Ha'u kakerek ne'e bodik ina no oan sia,^a mak ha'u kadomi tebe-tebes. Lahoos ha'u mesan mak kadomi emi, tan ema hotu-hotu mak natene hanorin loos moos nadomi emi. 2 Ami hadomi emi, tan ita fiar baa hanorin loos mak naktaman nima-nimak iha itakaan neon.

3 Ha'u kaloon, nebee Na'i Maromak no Oan Yesus Kristus natudu laran di'ak no laran dodan baa ita, nebee ita bele moris manek no dame. Nebee, ita bele hadomi malu hodi rai hanorin loos baa itakaan neon.

4 Oras ha'u krona ina oan balu sia moris tuir hanorin loos, ha'ukaan neon di'ak basuk, tan sia tuir ukun mak Ama Maromak naruka ti'an baa ita.

5 Ina mak ha'u kadomi! Ha'u kaloon nebee ita hotu-hotu hadomi malu. Ukun nia, lahoos ukun foun mais ukun mak ita simu kedan hori uluk.^b 6 Ita bele hatudu itakaan dadomin, kalo ita halo tuir Na'i Maromak ukun sia. Hori uluk, Nia naruka nunia ti'an. Ukun ne'e lahoos ukun foun, mais ukun tuan mak emi rona nanis.

7 Ha'u kakerek ne'e, tan ema manorik kale'uk wa'in la'o lema raiklaran ne'e. Sia nanorin na'ak, Yesus lahoos Kristus mak dadi ema raiklaran. Hodi nunia, sia tolek no sakar Kristus. 8 Emi musti daka di'a-di'ak emikaan moris, nebee sia keta be'ur nola emi. Hodi nunia, ami la kole butan. Emi moos bele hetan fafa'ek iha lale'an mak Na'i Maromak nameno atu foo baa emi.

9 Ema mak sees nosi Kristus hanorin, nia la talin malu no Na'i Maromak. Mais ema mak kaer metin hanorin nia, ema nia talin malu no Na'i Maromak no Oan Yesus Kristus.

10 Kalo ema ida mai nanorin lia seluk nosi Kristus, keta foo neon hodi simu nia iha emikaan uma. 11 Kalo emi simu nia, emi dadi ti'an ain-liman baa niakaan serwisu aat nia.

12 Sei noo lia wa'in mak ha'u kbeer kakerek baa emi, mais la kakerek iha ne'e, tan la kleur ona ha'u atu kmai dale du'uk ko emi, nebee ita neon di'ak bele-bele.

13 Na'i Maromak moos boi nola ina biin. Niakaan oan sia solok tabe kabaas bodik emi.

To'o ne'e dei.