5
Ema hotu-hotu mak fiar na'ak, Yesus mak Kristus, sia dadi baa Na'i Maromak oan. Hanoin! Ema mak nadomi ama ida, ema nia nanis nadomi no ama nia niakaan oan sia. 2 Kalo ita hadomi Na'i Maromak hodi halo tuir Niakaan ukun, ne'e na'ak, ita moos hadomi Niakaan oan sia. 3 Kalo ita hadomi Na'i Maromak, ita halo tuir Niakaan ukun. Mais Niakaan ukun la todan.a 4 Ita mak dadi Na'i Maromak oan, bele hatoba beran aat raiklaran hotu-hotu, tan ita fiar baa Nia. 5 See mak bele natoba beran aat raiklaran hotu-hotu nia? Nanis ema mak fiar na'ak, Yesus mak Na'i Maromak Oan.Yesus tebe-tebes Kristus, Na'i Maromak Oan
6 Yesus tebe-tebes Kristus, Na'i Maromak Oan mak Nia solok mai iha raiklaran ne'e. Baa oras Yesus atu nala'o Niakaan serwisu, Yohanis sarani Nia nodi wee. Nosi ikus, Nia mate nodi naduar raan. Hodi nunia, ita hatene malorek ha'ak Yesus ne'e, tebe-tebes Kristus. Lahoos ita hatene tan wee dei, mais ita moos hatene tan raan nia. Na'i Maromak Kmalar moos natebes nunia. No Na'i Maromak Kmalar nia, hanorin loos huun. 7 Noo lia tolu mak natebes na'ak, Yesus tebe-tebes Kristus.b 8 Ida, Na'i Maromak Kmalar Lulik du'uk. Rua, wee mak Yohanis nodi sarani Yesus. Tolu, Yesus raan mak nakduar. Lia boot tolu nia, natudu lia mesak nosi Yesus na'ak, Nia tebe-tebes Kristus. 9 Kalo ita bele simu ema raiklaran dalen, saa tenik baa Na'i Maromak dalen. Nia nodi lia boot tolu nia atu katak na'ak, Yesus tebe-tebes Kristus, Niakaan Oan mak Nia solok mai ti'an iha raiklaran ne'e. 10 Kalo ema ida fiar baa Na'i Maromak Oan, ne'e na'ak, nia simu ti'an saa mak Na'i Maromak dale nosi Oan nia. Mais ema mak la fiar, ema nia nalo Na'i Maromak baa maktolek teen, tan nia la simu saa mak Na'i Maromak dale du'uk nosi Niakaan Oan na'ak, 11 ema bele hetan moris loos to'o nima-nimak, surak fiar baa Oan.c 12 Ema mak talin malu no Na'i Maromak Oan, sia atu netan moris nia. Mais ema mak la talin malu no Na'i Maromak Oan, sia la netan.
Tan saa Yohanis nakerek hakerek ne'e?
13 Ha'u kakerek lia ne'e sia bodik emi mak fiar baa Na'i Maromak Oan, nebee emi bele hatene, emi atu hetan moris to'o nima-nimak.
Yohanis nakerek tu'an nosi lia hamulak
14 Ita bele haberan aan hamulak baa Na'i Maromak, tan ita hatene, kalo ita hamulak hodi husu sa-saa tuir Niakaan hakaran, Nia nanis rona. 15 Tan ita hatene Nia nanis rona saa mak ita husu, ita moos bele hatene, ita nanis simu saa mak ita husu nia.
16 Kalo emi haree maluk ida nalo sala, di'ak liu, hamulak hodi husu nebee Na'i Maromak tulun nia netan moris. Ha'u kdale ne'e, nosi sala mak la nodi ema baa mate. Mais noo sala seluk mak nodi ema baa mate. Ha'u la karuka emi hamulak, kalo noo sala oin nunia. 17 Lia la di'ak hotu-hotu mak ema nalo, Na'i Maromak sura nalo baa sala. Mais lahoos sala hotu-hotu mak nodi ema baa mate.
Yohanis nakerek tenik nosi lia mak noo folin
18 Ema mak talin malu no Na'i Maromak moris la nalo sala ona, tan Na'i Maromak Oan daka sia. Diabu ulun mak a'aat huun moos la bele natoba nola sia.
19 Ita hatene, ita ne'e talin malu ho Na'i Maromak. Mais ita moos hatene, diabu ulun mak a'aat huun noo beran atu babilan ema hotu-hotu iha raiklaran.
20 Ita hatene, Na'i Maromak Oan mai atu nakroma itakaan neon, nebee ita bele hatene Maromak mak loos. Oras ne'e ita bele kre'is ho Nia, tan ita kre'is ho Oan, Yesus Kristus. Yesus Kristus moos Maromak mak loos. Nia mak foo moris nima-nimak baa ita.
21 Oa sia! Daka di'a-di'ak emikaan moris. Keta to'o emi hana'i baa lia kale'uk mak seluk Na'i Maromak iha emikaan neon.
Nunia dei.
Yohanis