4 Mes sin anfeef a'temen ok-oke'. Es on naan Nai Yesus ansai amenat naan, lalit naleko naan. Es on naan Nai Yesus anlelug he anfani nai. 5 Lalit Nai Yesus antoti sin antenin am nak, “Kalu anmu'i li'ana' es anmofu ntaam noi oe hani' nateef nok neno onen, hi mnao mipoin ee ka, ai' kaha? Kalu bijael es anmofu ntaam, hi mkonon ee ka, ai', mnao mipoitan? Hi of amnao mheel mipoitan. Es on nane, naan in oten nak, hi mmeep!”^a

6 Annenan Nai Yesus In aguaban on nane, ka tiit fa es he nabe'i natae noi Ne.

7 Tabug naan, Nai Yesus nail tuaf-tuaf le' neman anbukaen anbin umel naan. Anmu'i tuaf namfau namin balel he antokon anbin matan. Nail on nane, In naguab am nak, 8 “Ampaant om, oo! Kalu anmu'i tuaf anfee haan honet noi ki, he mnao moi fesek matsaos, naik mami balel he mtoko mbi anaet een sin balak een. Naik-naika fesek ee tuan anfee haan honet noi anaet een. 9 Kalu on nane, fesek ee tuan naan of neem noi ko mnak, ‘Naik mutoo' oo! Au 'toti he tatsese toi kotin nae, natuin au uloitan atoko' iij noi anaet le' ii.’ Es on naan ho mfeen mu'ko 'toko' naan ma mumaeb om. Lalit amnao mtoko mbi kotin. 10 Es on naan kalu ho mupeni haan honet, amnao mtoko moi 'toko' abit kotin. Kalu fesek ee tuan ee niit ko te, in of neem am nak ko mnak, ‘Ee, Aam! Au 'toti he tkoen ok toi matan ii.’ Nok lalan naan hi mipeni tola anbi tamu sin ok-oke'.^b 11 Fun tuaf le' nanaeb on, Uisnenog of nanebet. Mes tuaf le' napaaln on on le' atoni abaut, Uisnenog of naiti na'latan.”^c

12 Lalit Nai Yesus naguab nok ume tuaf nane mnak, “Tabug mese anteni, kalu ho mmo'e fesek, naika mfee haan honet noi ho nonot ma ho amnono amu'it een anmesen! Natuin sin of nabe'i anfeen haan honet he nsun bani ko. 13 Mes kalu ho mmo'e fesek, amfee haan honet noi ama'mu'it, hae hela', ao a'olet, ma afolot sin. 14 Sin of ka nabe'i nseun bani naan ko fa. Mes kalu ho mfee haan honet noi sin, Uisnenog es le' anbalas noi ko. Anbi tabug Uisnenog namonib nafani' In apalsait een le' anmaten nalalin, In ka nniken fa ho 'mo'et alekot naan.”

15 Anneen on nane, tuaf es le' nok antoko me'ij mese nok Nai Yesus, naguab am nak, “Ua alekot anneis, es le' kalu tbukae tabgua anbi Uisnenog In sonaf!”

16 Nai Yesus natael ee mnak, “Au 'mu'i leta' on ii: anmu'i atonij mese anmo'e fesek anaek. Es on naan in anfee haan honet noi too mfaun sin. 17 Tabug fesek naan sin naloitan nalali je te, in anleek in atel ma annao anhone tuaf-tuaf le' napenin haan honet am nak, ‘Au hone kit, fun acara fesek he anmulai jen.’ 18 Mes sin ala sin anmo'en kuuk aguab senij huma'-huma', he sin naik nokan noin le' fesek naan. Tuaf mese anfee aguab senij am nak, ‘Kaa! Au fe' a'soos naijaan fe'ug, es on naan au 'nao he ail 'iit ee fe'. Naik mutoo' hee! Au ka ube'i 'uum fa.’ 19 Tuaf abjaan nak, ‘Au fe' a'soos aan kuuk bijae afo'i naijaan pasan niim. Au he 'nao 'sobal sin. Es on naan au 'toti ma'af, he!’ 20 Tuaf abjaan anteni nak, ‘Au fe' amatsao fe'ug, es on naan ka bisa fa.’

