Ha'u kakerek ne'e bodik emi, ema Yahudi mak tuir Na'i Yesus ti'an, mak nein iha fatin hotu-hotu iha ema rain.^{a b}

2 Ha'ukaan mamaluk sia! Ha'u kakara katak lia nune'e: kalo hetan susar oi-oik, keta neon ki'ik. Simu hodi neon boot, tan noo folin. 3 Tan ita hatene ha'ak, kalo ita terus susar hodi fiar baa Na'i Maromak bei-beik, itakaan neon nanis hetak biit. 4 Tan baa nia, ita lalika halai hela susar. Mais ita terus susar, to'o mohu. Hodi nunia, itakaan fiar dadi tetuk, no ita la mukit kois.

5 Kalo ita horan benar no la hatene dalan nabee mak di'ak bodik ita, ita bele husu matenek hosi Na'i Maromak. Nia nanis foo nodi laran maluak, tan Nia nakara ita husu baa Nia nunia. 6 Mais keta husu hodi neon ruak. Fiar tebe-tebes ha'ak, Na'i Maromak bele foo saa mak ita husu. Kalo ita husu hodi neon ruak, itakaan fiar dadi hanesan laloran mak anin nuu nakdiuk sa'e-tuun, la tuir dalan. 7-8 Ema mak maus nawae nunia, la kaer metin lia loos iha siakaan moris. Keta haneo Na'i Maromak atu tulun ema oin nunia.

9 Ema mukit mak fiar baa Na'i Yesus musti neon boot, tan Na'i Maromak foti sia ti'an dadi baa Niakaan ema. 10-11 Ema maksoin mak fiar baa Na'i Yesus moos musti neon boot, tan Na'i Maromak nanorin sia nebee keta loko aan. Oras ne'e, sia natene siakaan sasoin iha la oras dei, hanesan ai funan fuik mak nafuna kabaas. Mais la oras loro tunu, maran mohu. Nunia moos, maksoin siakaan sasoin.^c

12 Ema mak terus susar to'o nakbois, sia sotir, tan nosi ikus, sia simu saseban mak Na'i Maromak nameno ti'an bodik ema mak nadomi Nia. Sia atu simu moris nima-nimak nosi Na'i Maromak, hanesan ema mak netan nola fafa'ek sita malu, simu sabeo sita malu.

13 Hanoin! Kalo emi kona sokur to'o beer halo sala, keta dale ha'ak, “Na'i Maromak mak koko ha'u.” Tan Na'i Maromak la dala ida beer nalo sala. Nia moos la koko ema atu nalo sala. 14 Tan sala sai nosi ema neon du'uk. Ema beer nalo aat, hotu sia feur kakutak baa lia aat. 15 Sia nakotu atu nalo aat, hotu nalo tuir kakotun aat nia. Mais nosi ikus, Na'i Maromak natuun ukun mate baa ema mak nalo aat nunia.

16 Mamaluk sia mak ha'u kadomi! Keta kona be'ur tan lia ne'e sia.

17 Lia aat sia la mai nosi Na'i Maromak. Mais matak-malirin no lia di'ak hotu-hotu tuun mai nosi Nia. Nia mak nase'i loro no fulan no fitun sia. Buat nia sia lori baa-mai iha lale'an, no siakaan lalatak seluk aan nohuun. Na'i Maromak mesan mak la seluk aan. 18 Na'i Maromak lia kakotun bodik ita nune'e: Nia foo Niakaan Manfatin loos baa ita. Nia moos nodi Manfatin nia, foo moris baa ita. Nosi hotu-hotu mak Nia nase'i iha raiklaran ne'e, Nia boi nola ita dadi baa Niakaan liman rasan ulun.

19 Mamaluk sia mak ha'u kadomi! Ha'u katak lia nune'e: keta dale, surak dale. Di'ak liu, hanono ema seluk di'a-di'ak. Keta kanarak karin. 20 Tan ema mak kanarak la bele moris loos tuir Na'i Maromak hakaran.

21 Tan baa nia, emi musti sunu mohu sala hotu-hotu nosi emikaan moris, nu'u ema nafaho to'os, hotu sunu krehut sia. Hakraik aan simu Maromak Manfatin, tan Manfatin nu'u fini mak Nia furi baa emikaan neon. Kalo emi simu nunia, Nia sori emi nosi sala, no foo moris nima-nimak baa emi.

22 Kalo emi hatene Maromak Manfatin ti'an, emi musti halo tuir. Keta rona loos dei! Kalo emi rona mais la halo tuir, emi tolek aan du'uk. 23-24 Tan ema mak rona Maromak Manfatin mais la nalo tuir, nia nu'u ema mak leno oin baa lalenok, hotu se'i kotuk baa lalenok nia, nalu'a kedas ilas. 25 Keta nunia! Emi musti leno di'a-di'ak Maromak Manfatin, tan Manfatin nia tetuk. Kalo emi hanono hodi hala'ok hotu Manfatin nia, Na'i Maromak nanis natuun matak-malirin baa emikaan hahalok hotu-hotu. Keta to'o Manfatin nia tama tilun karuk, borut tilun kwana!

26 Kalo ema ida nafolin aan ema moon, mais nia la natene daka ibun, ema nia be'ur du'uk aan! Niakaan moris moon nia, butan dei. 27 Ema mak tebe-tebes moris moon, nia moris loos no moon iha Ama Maromak oin. Nia tulun ina faluk no lawarik kiak sia. Nia la nanono baa ema raiklaran sasu'at.