2 Masik nunia moos, ema wa'in tuir sia. Sia moris nalo aat nodi neok, to'o ema seluk sia dale nahaat Kristus no Niakaan hanorin loos. 3 Sia rotus teen. Sia nase'i oi-oik nebee sia bele be'ur nola emikaan osan. Mais keta halu'a, tan Na'i Maromak dadi baa Makotu Lia. Nia la toba kois. Hori uluk, Nia nadi'a aan ti'an atu kastikar sia. Sia nanis dodok.

4 Nunia moos, Na'i Maromak Niakaan makbukar lale'an balu. Uluk, baa oras sia nalo sala, Na'i Maromak la nabusik. Nia soe tama sia baa ha'i naraka, nodi neti natoos sia iha rai kuak makukun. Sia musti nein iha nia to'o oras Na'i Maromak nakotu siakaan lia.

5 Nunia moos, ema uluk aan sia. Baa oras nia, ema moris aat, se'i kotuk baa Na'i Maromak. Mais noo ema loos ida, naran Noh. Na'i Maromak babilan, nebee Noh natudu dalan bodik ema seluk sia, nebee sia moos bele moris loos. Mais sia la nanono kois baa Noh. Etuk, Na'i Maromak solok motasa'e boot nadodok nola sia. Mais Nia sori Noh no niakaan famili. Sura sia hotu-hotu, ema na'in walu.^a

6 Nunia moos, ema kota Sodom no kota Gomora uluk aan sia. Sia moris aat basuk, to'o Na'i Maromak kastikar sia. Nia sunu mohu kota rua nia, to'o sa-saa hotu-hotu dadi rai ahun. Ema hotu-hotu moos mate bele. Lia nia dadi knaninuk bodik ema seluk mak moris aat nodi tali'ur baa Na'i Maromak, nebee natene kedan siakaan sotir kalo sia la no'uk nalo neon aat.^b 7 Baa oras nia, noo ema ida naran Lot. Nia moris loos. Mais nia neon susar baa ema mak aat liu resik, mak la no'uk nanono baa Na'i Maromak. Hotu Na'i Maromak sori nola Lot nosi kota nia.^c 8 Lot du'uk nakara nalo lia loos, mais nia moris iha ema kota Sodom klaran. Sura loron nia naree no rona sia nakur Na'i Maromak ukun. Etuk, nia neon susar.

9 Knaninuk nia sia natudu na'ak, kalo ema nanono baa Na'i Maromak, Na'i Maromak nakara sori nola sia nosi sokur oi-oik. Mais Nia moos nakara taa ukun todan baa ema mak moris kale'uk. Nia atu nalo bei-beik nunia to'o oras Nia nabesi aan leno ema hotu-hotu moris. 10 Nia nanis atu natuun kastikar todan baa ema mak moris sasobo, baa ema mak tuir hakaran du'uk, baa ema mak la rona ema, baa ema mak naleuk makaer ukun sia. Na'i Maromak nanis kastikar sia.

Ema manorik kale'uk ohin nia sia, sia loko aan no naksakar aan liu resik. Sia la nakneter Na'i Maromak no la nata'uk dale nahaat Nia no Niakaan makbukar lale'an sia. 11 Tuir loos, Maromak Niakaan makbukar lale'an sia biit liu manorik kale'uk nia sia. Mais sia la dumar manorik kale'uk sia iha Na'i Maromak oin.

12 Manorik kale'uk nia sia dale nadois lia mak sia du'uk la natene. Sia nu'u karau neon lalek. Di'ak liu, kohi hola, ho'o mohu! Tebes! Siakaan sotir mak nia. Sia nanis dodok, tan siakaan hahalok aat. 13 Sia nasusar ema wa'in. Mais nosi ikus, Na'i Maromak atu nasusar sia. Sia nase'i dahur moe lalek. Sia tokar lauk baa oras loron iha ema wa'in oin. Kalo sia naa namutuk no emi, sia tuir siakaan beer halo aat dei. 14 Sia matan laka baa feto aat sia. Sia moris nalo aat nohuun. Sia buka ema mak fiar la biit baa Na'i Maromak, hotu sia nakair nebee ema sia tuir nalo aat. Sia rotus teen! Nanis Na'i Maromak kastikar sia!^d

15-16 Uluk, sia tuir dalan loos, mais kleu-leur sia la'o sees. Hodi nunia, sia hanesan ema uluk aan ida, naran Balam. Niakaan ama naran Bosor.^e Balam nia, Maromak mako'an. Mais nia rotus osan, to'o nalo lia kale'uk. Loron ida, nia sa'e kuda keledai. Tuir loos, kuda la bele dale. Mais baa oras nia, Na'i Maromak nalo kuda nia dale nu'u ema! Kuda nia nasee Balam, tan niakaan hahalok aat. Kuda nakara nebee Balam nalo tuir Na'i Maromak hakaran, nodi nanawa nalo hahalok kale'uk hanesan ema bulak.^f

17 Manorik kale'uk nia sia, hanesan wee matan mak folin lalek, tan maran karin ti'an. Sia moos hanesan ababun mak folin lalek, tan anin nuu mohu. Na'i Maromak nadi'a kedan fatin ida mak nakukun luri atu sena sia. 18 Sia ibun boot, mais la noo isin. Sia nakair ema atu tuir nalo lia mak la makonak. Sia namaus ema mak foin fila nikar baa dalan loos, nebee nalo sala tenik. 19 Sia nameno na'ak, “Kalo hanono baa ami, emi bele halo hodi neok dei!” Mais ema mak dale nunia, sia dadi ata baa lia aat. Tan kalo ema ida nabusik lia ida babilan nola nia, ema nia dadi ata baa lia nia ti'an. 20 Kalo ema nakara sasin hosi lia aat mak nalo ita sasobo iha raiklaran, sia musti kre'is ho itakaan Na'in no itakaan Maksorin Yesus Kristus. Mais kalo ema nakiduk nosi Kristus, hotu tatalik nikar baa lia aat, ne'e na'ak, sia dadi ata baa lia aat. Hotu, sia moris susar todan tenik! 21 Kalo ema ida natene ti'an dalan moris mak loos, hotu nia nakiduk, lia nia la di'ak. Di'ak liu, nia sei la natene dauk. 22 Noo lia fuan tate'an mak kona baa manorik kale'uk nia sia na'ak, “Asu muta, naa nikar mutan.” Seluk tenik na'ak, “Masik hariis fahi ti'an, nia baa noku nikar ta'u.”^g