Itakaan Na'in atu namaan aan mai nikar
3
Mamaluk sia mak ha'u kadomi! Ne'e, ha'ukaan hakerek dala rua bodik emi. Iha hakerek rua-rua, ha'u kfoo katene baa emi, nebee emi bele hanoin lia loos sia. 2 Hanoin lia mamenon nosi Maromak mako'an uluk aan sia mak moris moos. Hanoin no lia mak itakaan Na'in no itakaan Maksorin naruka baa ita tuir Niakaan klosan sia. 3 Hanoin no lia nune'e: oras rai kre'is falu fila ona, ema male'uk teen sia nalo benar nodi neok. Sia dale nahaat lia di'ak hotu-hotu.a 4 Sia katak na'ak, “Lei haree! Yesus nameno na'ak, Nia atu mai nikar. Mais Nia iha nabee? Nahuu hori itakaan bei uluk sia mate, to'o baa oras ne'e moos, la noo lia maseluk. Hotu-hotu nafati bei-beik, nahuu hori Na'i Maromak nase'i lale'an no raiklaran.”5-7 Sia dale nunia tebes, mais noo lia ida mak sia nodi fudi la nanoin. Lia nia mak ne'e: hori uluk fohon Na'i Maromak dale loos dei, hotu lale'an dadi kedas. Nia moos nase'i raiklaran nosi wee. Hotu, Nia naketak rai maran no wee.b Kleu-leur, baa bei Noh niakaan oras, Na'i Maromak moos nodi wee nalo motasa'e nadodok nola ema hotu-hotu.c Na'i Maromak nakotu kedan saa mak Nia atu nalo baa lale'an no raiklaran. Oras ne'e Nia sei la nalo dauk, tan Nia netu aan. Mais to'o baa niakaan oras, Nia atu sunu mohu lale'an no raiklaran. Nia moos atu natuun kastikar nodi nadodok mohu ema mak tali'ur baa Nia.
8 Mamaluk sia mak ha'u kadomi! Keta halu'a lia ne'e. Itakaan Na'in la sura oras nu'u ita. Tuir Nia, loron ida manesak no tinan rihun ida. Tinan rihun ida moos bele manesak no loron ida dei.d 9 Kalo itakaan Na'in nameno atu nalo lia ida, Nia nanis nalo kona fukur baa niakaan oras. Nia la nein tenik. Ema balu naneo na'ak, Nia serwisu nai-naik dei. Mais lale! Nia naterus aan nodi nein niakaan oras, tan Nia nakara ema hotu-hotu nalo neon aat nodi la'o nela siakaan salan, hotu fila baa Nia. Nia la nakara, ema naksasa nosi Nia.
10 La noo ema ida kois mak natene oras nabee itakaan Na'in atu namaan aan mai nikar. Tan Nia atu mai teki-tekis, nu'u ema na'ok tama uma. Baa oras nia, sasoin hotu-hotu iha lale'an namotuk mohu. Loro, fulan no fitun hotu-hotu lakon! Nunia moos, raiklaran no sasoin sia hotu-hotu. Namotuk bele-bele!e
11 Kalo hotu-hotu atu namotuk bele-bele nunia, ita musti moris oin nunabee? Ita musti moris moos hodi tuir Na'i Maromak hakaran. 12 Ita musti hei-hein Na'i Maromak namaan aan mai. Haka'as aan nebee loron nia to'o lai-lais. Baa oras nia, lale'an namotuk mohu. Sasoin hotu-hotu iha lale'an moos namotuk to'o nawee karin.
13 Mais Na'i Maromak nameno ti'an na'ak, nosi ikus atu noo lale'an ilas foun no raiklaran ilas foun. Lia nia mak ita hei-hein. Tan iha nia noo mesan ema mak moris loos.f
14 Mamaluk sia mak ha'u kadomi! Baa oras emi hei-hein lia ne'e sia, emi musti haka'as aan atu dadi ema di'ak mak kona baa Na'i Maromak neon. Hodi nunia, la noo ema ida mak bele tula sala baa emi. Haka'as aan moris dame malu.
15a Itakaan Na'in naterus aan, tan Nia nakara sori emi nosi sala.
Petrus narohan hakerek
15b Itakaan maluk Paulus nakerek ti'an lia wa'in baa emi mak manesak no lia mak ha'u kakerek ne'e. Na'i Maromak moos nalore lia nia sia baa nia, etuk nia nakerek nunia. 16 Sura Paulus nalo hakerek, nia moos dale lia ne'e sia. Nosi niakaan hakerek sia, noo lia isin balu mak susar ita hatene. Noo ema mak feur seluk Paulus hanorin. Sia moos feur seluk lia isin balu iha Hakerek Moon. Sia ne'e, ema baruk teen, no ema mak la fiar biit sia. Mais ema oin nunia sia atu dodok mohu.
17 Mamaluk sia mak ha'u kadomi! Emi hatene ti'an manorik kale'uk siakaan moris dalan. Dadi sintidu di'a-di'ak! Sia la no'uk nanono ukun sa-saa. Sia nakara naktolek emi, nebee emi sees hela hanorin loos. Mais keta habusik sia feur nola emi nunia. Emi musti haka'as aan biit. 18 Di'ak liu, emikaan fiar hetak naktubu. Nebee emi hetak kre'is ho itakaan Na'in no itakaan Maksorin, Yesus Kristus. Nebee Nia hetak natudu laran di'ak baa emi.
Nebee ema hotu-hotu foti-nahaas Nia, baa oras ne'e to'o nima-nimak!g
Dame,
Petrus