Baa oras lale'an no raiklaran sei la iha dauk, Manfatin ne'e iha kedan ti'an. Uluk, Nia nein no Niakaan Ama iha lale'an, mais oras ne'e ha'u ko ha'ukaan mamaluk sia haree Nia hodi matan du'uk ti'an. Ami rona Nia hodi tilun du'uk ti'an. Ami moos kaer Nia hodi liman du'uk ti'an. Ami bele nunia,^a 2 tan Nia natadu aan iha amikaan klaran. Tan baa nia, ami la hata'uk katak lia nosi Nia, hodi halore dalan nebee ema raiklaran bele netan moris to'o nima-nimak. Tan Nia ne'e, Manfatin mak Foo Moris.^b 3 Ami hakara foo hatene baa emi lia hotu-hotu mak ami haree no rona ti'an, nebee emi bele neon ida ho ami, tan ita hotu-hotu talin malu ho Na'i Maromak no Niakaan Oan, Yesus Kristus. 4 Ami solok hakerek ne'e baa emi, nebee emi bele neon boot. Hodi nunia, amikaan neon moos hetak boot.

5 Baa oras ami sei hamutuk ho Yesus, Nia nanorin ami. Oras ne'e, ami moos hato'o hanorin nia baa emi nune'e: Na'i Maromak di'ak kaliuk. Nia la noo aat kois. Nia hanesan kroman mak naksinak, la nakukun kois. 6 Kalo ita dale ha'ak, “Ita moris neon mesak ho Na'i Maromak,” mais ita sei halo lia aat, ne'e na'ak, ita moris iha makukun laran. Ita dale tolek, no ita la moris tuir dalan mak loos. 7 Mais kalo ita moris tuir dalan loos, ne'e na'ak, ita moris iha Na'i Maromak kroman. Hodi nunia, ita bele moris neon ida, laran ida. Itakaan neon dadi moos, tan oras Na'i Maromak Oan Yesus mate, Nia nodi raan kasu mohu itakaan salan hotu-hotu.

8 Kalo ita dale ha'ak, “Ita la hoo sala,” ne'e na'ak, ita tolek aan no la hatene hanorin loos. 9 Mais Na'i Maromak neon loos. Kalo ita ha'ak hasai itakaan salan, Nia nanis nala'o Niakaan mamenon nodi kasu mohu itakaan salan, no namoos itakaan neon. 10 Kalo ita dale ha'ak, “Ita la halo sala,” ne'e na'ak, ita halo Na'i Maromak baa maktolek teen, tan Nia katak ti'an na'ak, ema hotu-hotu nalo sala. Kalo ita dale nunia, ne'e moos na'ak, Maromak Manfatin la nahabut iha itakaan neon.