Ha'u kakerek ne'e bodik emi mamaluk sia mak Na'i Maromak boi ti'an. Emi moris keke lema ema rain, iha rai Pontus, rai Galatia, rai Kapadokia, rai Asia no rai Bitinia.

Mamaluk sia! Hori uluk fohon, Ama Maromak boi emi atu dadi baa Niakaan ema. Niakaan Kmalar Lulik namoos nola emikaan salan, nebee emi bele halo tuir ukun hotu-hotu mak Yesus Kristus natuun baa emi. Kalo emi hala'ok Niakaan ukun nia sia, nu'u Na'i Maromak nisik Yesus Kristus raan baa emi, atu dadi tadak na'ak, emi dadi moos ti'an bodik Nia.

Ha'u kaloon nebee Na'i Maromak natudu laran di'ak baa emi, nebee emi moris hetak manek no hetak dame.

3 Tonu-haboot Na'i Maromak, mak itakaan Na'in Yesus Kristus Aman. Tan Nia dodan ita tebes, Nia nalo Yesus Kristus moris nikar, atu foo moris foun baa ita. Ita bele haloon baa Nia, tan ita hatene, Nia bele naliku ita nohuun. 4 Nia rai nela sasoin bodik ita iha lale'an. Mais sasoin nia seluk nosi sasoin iha raiklaran, tan la bele aat, la bele dodok, no la bele lakon. 5 Nia nodi Niakaan beran boot atu daka ita, to'o la no saa ida kois mak bele nadodok ita. Oras rai falu fila, Nia atu nalore hotu-hotu mak Nia nalo kedan bodik ita.

6 Tan lia nia sia, ita neon di'ak tebes, masik baa oras ne'e ita hetan susar oi-oik no horan todan. 7 Na'i Maromak nabusik nebee ita hetan susar nunia, tan Nia nakara tetu itakaan fiar. Kalo ita terus to'o rohan, ne'e na'ak, itakaan fiar biit no loos, hanesan mean isin. Ema tunu mean baa ha'i, nalo kadoor sia sai, foin hetan mean isin. Tuir Na'i Maromak nanoin, itakaan fiar folin todan liu mean. Kalo ita fiar no terus susar to'o rohan, Na'i Maromak atu tonu no nakneter ita, baa oras Yesus Kristus namaan aan mai nikar.

8 Masik emi la haree Yesus, emi hadomi Nia. Masik to'o baa oras ne'e moos, emi sei la haree Nia dauk, mais emi fiar baa Nia. Emi neon boot lo-loos, to'o la noo lia fuan mak atu hodi halore. 9 Emi neon boot nunia, tan emikaan fiar noo folin, ne'e mak, Na'i Maromak sori emi nosi sala.

10 Maromak mako'an uluk aan sia katak kedan lia nosi Na'i Maromak laran di'ak nia baa emi. Masik sia katak kedan nunia moos, sia sei buka bei-beik atu natene liu nosi lia Na'i Maromak sori ema. 11 Kristus Kmalar serwisu iha siakaan neon, nebee sia moos katak kedan nosi lia Kristus kona susar no todan. Sia moos katak kedan na'ak, kalo Kristus mate ti'an, foin Na'i Maromak foti-nahaas Nia. Etuk, mako'an nia sia buka atu natene wainhira lia ne'e sia atu dadi. 12 Mais Kristus Kmalar katak baa sia na'ak, lahoos sia mak atu naree lia ne'e sia, mais emi mak atu haree. Oras ne'e, emi rona ti'an lia ne'e sia, tan Maromak Kmalar Lulik nosi lale'an solok ema baa katak Manfatin Di'ak ne'e baa emi. Lia furak mak emi simu ne'e, makbukar lale'an sia moos tuir nobun nodi neon kabaas.

13 Emi musti hatene di'a-di'ak lia ne'e sia hotu-hotu. Daka aan, nebee bele haneo halo naruk hodi haloon bei-beik baa Yesus Kristus to'o Nia namaan aan mai nikar. Tan baa oras nia, Na'i Maromak atu natudu laran di'ak baa emi. 14 Hanono baa Na'i Maromak, hanesan lawarik oan nanono baa inan-aman. Uluk, emi sei la hatene dauk Na'i Maromak dalan moris mak loos. Mais oras ne'e emi hatene ti'an. Dadi keta moris tuir hahalok aat ona, nu'u emikaan moris dalan tuan nia. 15 Oras ne'e, emi musti moris moos hanesan Na'i Maromak. Nia bolu emi dadi baa Niakaan ema. Tan baa nia, emikaan moris tomak musti moos. 16 Iha Hakerek Moon, Na'i Maromak naruka na'ak, “Emi musti moos, tan Ha'u ne'e moos.”^a

17 Emi bele dale ho Na'i Maromak, hanesan emi dale ho emikaan Ama. Mais Na'i Maromak moos Makotu Lia mak atu leno ema ida-idak moris. Nia nanis nakotu lia nodi moon, tan Nia la kli'is. Tan lia nia, oras emi hein heik hanesan ema matak iha raiklaran ne'e, emi musti daka aan hodi moris moos.

18 Emi hatene ha'ak, Kristus selu kotu atu sori emi nosi emikaan moris tuan mak folin lalek. Moris tuan nia, emi hetan hosi emikaan bei uluk sia. Mais hanoin! Kristus selu, la nodi mean no mutin mak atu lakon mohu. 19 Nia selu, nodi raan du'uk. Raa nia, folin todan kaliuk! Nia mate hanesan bibi malae oan sala lalek mak ema no'o nalo baa sera.

20 Oras Na'i Maromak sei la nase'i raiklaran dauk, Nia nakotu kedan lia nosi Kristus. Mais uluk, Nia la natudu dauk lia Kristus baa ema raiklaran. Oras ne'e, foin Nia natudu. Hodi nunia, Kristus dadi matak-malirin bodik emi. 21 Tan Kristus Niakaan hahalok nia, emi bele di'a-di'ak ho Na'i Maromak. Nia mak nalo Kristus moris nikar, nodi foti-nahaas Kristus, nebee emi bele fiar hodi haloon baa Nia.

22 Tan emi moris moos tuir hanorin loos ti'an, oras ne'e emi musti harui aan atu hadomi tebe-tebes emikaan mamaluk makfiar sia. Hadomi sia hodi neon no laran, hodi dadomin nosi emikaan laran moon. 23 Oras ne'e, emi hetan moris foun ti'an. Mais emi hetan lahoos hosi ina-ama mak atu mate iha raiklaran. Emi hetan hosi itakaan Ama iha lale'an mak la natene mate. Emi hetan tan emi simu Maromak Manfatin mak foo moris. Manfatin nia nafati to'o nima-nimak. 24 Hakerek Moon na'ak,

Tebes! Maromak Manfatin nia, Lia Di'ak mak ami katak ti'an baa emi.^b