A'bib-kase le' namneek
(Nai Mateos 18:12-14)
15
Tabug naan, akoni noni ponij sin ma atoni ka mapake sin neman piut-piut noi Nai Yesus he niit ma annenan kuuk Ee. Mes atoni Yahudis sin naan sin, atoni amle'ut. 2 Nail on nane, atoni Farisis ma kulu agama Yahudi sin namunu' een am nak, “Tpuih! Atoni le' iij namnono nok atoni amle'ut een. Antoko ma neku nok sin antenin!”a3 Anneen on nane, Nai Yesus natu'in sin anpake aguab mapolin am nak, 4 “Kalu anmu'i tuaf mese na'ko ki, in anmu'i abibi-kase natun mese. Es namneku. Tabug iij, in he nmo'e on mee? In lo annao nasaitan bo' seo mseo nuug anbi bale taimamut mese, lalit annao nami le' amnekuut naan leka' niit. 5 Kalu in napeni abibi-kase amnekut naan, in nasae nekij nok neek malinat. 6 Antee umel, in no'en in nonot sin ma natoon noi sin am nak, ‘Hoi! Hi iim he mmalin mok kau fe'! Fun au upeni ufani' au abibi-kase amnekut naan.’ 7 Anbi sonaf neno tunan on nane msa'. Kalu anmu'i tuaf asanat es napiis, lalit anbelok anfani noi Uisnenog, sonaf neno tunan in nanan anmalinan ok-oke'. Sin anmalinan nneis, natuin tuaf mese le' anfani neem noi Uisnenog, na'ko tuaf bo' seo mseo le' anmonin nok amneot ma ka nseken fa.”
Loi muti' le' namneek
8 Lalit Nai Yesus natu'in anpake aguab mapolin mese anteni mnak, “Anmu'i bifee mnasi es anmu'i loi muti' afgua' bo'es.b In ka nahine naan fa, afgua' es namneek. Es on naan tabug iij, in he nmo'e on mee? In lo he annao notu pakug, lalit antana' nalek-leko' anbi meel am meel, ma ansapu umel naan muti-muti', he nami loit naan lek-leek. 9 Tabug in niit nafani' loit nane, in no'en abiten in umel tukan, lalit natoon noi sin am nak, ‘Au hone ki, he hi iim mimlile mok kau fe'! Fun au 'iit ufani' au loi muti amnekut naan!’ 10 Anbi sonaf neno tunan on nane msa'. Kalu anmu'i tuaf asanat mese le' napiis, lalit anbelok anfani noi Uisnenog, ahaket sonaf neno tunan sin ok-oke' anmalinan nmaten.”
Li'ana' le' namneek
11 Lalit Nai Yesus anluut In tu'in anpake aguab mapolin mese anteni mnak, “Anmu'i anaef es nok in aan monel tuaf nuug. 12 Tabug mese, aheti susug nak in amaf ee mnak, ‘Aam honi'! Ambati mfee kau au pusaak sin tabug iij nai!’ Es on naan In amaf anbati in amaus een noin in anah sin nua sin. 13 Ka loog fa te, aheti susug nasosa' in paan. Lalit in n'amu in pakel een, ma annao kuun noi pah alaloog. Anbi balel naan in anpa-polin ahaa loit ma nmoni nok malinat le' ka mapanat fa. 14 Tabug in nalali loit on nane, pah le' naan amnahas ee ntaman sin, tal antee in amonin anjali atoni kasian. 15 Es on naan in annao nami mepug. Atonij mese anbi pah le' naan ansimog he nmeep. Atoni naan anlulug ee mepug mese, le' he anhao fafij. 16 Natuin li'ana' iij namnaah ka nabe'i fa lee, es on naan in nekan he neku fafi haot naan. Fun ka tiit fa tuaf he anfee ne he neek.
17 In natenab alaloog nuu-mneem am nak, ‘Anbi au ama' in umel, ameput sin ok-oke', sin nahan tal namsenan. Es on nane, au es iij ma umnaah amaat. 18 Leko nnesi, au belok afani 'oi au ama' nae. Lalit utoon ne m'ak, “Aam honi'! Au usanab ulali 'oi Uisnenog ma 'oi ko, aam honi'. 19 Au ka pantas fa he 'jali ho aan honi' ee lee. Maski ho msimo kau 'jali atel anbi ho umel iij amsa', naleek!’”
20 Natenab nalali on nane, in anfeen ma annao nfani noi in amaf ee umel. Tabug in anbi aloog fe', mes anaef ee niit nalalij leh, es on naan nekan anmouf ma nkasian. In anpoi na'ko umel nanan, ma naen ansenug. Lalit anaef ee nhoog ma anneek.
21 Es on naan li'ana' naan naguab noi in amaf ee mnak, ‘Aam honi'! Au usanab anaek noi Uisnenog ma noi ko. Au ka pantas fa he 'jali ho aan honi' ee lee.’
22 Mes in amaf naplenat in ameput sin am nak, ‘Hoi! Labah! Maiti meki maan soo balu mnanu fe'ug mese he msoo-balub. Mipakeb ee kalelij ma mipakeb ee peen hae noi in haen een lek-leek. 23 Amnao mheel bijae keso anaet es ma amlolog, he hit atmo'e fesek anaek-anaek. 24 Natuin au anah le' iij on le' anmaat leh, mes tabug iij anmoni nfaan je. In namneek, mes tabug iij au upeni ufani'.’ Naguab nalali on nane, sin anmulai anfesek een nabguan, ma sin anmalinan nmaten.
25 Tabug naan, aan mone unu' ka nbi fa umel, in anbi lelel. Tabug in anfani neem na'ko lelel, in anbi aloog fe', in anneen alekut ansiin ma nabso'an. 26 In neem antee, in no'en atel mese, lalit antotij ee mnak, ‘Hoi! Hi mmaliin ambi fesek iij noi saa'?’
27 Atel naan natael am nak, ‘Usi', ho oli' anfani neem. Es on naan ama' anleek kai he hai mlolo bijael he mmo'e fesek iij, fun in anah anfani neem nok ao-mina'.’
28 Anneen on nane, aan unu' naan natoo'. In ka nlomi nteni fa he ntaam noi umel. Es on naan in amaf annao nfulij he ntaam.
29 Mes in namaunun am nak, ‘Aam honi'! Ho mutenab miit! Alaloog le' iij, au mepu on le' atel 'oi ko. Au ka 'tanhai 'iit fa ho atolan mese amsa'. Mes ho ka mlolo miit fa abibi aan es, he au mmo'e fesek ma mmaline 'ok au aok-abjaan sin. 30 Mes ho aan neka' le' iij, annao ma npolin loit luum-luum, nmapaisa' alafgua-lafug nok bifeel akaket een. Tabug iij, in anfani neem on iij te, ho mlolo bijae keso naek ma mmo'e fesek anaek noi ne.’
31 Mes in amaf natael am nak, ‘Honi! Amneen mulek-leko', hee! Ho mok kau 'alaloog ge. Ale' saa'-saa' le' ho ama' kau, a'mu'i sin, naan ho nuug. 32 Mes tabug iij, hit lo he tfesek he tmaliin, natuin ho oli', fua' mese. Nahunut, in on le' anmaat, mes tabug iij in anmoni nfaan. In namneek, mes tabug iij, tiit tafani ee.’”