Na'i Maromak eman moos
2
Tan lia nia sia, emi keta halo aat ona. Keta halo kli'is ho ema. Keta oin-kotuk. Keta hirus ema. Keta dale hahaat ema. Soe lakon lia aat nia sia hotu-hotu! 2 Kau mea oan buka inan susun ween. Nunia moos, emi musti buka Maromak Manfatin, tan Manfatin nia nalo emikaan fiar hetak kleur, hetak biit. Hodi nunia, emi dadi hanesan ema matas mak nalo tuir Na'i Maromak hakaran hotu-hotu. 3 Emi bele nunia, tan emi horan hola ti'an itakaan Na'in laran di'ak.a4 Emi musti talin aan ho Kristus, tan Nia nu'u fatuk ida mak foo moris. Badaen sia foti soe fatuk nia, tan sia naneo, fatuk nia folin lalek. Mais Na'i Maromak nafoli kaliuk fatuk nia, nodi boi nola dadi baa fatuk tatuur mak folin kaliuk. 5 Oras ne'e, Na'i Maromak moos nalo emi hanesan fatuk mahoo moris. Nia boi nola emi, nodi nariik uma bodik Niakaan Kmalar. Nia moos nalo emi hanesan na'ilulik mak moris moos, nebee bele sera baa Nia. Kalo emi sera emikaan moris baa Nia, emikaan sera nia nanis nalo Nia neon di'ak, tan Yesus Kristus buka dalan ti'an bodik emi. 6 Hakerek Moon na'ak,
“Mana lai! Ha'u krai fatuk tatuur ida
iha kota Yerusalem ne'e,
mak ema temi na'ak, ‘kota Sion’.
Ha'u du'uk mak kboi kola fatuk nia.
Ha'u kafoli Nia liu resik.
Ema mak fiar baa Nia,
la moe kois.”b
7 Yesus, mak fatuk nia. Ema mak fiar baa Nia, sia nafoli Nia liu resik. Mais ema mak la fiar baa Nia, sia la nafoli Nia. Hakerek Moon na'ak,
“Fatuk mak badaen sia soe nia,
oras ne'e dadi baa fatuk tatuur,
mak folin kaliuk.”c
8 Hakerek no na'ak,
“Noo fatuk ida mak nalo ema sidi ain.
Noo fatuk ida mak nalo ema nakloti tan.”d
Ema nakloti, tan sia la no'uk nalo tuir Maromak Manfatin. Hodi nunia, sia netan sotir aat.
9 Mais emi oin seluk hosi sia. Na'i Maromak du'uk boi nola emi dadi baa Niakaan renu. Nia boi nola emi atu dadi ema hunun ida mak moris moos no serwisu hanesan na'ilulik mak naliku na'i. Nia nalo emi nunia, nebee emi katak lema rai hosi lia di'ak mak Nia nalo ti'an bodik emi. Nia bolu emi atu la'o hela lia aat, nebee moris tuir lia di'ak, hanesan emi sai hela makukun, atu moris iha Niakaan kroman kabaas.e 10 Uluk, emi hanesan ema uma ida mak folin lalek. Mais oras ne'e emi tama dadi ti'an baa Na'i Maromak eman uma laran. Uluk, emi la ho'uk simu Niakaan dodan. Mais oras ne'e, emi simu hola ti'an.f
Daka di'a-di'ak nebee moris loos
11 Mamaluk sia mak ha'u kadomi! Emi ne'e, ema makla'o rai no ema matak iha raiklaran ne'e. Tan nia, ha'u kusu rua-ruan, nebee emi keta tuir ema raiklaran mak nalo aat. Iha ema neon laran, beer halo aat natuda sakar beer halo di'ak. Keta to'o beer halo aat natoba nola emi. Kalo nunia, emi dodok ona! 12 Tan lia nia, emi musti daka aan di'a-di'ak, nebee emi moris loos iha ema mak la natene Maromak klaran. Kalo sia dumar karin emi, sia naree emikaan hahalok di'ak. Hotu, baa oras Kristus namaan aan mai nikar, sia du'uk atu foti-nahaas Na'i Maromak, tan emikaan hahalok di'ak nia.
Ita musti hanono baa makaer ukun sia
13 Itakaan Na'in nakara nebee ita hanono baa ema makaer ukun sia. Nudaar, hanono baa na'in, tan nia mak ulun. 14 Hanono baa gubernur, tan na'in solok nia atu taa ukun baa ema mak nalo aat sia, no tonu ema mak nalo di'ak sia. 15 Na'i Maromak nakara nebee emi halo lia di'ak sia, to'o ema momok mak la natene sa-saa moos, la noo lia krarain kois atu nasalak emi. 16 Emi lahoos ema atan. Emi bele boi atu halo tuir emikaan hakara du'uk. Tebes. Mais keta boi atu halo aat. Boi atu halo di'ak hodi serwisu bodik Na'i Maromak, tan emi dadi baa Niakaan ema ti'an. 17 Hakneter ema hotu-hotu. Hadomi ema mak fiar baa Kristus. Moris tuir Na'i Maromak hakaran, tan nosi ikus Nia mak atu taa ukun baa ema raiklaran. No keta halu'a hakneter ema makaer ukun sia.
Ita terus susar, hodi tuir Kristus Niakaan knaninuk
18 Ema ain-liman sia! Hanono baa emikaan ulun, hodi hakneter sia. Keta hanono loos baa ulun mak laran di'ak dei. Masik ulun lian maka'as moos, emi musti hanono. 19 Masik ulun taa karin ukun moos, kalo emi haterus aan hodi hanoin Na'i Maromak hakaran, nanis Na'i Maromak natudu laran di'ak baa emi. 20 Arumak emi ida kona ta'e tan halo sala, hotu haterus aan, emi hetan sotir saa? La noo! Mais kalo hetan susar tan halo lia di'ak, hotu emi haterus aan, nanis Na'i Maromak neon monu baa emi. 21 Na'i Maromak bolu emi atu moris haterus aan hodi halo lia loos, tan Kristus moos terus susar bodik emi. Nia dadi knaninuk bodik emi, nebee emi la'o tuir Niakaan ain leut. 22 Hakerek Moon na'ak,
“Nia la nalo sala kois.
La noo lia fuan tolek ida moos mak sai nosi ibun.”g
23 Ema dale nahaat Nia, mais Nia la sakar. Sia nasusar Nia, mais Nia la selu nikar. Nia latan isin lolon baa Na'i Maromak liman laran, tan fiar na'ak, Na'i Maromak nia, Makotu Lia moon.h 24 Kristus natiu itakaan salan baa oras mate iha ai karuus. Nia nalo nunia, nebee ita lalika moris hodi halo sala tenik, mais moris hodi halo lia loos dei. Nia selu nola ita, nodi simu nola itakaan kastikar. Hotu Nia netan kanek wa'in, to'o mate. Mais Niakaan kanek nia sia dadi kanek mak nadi'ak nola ita.i 25 Uluk, emi hanesan bibi malae mak la'o sees. Mais oras ne'e, emi fila ti'an baa Na'i Maromak. Nia lituk no naliku emi, hanesan makbalin di'ak lituk no naliku niakaan bibi malae.