Lia tate'an bodik feen-la'en sia
3
Feto mak noo la'en sia! Ohin nia ha'u katak ka'ak, ita musti hanono baa ema makaer ukun. Nunia moos, emi musti hanono baa emikaan la'en. Noo mane balu mak la no'uk tuir Maromak Manfatin. Masik sia la no'uk rona feen lia fuan, mais kleu-leur sia bele fila baa Na'i Maromak tan naree feen moris dalan.a 2 Sia naree feen nala'o lia hotu-hotu nodi neon loos no moon iha Na'i Maromak oin.3 Feto siakaan kabaas la mai nosi luan. La mai nosi nahilas aan nodi fuuk ilas oi-oik. La mai nosi nafutar aan hodi mean no mutin. La mai nosi tau faru mak folin todan.b 4 Lia mak nalo feto sia dadi kabaas, mai nosi neon no laran du'uk. Mai nosi laran di'ak no neon mamatek. Masik ferik ti'an moos, kabaas nohuun. Na'i Maromak nanis tonu kabaas mak oin nunia. 5 Uluk aan, noo feto moon mak kabaas nunia. Sia naloon baa Na'i Maromak no nanono baa siakaan la'en. 6 Knaninuk nu'u Bei Sara. Nia nanono baa la'en Abraham. Nia moos simu la'en babilan nia. Emi feto sia, musti tuir Bei Sara. Kalo halo lia mak loos, lalika hata'uk sa-saa.c
7 Nunia moos, mane mak noo feen sia! Moris neon ida ho emikaan feen. Tetu di'a-di'ak saa mak di'ak bodik nia, hotu halo tuir. Hakneter nia iha lia hotu-hotu, tan feto niakaan babelen seluk no mane. Hodi nunia, emi rua simu bele-bele moris mak Na'i Maromak nakara foo baa emi nosi Niakaan laran di'ak. Mais mane musti moris neon ida no feen, nebee Na'i Maromak rona emikaan hamulak.d
Lalika sarebak kalo hetan susar tan halo lia loos
8 Mamaluk sia! Lia rohan nune'e: Emi musti moris neon ida. Kalo emi ida netan susar, emi rumak sia musti tuir horan. Kalo noran neon di'ak, emi rumak sia moos musti tuir horan. Hadomi mamaluk makfiar sia. Haraik aan hodi hatudu laran di'ak baa malu. 9 Keta selu aat hodi aat. Kalo ema nasalak emi, keta selu hikar. Mais husu nebee Na'i Maromak natuun matak-malirin baa ema nia. Hodi nunia, Na'i Maromak moos natuun matak-malirin baa emi, tan Nia bolu emi atu halo lia di'ak nunia. 10 Hakerek Moon na'ak,
“Ema mak buka moris manek,
ema mak nakara otas naruk,
nia musti daka ibun di'a-di'ak,
nebee keta to'o nia dale lia aat no lia tolek.
11 Nia musti nalo neon aat, hotu nanawa nalo aat.
Nia musti nakfilas, hotu nalo lia loos.
Nia musti buka dalan atu moris dame malu no ema,
no buka dalan atu moris di'ak malu no ema.
12 Itakaan Na'in tau matan
baa ema mak moris loos.
Nia moos rona siakaan hamulak.
Mais Nia se'i kotuk baa
ema mak moris aat.”e
13 Kalo emi halo lia loos bei-beik, la noo ema ida kois mak atu selu aat baa emi. 14 Kalo ema nasusar emi tan halo lia loos, emi sotir. Keta hata'uk. Keta neo-neon.f 15 Hakmatek neon dei, hodi foti-hahaas Kristus iha emikaan neon tan Nia mak emikaan Na'in.
Kalo ema nusu emi halore lia nosi emikaan fiar, emi musti hadi'a aan hataa. Nunia moos, kalo ema nusu emi halore tan saa emi haloon baa Kristus.g 16 Mais hataa hodi lia mamar. Hakneter sia, nebee sia natene emi halo lia loos hodi neon moon. Hotu, kalo ema dale nahaat emi, tan emi talin malu ho Kristus, kleu-leur sia noran moe tan emikaan hahalok di'ak nia sia. 17 Hanoin! Kalo hetan susar tan halo lia loos, lia nia di'ak, kalo Na'i Maromak nakara. Lia nia di'ak liu nosi hetan susar tan halo lia sala.
18 Kristus mate dala ida dei,
atu kasu nola ema raiklaran salan.
Nia mak moris loos,
mate bodik ema mak moris kale'uk aan.
Nia mate, nebee emi bele di'ak hikar no Na'i Maromak.
Nia, ema raiklaran mak bele mate nu'u ita.
Ema no'o Nia,
mais Maromak Kmalar nalo Nia moris nikar.
19 Oras Kristus moris nikar, Maromak Kmalar nodi Nia baa nanorin matebian sia mak nein iha fatin ida hanesan bui. 20 Matebian nia sia, ema uluk aan mak moris iha raiklaran baa Noh oras. Sia la no'uk nanono baa Maromak. Baa oras nia, Noh nalo roo boot ida. Hotu Na'i Maromak nei-nein atu naree ema nia sia atu nanono baa Nia ka, lale. Mais sia la no'uk. Tan baa nia, ema na'in walu dei mak sasin nosi motasa'e boot nia.h 21 Wee nosi motasa'e nia dadi knaninuk baa emi, baa oras emi hetan sarani hodi wee. Wee nia natudu na'ak Na'i Maromak sori emi, nodi beran nosi Yesus Kristus mak moris nikar ti'an. Baa oras emi hetan sarani, ema la nariis emi atu namoos emikaan isin. Lale! Baa oras emi hetan sarani, emi hameno baa Na'i Maromak atu hamoos emikaan neon, nebee emi bele moris halo lia loos. 22 Oras ne'e, Yesus namaan aan sa'e baa lale'an ti'an. Iha nebaa, Nia nabesi aan iha fatin mak kneter kaliuk iha Na'i Maromak sorin kwana. Tan lia nia, makbukar lale'an sia, makaer ukun sia, no makaer beran hotu-hotu, musti nanono baa Nia.