Ita dadi baa Na'i Maromak oan sia
Na'i Maromak oan sia moris la nalo sala
3
Hanoin kokon itakaan Aman dadomin baa ita! Dadomin nia, maka'as kaliuk, to'o Nia foti ita baa Niakaan oan. Tebes! Mais ema mak moris tuir raiklaran beer, sia la natene ita ne'e see, tan sia la natene itakaan Ama.a2 Mamaluk sia mak ha'u kadomi! Ita dadi Na'i Maromak oan ti'an, mais sei la malorek dauk ita atu dadi oin nu'u saa tenik. Lia mak ita hatene nune'e: Oras rai falu fila Kristus namaan aan mai nikar, ita atu dadi hanesan Nia, tan oras nia, foin ita haree malorek Nia. 3 Ema hotu-hotu mak naloon baa Niakaan mamain nia, sia musti namoos aan, nebee bele moris moos hanesan Nia. 4 Mais ema mak nalo sala, sia nakur Na'i Maromak ukun, tan sala hotu-hotu sakar Na'i Maromak ukun. 5 Emi hatene ti'an ha'ak, Kristus mai raiklaran ne'e atu kasu mohu itakaan salan. Nia du'uk la noo sala.b 6 Tan baa nia, ema mak talin malu no Kristus, la nalo sala ona. No ema mak nalo sala, nia la natene Kristus.
7 Oa sia! Keta kona be'ur tan lia ne'e. Ema mak moris loos nalo hahalok loos, tan nia neon loos hanesan Kristus. 8 Mais ema mak nalo sala, nia talin malu no diabu ulun mak nalo hahalok aat hori uluk. Tan baa nia, Na'i Maromak Oan mai atu nadodok diabu ulun hahalok aat nia sia.
9 Kalo ema ida dadi baa Na'i Maromak oan, ema nia moris la nalo sala ona, tan Na'i Maromak moris ti'an iha niakaan neon. Nia la bele nalo sala ona, tan nia simu moris foun ti'an nosi Na'i Maromak. 10 Hodi nunia, ita bele hatene, see mak talin malu no Na'i Maromak, no see mak talin malu no diabu ulun. Tan ema mak la nalo hahalok loos, no la natene nadomi maluk, ema nia sia lahoos Na'i Maromak eman.
Na'i Maromak oan sia moris nadomi malu
11 Hori uluk emi rona ti'an hanorin na'ak, “Ita musti hadomi malu!”c 12 Tebes. Hanoin baa lia Kain no Habel. Keta tuir Kain, tan nia talin malu no diabu ulun mak a'aat huun, to'o nia no'o nikar alin Habel. Tan saa Kain nalo nunia? Tan niakaan hahalok aat, mais alin Habel niakaan hahalok loos.d 13 Tebes, mamaluk sia. Dadi keta blaar kalo ema mak tuir raiklaran beer, hirus emi.
14 Kalo ita hadomi itakaan mamaluk, ita bele hatene kedan ha'ak, ita atu hetan moris nima-nimak ho Na'i Maromak. Mais kalo ita la hadomi itakaan mamaluk, ita la hetan moris ho Na'i Maromak.e 15 Ema mak hirus niakaan mamaluk, Na'i Maromak sura nia hanesan ema mak no'o ema. Emi hatene ti'an ema oin nunia la netan moris nima-nimak no Na'i Maromak. 16 Ita hatene dadomin mak loos, hosi Kristus dadomin. Nia nadomi ita, to'o latan niakaan moris nodi sori ita. Tan lia nia, ita moos musti latan itakaan moris hodi tulun mamaluk. 17 Kalo ema ida moris furak, mais neon la monu baa mamaluk susar sia, nunabee nia bele dale na'ak, “Ha'u kadomi Na'i Maromak!” La bele!
18 Oa sia! Keta hadomi hodi ibun dei, mais hadomi hodi hahalok di'ak. Tan hodi nunia, foin ita hatudu dadomin mak loos. 19 Kalo ita moris hodi hadomi nunia, ita bele hatene ha'ak, ita moris tuir hanorin loos. Hodi nunia, itakaan neon lalika hata'uk oras ita hariik iha Na'i Maromak oin. 20 Tebes! Kalo itakaan neon la noku tan ita sei hanoin sala mak uluk ita halo, ita lalika hata'uk. Itakaan neon bele noku, tan Na'i Maromak natene hotu itakaan moris. Nia dodan ita liu nosi ita du'uk.
21 Mamaluk sia mak ha'u kadomi! Kalo itakaan neon la tula sala baa ita ona, ita la hata'uk hariik iha Na'i Maromak oin. 22 Hodi nunia, ita bele simu hotu-hotu mak ita husu baa Nia, tan ita hala'ok Niakaan ukun ti'an, hodi halo lia mak nalo Nia neon di'ak. 23 Niakaan ukun nia nune'e: Fiar nohuun baa Yesus Kristus, Niakaan Oan mak Nia solok ti'an nia. Hadomi malu nohuun, hanesan Yesus naruka ti'an baa ita.f 24 Kalo ita halo tuir ukun nia sia, ne'e na'ak, ita talin malu ho Na'i Maromak. Na'i Maromak moos talin malu no ita. Na'i Maromak moos foo tadak nebee ita bele hatene tebes ha'ak, Nia talin malu no ita, hodi foo Niakaan Kmalar mak moris iha itakaan neon laran.