Na'i Maromak oan sia daka aan tan hanorin kale'uk
4
Mamaluk sia mak ha'u kadomi! Oras ne'e, ema manorik kale'uk wa'in la'o lema raiklaran ne'e. Sia be'ur ema na'ak, sia Maromak mako'an mak nodi mamenon nosi Nia. Mais sintidu! Kalo ema ida dale na'ak, nia nodi lia mamenon nosi Na'i Maromak, keta simu nunia dei. Musti tetu no leno di'a-di'ak atu hatene niakaan dalen nia, mai nosi Na'i Maromak ka, lale. 2 Ita bele tetu niakaan dalen nune'e: Na'i Maromak nameno kedan hori uluk atu solok Oan mai raiklaran ne'e. Kalo ema mak nodi mamenon katak na'ak, Yesus Kristus tebe-tebes Na'i Maromak Oan mak dadi ema raiklaran nu'u ita, niakaan mamenon nia nanis mai nosi Na'i Maromak. 3 Kalo ema nia la simu Yesus nunia, niakaan mamenon nia la mai nosi Na'i Maromak, mais mai nosi funu mak sakar Kristus. Emi rona ti'an ha'ak, funu mak sakar Kristus atu mosu mai iha raiklaran. Tuir loos, funu nunia iha ti'an.4 Lia nune'e, oa sia! Emi ne'e, Na'i Maromak eman no Niakaan Kmalar moris iha emikaan neon. Tan Niakaan beran maka'as liu raiklaran beran hotu-hotu, emi bele hatoba hola ema mak sakar Nia. 5 Manorik kale'uk sia mai nosi raiklaran. Siakaan dalen tuir raiklaran beer. Etuk, ema mak moris tuir raiklaran beer nakara nanono baa siakaan hanorin kale'uk nia. 6 Mais ita ne'e, Na'i Maromak eman. Ema mak talin malu no Na'i Maromak, sia nanono baa ita. Mais ema mak la talin malu no Na'i Maromak, sia la nanono baa ita. Hodi nunia, ita bele hatene lia nabee mak mai nosi hanorin loos huun, no lia nabee mak mai nosi hanorin kale'uk huun.
Dadomin kabaas mak nahabut baa Na'i Maromak
7 Mamaluk sia mak ha'u kadomi! Ita musti hadomi malu, tan dadomin mai nosi Na'i Maromak. Ema hotu-hotu mak nadomi malu, sia mak Na'i Maromak oan. Sia moos kre'is no Na'i Maromak. 8 Mais ema mak la nadomi malu, sia la talin malu no Na'i Maromak, tan Nia dadomin huun. 9 Na'i Maromak natudu dadomin baa ita nune'e: Nia solok Niakaan Oa Mane mesak mai raiklaran ne'e, atu loke dalan bodik ita, nebee ita bele moris ho Nia to'o nima-nimak. 10 Tebes! Dadomin kabaas nahabut baa Na'i Maromak. Dadomin kabaas, lahoos itakaan dadomin baa Na'i Maromak, mais Niakaan dadomin baa ita, tan Nia latan Oan mate, dadi baa sera atu selu nola ita. Hodi nunia, Nia kasu mohu itakaan salan, nebee ita bele di'ak hikar ho Nia.
11 Mamaluk sia mak ha'u kadomi! Tan Na'i Maromak nadomi ita liu resik nunia, ita moos musti hadomi malu. 12 La noo ema ida kois mak naree lo-loren Na'i Maromak. Mais kalo ita hadomi malu, ne'e na'ak, Na'i Maromak namutuk no ita. Niakaan dadomin moos hetak tu'an iha itakaan moris, to'o dadi dadomin kabaas.a
13 Na'i Maromak natuun Niakaan Kmalar baa ita. Tan lia nia, ita bele hatene ita talin malu ho Nia. Nia moos talin malu no ita. 14 Ha'u ko ha'ukaan maluk sia haree du'uk ti'an Na'i Maromak Oan. Hotu ami katak baa ema hotu-hotu ha'ak, Ama Maromak solok ti'an Oan atu sori ema raiklaran nosi sala. 15 Ema hotu-hotu mak simu na'ak, Yesus mak Na'i Maromak Oan, sia talin malu no Na'i Maromak. Na'i Maromak moos talin malu no sia. 16 Ita hatene ha'ak, Na'i Maromak nadomi ita liu resik. Tan lia nia, ita moos bele fiar ha'ak, Nia atu nadomi ita to'o nima-nimak.
Na'i Maromak nadomi ita tebes. Kalo ita hadomi malu, ne'e na'ak, ita talin malu ho Nia. Nia moos talin malu no ita. 17 Kalo ita talin malu ho Nia nunia, itakaan dadomin dadi dadomin kabaas. Nosi ikus, baa oras rai falu fila, Na'i Maromak tetu ema hotu-hotu moris, ita lalika hata'uk hariik iha Niakaan oin, tan ita dadi hanesan Kristus ti'an baa oras Nia moris iha raiklaran ne'e. 18 Kalo ita hadomi malu hodi dadomin kabaas, ita la hata'uk ona, tan ta'uk hotu-hotu iha itakaan neon laran lakon ti'an. Mais ema mak la natene dadomin kabaas, sia noran susar tan nata'uk Na'i Maromak atu kastikar sia.
19 Ita hadomi malu, tan Na'i Maromak nadomi uluk ita. 20 Kalo ema ida dale na'ak, “Ha'u kadomi Na'i Maromak,” mais ema nia sei hirus maluk, nia dale tolek. Kalo ema la nadomi maluk mak iha oin du'uk, oin nunabee nia bele nadomi Na'i Maromak mak nia sei la naree dauk? La bele! 21 Na'i Maromak du'uk natuun ukun na'ak, ita keta hadomi Nia dei, mais ita moos musti hadomi mamaluk.