2
Oa sia! Ha'u kakerek lia ne'e sia baa emi, nebee emi moris la halo sala ona. Mais kalo noo ema ida nalo sala, ita hoo maktulun ida mak naloos ita iha Ama Maromak oin. Maktulun nia, mak Yesus Kristus. Nia, Ema Moon mak Na'i Maromak solok mai ti'an iha raiklaran ne'e. 2 Nia mate bodik selu nola ita, nebee Na'i Maromak kasu mohu itakaan salan. Nia lahoos mate bodik ita mesan dei, mais bodik ema hotu-hotu iha raiklaran ne'e.Ema mak moris iha kroman, hadomi malu
3 Ita hatene ita kre'is ho Na'i Maromak kalo ita tuir Niakaan ukun. 4 Kalo ema ida dale na'ak, “Ha'u kre'is ko Na'i Maromak,” mais ema nia la nalo tuir Na'i Maromak ukun, ne'e na'ak, ema nia maktolek teen. 5 Mais kalo ita halo tuir Na'i Maromak ukun, ne'e na'ak, itakaan dadomin baa Nia tetuk ti'an. Hodi nunia, ita bele hatene, ita ne'e Na'i Maromak eman. 6 Kalo ema ida dale na'ak, “Ha'u ktalin malu ko Na'i Maromak,” niakaan moris lala'ok musti hanesan Yesus Kristus.
7 Maluk sia mak ha'u kadomi! Ukun mak ha'u kakerek ne'e, ukun hadomi malu. Ukun ne'e lahoos ukun foun bodik emi, tan emi hala'ok ukun ne'e ti'an nahuu hori emi simu Maromak Manfatin.a 8 Masik nunia moos, kakerek lia foun tenik kosi ukun ne'e, tan ukun ne'e la'o nima-nimak ti'an iha Yesus Niakaan moris. Ukun ne'e moos la'o nima-nimak ti'an iha emikaan moris, to'o makukun nahuu lakon iha emikaan neon laran, no kroman nahuu naksinak ona.
9 Kalo ema ida dale na'ak, “Ha'u kmoris iha kroman,” mais ema nia hirus niakaan maluk, ne'e na'ak, ema nia sei moris iha makukun, 10 tan ema mak moris iha kroman, nia nadomi niakaan maluk, no la noo lia aat sa-saa iha neon mak nahonu nia. 11 Dadi kalo ema hirus niakaan maluk, ne'e na'ak, nia moris iha makukun. Nia la'o lemas dei, tan makukun nadelek matan.
Ema mak moris iha kroman, la moris tuir raiklaran beer
12 Oa mak foin fiar sia! Ha'u kakerek ne'e bodik emi,
tan Kristus mate ti'an bodik emi,
nebee Na'i Maromak kasu mohu emikaan salan.
13 Ema matas mak fiar oras ti'an sia! Ha'u kakerek ne'e bodik emi,
tan emi kre'is baa Yesus Kristus,
mak iha kedan hori uluk aan.
Ema nurak mak fiar biit sia! Ha'u kakerek ne'e bodik emi,
tan emi sakar a'aat huun,
to'o hatoba hola.
14 Oa mak foin fiar sia! Ha'u kakerek ne'e bodik emi,
tan emi kre'is baa Ama Maromak.
Ema matas mak fiar oras ti'an sia! Ha'u kakerek ne'e bodik emi,
tan emi kre'is baa Yesus Kristus,
mak iha kedan hori uluk aan.
Ema nurak mak fiar biit sia! Ha'u kakerek ne'e bodik emi,
tan emi rai Maromak Manfatin iha neon laran,
to'o emi dadi biit,
hodi sakar a'aat huun,
to'o hatoba hola.
15 Keta tuir raiklaran beer. Keta buka raiklaran sasoin. Tan ema mak nadomi raiklaran, nia la nadomi Ama Maromak. 16 Raiklaran fafurak sia, hanesan moris nadi'ak aan, rotus teen, no loko aan tan soi, lia ne'e sia mai nosi raiklaran, la mai nosi Ama Maromak. 17 Nosi ikus, raiklaran atu lakon mohu bele-bele no fafurak hotu-hotu mak ema no'i buka-buka nia. Mais ema mak nalo tuir Na'i Maromak beer, nia atu netan moris to'o nima-nimak.
Ema mak moris iha kroman, daka aan nebee keta kona be'ur
18 Oa sia! Loron rai falu fila kre'is mai ona. Emi rona ti'an ha'ak, kre'is rai falu fila, ema mak sakar Kristus atu mosu mai. Oras ne'e sia mosu ti'an, tan noo ema wa'in mak sakar Kristus iha nabee dei. Lia ne'e dadi tadak na'ak, loron rai falu fila kre'is mai ona. 19 Maksakar nia sia mai nosi itakaan klaran. Mais sia lahoos itakaan ema. Kalo sia tebe-tebes itakaan ema, sia la la'o nela ita. Mais tan sia la'o nela ita, malorek ti'an, sia lahoos itakaan ema.
20 Mais emi oin seluk hosi sia. Emi simu ti'an Na'i Maromak Kmalar Lulik. Nia babilan emi, to'o emi hatene hanorin loos hotu-hotu. 21 Ha'u kakerek ne'e lahoos tan emi la hatene lia loos. Lale! Emi hatene ti'an. Emi hatene lia nabee mak loos, no nabee mak la loos.
22 Mais oras ne'e, noo ema manorik kale'uk wa'in la'o lema raiklaran ne'e. Oin nunabee ita bele hatene sia? Ita bele hatene sia, tan sia dale na'ak, Yesus lahoos Kristus. Sia moos sakar Ama Maromak no Oan. 23 Kalo ema ida dudu sees Ama Maromak Oan, ema nia la talin malu no Ama Maromak. Mais kalo ema ida simu Ama Maromak Oan, ema nia talin malu no Ama Maromak.
24 Kaer metin hanorin mak emi rona hori uluk nia, nebee emi talin malu nohuun ho Ama Maromak no Oan. 25 Tan Nia nameno ti'an na'ak, ita atu moris nima-nimak ho Nia.
26 Ha'u kakerek ne'e, nebee emi bele hatene kedan nosi ema manorik kale'uk sia mak nakara be'ur emi. 27 Emi simu ti'an Na'i Maromak Kmalar Lulik. Emi moos talin malu nohuun ho Nia. Tan lia nia, emi lalika buka tenik ema seluk atu nanorin emi. Kmalar Lulik dei to'o ti'an, tan Nia bele nanorin lia loos hotu-hotu. Nia la kale'uk nu'u manorik kale'uk nia sia. Dadi kaer metin Niakaan hanorin, nebee emi bele talin malu nohuun ho Kristus.
28 Nune'e, oa sia! Emi musti talin malu ho Kristus, nebee oras Nia namaan aan mai nikar, emi la moe aan, mais emi bele haberan aan hariik iha Niakaan oin. 29 Emi hatene Kristus nalo lia loos nohuun tuir Na'i Maromak hakaran. Tan lia nia, emi moos bele hatene ha'ak, ema mak nala'ok lia loos tuir Na'i Maromak hakaran, sia mak dadi baa Niakaan oan.