Kristus eman musti moris loos
4
Kristus, ema raiklaran hanesan ita. Tan Nia netan susar wa'in, emi moos musti hadi'a aan atu hetan susar hanesan Nia. Mais hanoin, tan ema mak nadi'a aan netan susar tan natali aan no Kristus, ema nia nakotu ti'an na'ak nia la nalo sala ona. 2 Masik nia sei moris iha raiklaran ne'e, nia la nalo sala hanesan ema seluk sia, tan nia moris tuir Na'i Maromak hakaran.3 Uluk, emi halo lia aat, hodi moris tuir ema mak la natene Maromak. Mais oras atu halo nunia to'o ti'an! Hanawa ona. Tan sia beer nalo lia aat. Sia lisan asu karawa. Sia lanuk teen. Sia nase'i dahur moe lalek. Sia lo'u baa ai'oi lulik mak nalo ita hakribi. 4 Uluk emi nunia. Mais oras ne'e, emi la kahur tenik ho siakaan a'aat mak liu kladik nia. Sia dale nahaat emi, tan sia la natene lia huun mak nalo emi, to'o emi la tuir sia ona.
5 Mais, hanoin! Nosi ikus sia musti nataa baa Na'i Maromak, mak Makotu Lia. Sia musti katak baa Nia, tan saa sia moris aat nunia. Keta halu'a! Ema hotu-hotu mak sei moris no ema mak mate ti'an bele-bele nataa baa Nia. 6 Tebes! Na'i Maromak atu leno ema mak mate ti'an, hanesan Nia moos leno ema mak sei moris. Tan baa nia, Yesus baa katak Lia Di'ak baa ema mak mate ti'an sia, nebee sia bele natene Na'i Maromak hakaran.
Haliku di'a-di'ak babelen mak Na'i Maromak foo
7 Tan raiklaran kre'is falu fila ona, ita musti haneo naruk hodi neon mamatek, nebee ita bele hamulak di'a-di'ak. 8 Lia mak folin kaliuk, nune'e: ita harui aan atu moris hadomi malu. Masik ema nalo sala wa'in baa ita moos, ita la laran moras, tan ita hadomi nohuun.a 9 Loke liman simu ema nosi fatin seluk atu nein heik iha emikaan uma. Keta simu hodi hakmuuk.
10 Na'i Maromak fa'e babelen ti'an baa ita ida-idak. Ema ida-idak musti nodi niakaan babelen nia atu naliku niakaan mamaluk makfiar sia. Babilan di'a-di'ak okaan babelen nia, nebee noo folin bodik Na'i Maromak. 11 Kalo Na'i Maromak fa'e babelen baa o, to'o o matenek manorin ema, manorin modi Maromak Manfatin du'uk. Kalo Na'i Maromak fa'e babelen baa o, to'o o matenek maliku ema, maliku sia di'a-di'ak tuir babelen mak Na'i Maromak foo baa o nia. Hodi nunia, ema hotu-hotu bele naree na'ak, emi ne'e, Yesus Kristus eman. Hotu, sia tonu-naboot Na'i Maromak Niakaan maka'as! Tan Nia kaer ukun nima-nimak! Tebes!
Ita hetan susar tan dadi baa Kristus eman
12 Mamaluk sia mak ha'u kadomi! Kalo emi hetan susar, keta blaar, tan Na'i Maromak nodi susar atu tetu emikaan fiar. Keta maneo, o mesan dei mak metan susar. 13 Mais emi musti neon boot, tan emi hetan susar bele-bele ho Kristus. Nosi ikus, emi moos hetak neon boot baa oras ema hotu-hotu naree Kristus Niakaan maka'as. 14 Kalo ema dale nahaat emi tan emi talin malu ho Kristus, emi sotir. Ne'e na'ak, Maromak Kmalar mak maka'as, natuun baa emi ti'an. 15 Mais keta to'o emi hetan susar, tan emi dadi ema mak no'o ema, ema na'ok, ema aat, lale, ema tokar lauk. 16 Mais kalo hetan susar tan dadi ema sarani, lalika moe aan. Di'ak liu, tonu-haboot Na'i Maromak, tan emi dadi Kristus eman ti'an.
17 Na'i Maromak Niakaan oras atu leno ema siakaan moris to'o ti'an. Nia leno ema nahuu nosi ita, Niakaan ema du'uk. Hanoin di'a-di'ak! Kalo Nia leno ema nahuu nosi ita ema sarani mak Niakaan ema du'uk, oin nunabee tenik ema mak la no'uk simu Niakaan Lia Di'ak? 18 Hakerek Moon na'ak,
“Kalo ema mak moris loos, kre'is la netan moris,
oin nunabee tenik, ema mak tali'ur baa Na'i Maromak?
Oin nunabee tenik, ema mak moris iha sala laran?”b
19 Kalo Na'i Maromak nabusik ita hetan susar tuir Niakaan hakara, ita bele fiar ha'ak, Nia nanis daka ita. Nia mak nase'i ita. Nia nanis nalo tuir saa mak Nia dale. Tan lia nia, ita keta hanawa halo lia loos.