' iij, namneo-namneo Kristus, Uisnenog In Anah le' In nba'an nanij na'ko un-unu'?”

62 Nai Yesus natael am nak, “Namneo! In es le' Au le' ii. Hi ala ki of miit Kau, Mansian Namneo-Namneo le' iij, a'toko 'bi sonaf neno tunan, anbi Uisnenog In abnapan ane'ug. Uisnenog anmu'i kuasat manenu' anneis! Au of 'okan amnaa' aplenat mibgua. Namuni Au 'sanu 'uum anbi nopel u'ko sonaf neno tunan.”^l

63 Anneen Nai Yesus In aguaban naan anaak lasi palsait Yahudi sin anakaf anaet natoo' anfiin, tal antee in anpisu naklati' in soo balu amnanu'. Lalit in ankua' ma naguab noi ale' afeek lasi sin am nak, “Hit naik at'etu atteni' saksiij! 64 Hi mneen meki hi lukem een kiim. In es nekin on naguab on naan. In naiti In aon anjali Uisnenog in Anah. In naguab nale'uf Uisnenog! Tatuin hit atolan lasi palsait, kalu tuaf mese nanees on nok Uisnenog, in lo he anmaat! Es on naan tabug ii, hi he mifeek mak saa'?”^m

Es on naan sin nafekan ok-oke' mnak, “Namneo, atonij ii ansaan! Es on naan lo he tasesuk ma athukum tamatel.”

65 Lalit tuaf fauk neiki ntaman ma nakinu Nai Yesus. Sin n'amu naan In maatn een, lalit sin antufug. Es on naan sin antoti mnak, “Iti Ho amteek miit, sekog es le' antufu ko?” Lalit sin no'en apao Ume Onen Uuf sin, he neem ma neki Nai Yesus. Tabug sin nekij annao, sin npaas nakteni'.

66-67 Tabug naan, nai Petrus antoko anbi kintal fe'. Lalit ate bifeel tuaf mese na'ko anaak lasi palsait Yahudi sin anakaf anaet, neem niit nai Petrus anlaal aij. In nail nalek-leko' nai Petrus in human, ma in naguab am nak, “Lelon ho mubgua mok Nai Yesus, atoni Nasaret naan. Tebe, oo?”

68 Mes nai Petrus natael am nak, “Kahaf! Nansaa' am es ho mtoti kau on naan? Au ka uhiin Le fa!” Lalit nai Petrus anpoi ma anhake anbi eno' 'tama'. [Tabug naan amsa' manug ankoklee'.]ⁿ

69 Lalit atel naan niit anteni' nai Petrus. Ma in natonan atoni amfaut anbi nane mnak, “In le' ii, tuaf mese na'ko sin amsa'.”

70 Mes nai Petrus anprotes am nak, “Ai' ho mneek maun! Au ka uhiin Le fa!”

Ka loog fa te, tuaf mese antein, le' anhake anbi naan naguab anteni noi' nai Petrus am nak, “Hoi! Ho he mputa-kliun mak ho ka mubgua mok sin fa! Hi ala ki atonij Galilea!”

71 Mes nai Petrus ansulan matani' mnak, “Au 'suup! Au ka uhine fa atonij naan.”

72 Tabug in naguab on nane, manug ankoklee' ha'el nuug. Es on naan nai Petrus namnau niit Nai Yesus In aguaban tabu afinit nak, “Nahunu na'ko manug ankokle'o ha'el nuug, ho mutotan Kau hael teen gue.”

Tabug namnau niit on nane, nai Petrus ankae anme'-me'ul.