Lia tate'an bodik ema malikuk ema sarani sia
5
Ha'u ne'e, ema malikuk ema sarani. Uluk, baa oras Kristus natiu Niakaan susar, Ha'u karee kodi matan du'uk. Nosi ikus, baa oras Na'i Maromak natudu Kristus Niakaan maka'as, ha'u moos atu tuir karee kodi matan du'uk. Etuk, ha'u koo beran atu kfoo lia tate'an baa ema malikuk rumak sia. Lia tate'an nia, nune'e: 2 Emi hanesan makbalin mak naliku bibi malae. Emi musti haliku di'a-di'ak ema mak Na'i Maromak latan baa emi. Keta babilan sia hodi neon baluk, mais babilan hodi neon tomak. Keta babilan sia tan buka sotir, mais babilan tan buka atu halo tuir Na'i Maromak hakaran.a 3 Keta haruka karin hodi hatodan sia. Emi musti dadi knaninuk bodik sia, nebee sia bele tuir emikaan lala'ok di'ak. 4 Yesus, mak itakaan Makbalin Ulun. Kalo Nia namaan aan mai nikar ti'an, Nia atu foo saseban baa emi, tan emi babilan di'a-di'ak Niakaan ema. La noo mak bele nahaat saseban nia, tan saseban nia nafati nohuun.Lia tate'an bodik ema nurak sia
5 Ema nurak sia! Emi musti hanono baa ema malikuk sarani sia. Musti hakraik aan, tan Hakerek Moon na'ak,
“Na'i Maromak sakar ema mak naksa'ek aan,
mais Nia natudu laran di'ak baa ema mak nakraik aan.”b
6 Emi hotu-hotu musti hanoin Na'i Maromak beran, nebee keta loko aan nunia. Hotu, to'o baa niakaan oras, Na'i Maromak atu foti-nahaas emi.c 7 Keta neo-neon, mais latan lia hotu-hotu baa Na'i Maromak, nebee Nia babilan, tan Nia neon monu baa emi.
8 Daka aan di'a-di'ak hodi haneo halo naruk, tan diabu ulun funu ita. Nia buka dalan atu nadodok mohu ita, hanesan busa krakat boot buka hahaak. 9 Mais keta hata'uk. Ita bele haterus aan sakar nia hodi fiar baa Na'i Maromak bei-beik. Keta halu'a, tan emikaan mamaluk makfiar sia iha raiklaran ne'e moos netan susar nu'u emi. 10 Mais hanoin, tan Na'i Maromak nakara natudu laran di'ak baa emi. Nia bolu nola emi atu dadi baa Niakaan ema, tan emi tuir Kristus ti'an. Tan lia nia, Nia atu foti-nahaas emi, nebee emi bele moris nima-nimak ho Nia. Dadi kalo emi hetan susar, la oras dei, tan Na'i Maromak atu tulun emi. Nia atu nakbiit emi, nodi foo babelen baa emi nebee emi bele hariik metin. 11 Ita haloon nebee Nia kaer beran hotu-hotu to'o nima-nimak. Tebes!
Petrus narohan hakerek
12 Silasd mak tulun ha'u nalo hakerek babadak oan ne'e. Nia, itakaan maluk makfiar no ha'ukaan liman kwana. Ha'u ksolok lia tate'an baa emi, nebee emi haterus aan hetak biit, tan Na'i Maromak buka atu natudu laran di'ak baa ita nohuun. Tan baa nia, emi musti hariik metin. Keta hakiduk.
13 Ema makfiar mak naklibur iha kota Babel solok tabe baa emi. Na'i Maromak boi nola sia, manesak no emi.
Ha'ukaan oa Markus moos solok tabe baa emi.e
14 Kalo emi hasoru malu, hasee malu hodi de'i kabaas atu hatudu emikaan dadomin.
Nebee emi hotu-hotu mak fiar baa Kristus, moris manek no dame.
Tabe,
Petrus