Usif Yesus anmoni anfaan!
(Nai Mateos 28:1-8; Nai Lukas 24:1-12; Nai Yohanis 20:1-10)
16
Anmiu neno nee, atoni Yahudis sin neno onen. Manas antees nalali, bi Maria na'ko kuan Makdala, ma bi Maria (nai Yakobus in inaf), nok bi Salome, sin annao ansosan miin foo meni', he anmiu, sin he annaon nkiku een noi Nai Yesus In aon-ta'un natuin sin halat atoni Yahudis.
Nai Markus 16:1-21
2 Ma anmiu fa-fai ana on nane, sin tenu sin annaon noi opu fatug naan. 3-4 Anbonin lalan sin naguab een am nak, “Oin ee! Of sekog es le' antita naskotun kit fatu naek naan na'ko opug in nesun? Hit tenu kit ka nuug fa he tabe'ij. Fatug naan anae' le'uf!”
Mes tabug sin anteen balel naan, sin niit fatug naa naskotu nalaal je. 5 Lalit sin antaman nfinin anbi opu fatu naan. Mes nok askeken, sin niit atoni munif mese anpake muti' naliim, antoko anbi sin abnapak ane'ug. 6 Ma atoni munif naan naguab noi sin am nak, “Hi naik mimtau! Au uhiin 'ak hi iim he m'etu Nai Yesus, atoni Nasaret naan, le' sin namate nalali anbi hau nehe'. Ka tiit Ee fa le. In nmoni nfaan je! Iim he hi mail kiim balel le' sin natunu Nai Yesus In aon-ta'un naan. Ka tiit Nai Yesus fa le! 7 Es on naan hi amfani nai lab-laab! Amnao mitoon moi nai Petrus sin am mak, Nai Yesus anmoni nfaan je. In nnao nahunun ki noi pah Galilea. Maut he sin na'eku nok Nai Yesus anbi naa, on le' nahunu In natoon nalali sin. Es on naan hi mfani nai!”a
8 Tabug bifeen naan niit opu luman naan sin naskeken. Es on naan sin naen anpoin. Sin anfanin lab-laab. Sin anbonin lalan ka natonan fa sekom-sekog, natuin sin namtau nmaten.
Usif Yesus na'eku nok bi Maria le' na'ko Makdalab
(Nai Mateos 28:9-10; Nai Yohanis 20:11-18)
9 Anbi neno kliij nok-nok ana, Nai Yesus annao na'eku nahunu nok bi Maria le' na'ko kuan Makdala. Bi Maria le' naan, nahunu Nai Yesus anli'u napoitan nitu le'uf hiit na'ko in aon. 10 Tabug bi Maria na'eku nalali nok Nai Yesus, in anfaan ma natoon noi amfaut een le' nahunut sin natuin Nai Yesus. Sin fe' nabguan nok susal ma kaet, natuin sin namnau Nai Yesus In amaten. 11 Lalit bi Maria naguab noi sin am nak, “Nansaa' am es hi msuus ma amkae fe'? Naika msuus amtein, natuin Nai Yesus anmoni nfaan je! Lelon au u'eku 'okan.”
Mes sin ala sin natael am nak, “Ho mumoe!”
Usif Yesus nakliil On noi tuaf nuug
12 Lalit Nai Yesus In asimo anoni' tuaf nuug annaon noin kuan mese. Anboni lalan Nai Yesus nakliil On noi sin, mes In nabain o'. Mes ka loog fa on nane, sin nahinel. 13 Lalit sin nua sin anfanin ma natonan sin aok-abjaan sin am nak, “Hoi! Hi mneen fe'! Lelon hai mi'eku mok Nai Yesus anbi lalan!”
Mes sin aok-abjaan sin natael am nak, “Eee! Hi naik mimoe on naan!”
Usif Yesus nakliil On noi In asimo anoni' sin ok-oke'
(Nai Mateos 28:16-20; Nai Lukas 24:36-49; Nai Yohanis 20:19-23; Haef een sin Tu'in 1:6-8)
14 Lalit Nai Yesus na'eku nok In asimo anoni' tuaf bo'es am mese. Tabug naan, sin antokon ma anbukaen. In naguab noi sin am nak, “Hi minaak-faat. Atoni' natoon nalali ki mnak sin niit nalali Kau neki sin matak afguak een, mes hi ka mpalsai fa! Hi mak, sin ala sin namoen! Tabug ii, Au 'eki nok 'uum. Namneo Au 'maat, mes tabug ii, Au 'moni 'faan! Hi miit kiim meki hi matam afguam een.
15 Es on naan tabug ii hi lo he mnao amfuun ma miteef pah-pinan ii, he mitonan ale' mansian sin ok-oke' Au Tu'in Alekot ii.c 16 Sekog le' anpalsai noi Kau, ma naslanij, of Uisnenog ansoi nafetin he in natgua nabal-baal nok Uisnenog anbi sonaf neno tunan. Mes sekog le' ka npalsai fa in of napeni hukum, ma Uisnenog anli'u napoitan, lalit natgua nabala anbi mone'. 17 Ma le' apalsait noi Kau, of sin anmo'en lasi sanmakat huma'-huma', he too mfaun sin nahinen nak sin kuasat naan na'uu ma nabaa' na'ko Uisnenog. Aleta' on le': sin of anli'u nitu le'uf sin neki Au kanak. Uisnenog of anmo'e sin he sin naguab een neki aguab abjaan le' sin ka nahine fa. 18 Lalit kalu sin annaa' kaun le'uf, ai' sin ninu naan lasog, sin ka nuug fa he namle'un. Kalu sin npooh ma an'onen noin amenat, amenat naan naleek.”
Usif Yesus na'aiti On noi sonaf neno tunan
19 Tabug In naguab nalali nok In asimo anoni' sin on nane, Uisnenog naiti nasaeb Nai Yesus noi sonaf neno tunan. Anbi naan, In anjali Uisnenog In tuaf apalsait, he sin nua sin antokon ma naplenat nabguan.d
20 Lalit In asimo anoni' sin anmo'e natuin In aplenat. Sin annaon noin balel-balel ma natoon ale' too mfaun sin anmatoom nok Nai Yesus In Tu'in Alekot. Uisnenog anfee kuasat noi sin, he sin anmo'en ale' lasi sanmakat le' Nai Yesus natoon nalali sin. Es on naan too mfaun anpalsain noi Nai Yesus, natuin sin nahinen nak Tu'in Alekot naan lo namneo.
Nai Markus 16:21-21
[NAI' MARKUS NAHIUB IN TU'IN, NATUIN LULAT AHUNUT ABJAAN e
9 Tabug bifee tenu een naan na'eku nok nai Petrus sin, sin natonan amfaut een naan anmatoom nok atoni munif le' naguab nok sin anbi opu fatug naan. 10 Lalit Nai Yesus nekin On naplenat In asimo anoni' sin, he annaon ma natoon In Tu'in Alekot noi ale' balel-balel, tal antee pah-pinan tuuk am tuuk. Tu'in Alekot iij annone lalan nak Uisnenog ansoi nafetin sin na'ko sin saant een, he sin anmoni piut nokan.
Tu'in Alekot iij lo namneo ma namnoon. Es on nane, in nalan piut na'ko batan noi batan, tal antee nabal-baal.]