21 Lalit atel naan anbelok anfani ma natoon noi in kesel. Anneen on nane, kesel naan natoo' namneo-namneo. Lalit in naplenat in atel nane mnak, ‘Kalu on nane, amnao labah moi opa' een, laal aan'-ana' pesit anbin koot iij, he amheel meki kit atoni kasian sin, atoni hae hela', atoni afolot ma ao a'olet een.’ 22 Anneen on nane, atel naan annao ma anhone tuaf-tuaf een naan. Lalit in anbelok anfani ma natoon am nak, ‘Usi'! Sin neman nalalin, mes balel abjaan luum een fe'.’

23 Es on naan kesel naan naguab am nak, ‘Kalu on nane, amnao mteni moi kuan-kuan et koot in kotin, amtee lelel sin. Muteef sekom-sekog amfuli sin, he meki sin neman, lamun bale fesek iij naheen. 24 Amneen, he! Tuaf-tuaf le' ka nsimo au haan honet naan, sin ka nnaben niit fa fesek iij in minan, maski ba-baun amsa'!’”

25 Lalit Nai Yesus sin annaon nfinin noin Yerusalem. Too mfaun sin natuin Ee. Lalit In folek ma nail an'ani sin am naguab am nak, 26 “Atoni le' namneo-namneo he natuin Kau, in lo he anneek Kau anneis na'ko ale' kanan saa'-saa' ok-oke': annesi na'ko in inaf-amaf, annesi na'ko in feel-anah, annesi na'ko in olif-tataf, ma annesi na'ko in tuan ee kuun. Kalu kah fa te, atoni naan ka ntaam fa ota' he anjali Au asimo anoni'.^d 27 Fun atoni le' ka nlomi fa he nasae hamu'it ma ma'ne'at natuin in anpalsai Kau, in ka ntaam fa ota' he anjali Au nuug. Tuaf le' anlomi he anjali Au nuug, maski atoni he nlolo na'matel amsa', mes in nasae piut hamu'it ma ma'ne'at naan.^e

28 Es on naan kalu he mituin Kau, amtai milek-leko' fe'. On le' atoni he nafenab ume maktuta'. In lo he nso'i nahunun umel in upan fe', tal antee namtiis. Naik-naika loit een ka nanokab fa. 29 Kalu ka nso'i sin fa tal namtiis, in of anfanderen nalali te, loit een oke een. Lalit tuaf abjaan sin anmanis ma namael ee, 30 mnak, ‘Hi mail miit atoni' nae fe'! In fe' anfanderen aah, ka saa'-saa' fa fe', mes nalali loit.’

31 Aguab leta abjaan, es le' anmatoom nok makenat. Usif le' he nnao noi makenat, lo he antoko he nso'i nalek-leko' nok in aok-abjaan sin. Kalu in aal anmu'ij ha solalus tuaf nifun bo'es (10.000), in nabe'i niis anbi makenat nok musug tuaf nifun bo' nuug (20.000), ai' kahaf? 32 Kalu anso'i nalali ma, nak in of ka niis fa anbi makenat naan, naleko nnesi, tabug musun fe' ka ntaman fa fe', in anleek tuaf he annao n'ulus lasi halan. 33 On nane msa', tuaf le' he natuin Kau. In lo he ntai nafan-fani' am nak, in nabalab nalali he nasaitan sin ok-oke', ai' kah fe'? Fun kalu ka on fa nane, tuaf le' naan ka ntaam fa ota' fa he njali Au nuug.”

34-35 Nai Yesus anluut In aguaban naan anpake aguab mapolin mese anteni mnak, “Masik naan naleek. Hit atpakel he taminab amnahat. Mes kalu masik ka miin masi' fa lee, hit he tpakel noi saa'? Hit ka bisa tpakel fa he taminab amnahat. He attao pupuk amsa', ka bisa fa. Hit taiti tpolin aah ee. Es on naan hi lo he mjali on le' masik amsa', he mmoni nok manekat mok ale' too mfaun sin. Sekog maluke', amtaka' ma amneen milek-leko'!”