Emi moris iha raiklaran ne'e, hafurak aan hodi tuir emikaan beer dei, to'o emi nu'u karau bokur mak ema atu no'o ona. Tan emi taa ukun ti'an hodi ho'o ema di'ak mak la bele sakar emi.

Emi, ema maksoin sia! Hadi'a aan tanis ona, tan susar oi-oik atu kona emi. Emikaan naha sia, atu dodok mohu ona. Emikaan tais kabaas sia, fuhuk atu naa ona. Emikaan mean no mutin sia, atu la noo folin ona. Sia naa fila emi, nu'u ha'i naa ai maran. Raiklaran atu falu fila ona, mais emi sei halau aan libur naha mamuk sia. Tan saa emi beik nunia? Naha mamuk nia sia dadi lia kakaer na'ak, emi la hatene saa mak noo folin iha Na'i Maromak oin!^b

7 Mamaluk sia! Daka di'a-di'ak hodi hein itakaan Na'in namaan aan tuun mai nikar, hanesan ema mafaho rai nein di'a-di'ak to'os isin. Udan uluk fohon tuun, nia furi. Hotu, nia nein udan tau tenik nabokur niakaan ai horis. Kleu-leur ai horis nafua. Oras to'o, nia baa ku'u. 8 Haka'as aan hein nunia. Tan la kleur ona, itakaan Na'in atu namaan aan mai ti'an.

9 Mamaluk sia! Keta hakmuuk malu. Tan ema mak nakmuuk malu nohuun, Na'i Maromak atu taa ukun baa sia! Haree dei, tan Makotu Lia nosi leten, nariik iha odamatan ti'an.

10 Mamaluk sia! Tuir knaninuk nosi Maromak mako'an sia. Masik sia netan susar oi-oik, sia terus bei-beik. 11 Ita mose ema mak terus susar. Knaninuk nu'u Bei Ayub! Nia netan susar oi-oik, mais naterus aan dei. Na'i Maromak neon monu baa nia, to'o Nia babilan nadi'ak hotu-hotu bodik nia. Na'i Maromak nalo nunia, tan Nia laran di'ak no nadomi nia.^c

12 Mamaluk sia! Keta harai aan, tan lia nia, lia boot. Kalo hakara hatebes mamenon ida, lalika harai aan. Kalo mamenon nia tebes, ha'ak “tebes”. Kalo lale, ha'ak “lale”. Nunia to'o ti'an! Keta tu'an tenik, hodi harai aan temi ema raiklaran naran. Saa tenik, harai aan hodi temi Na'i Maromak iha lale'an naran. Keta nunia, nebee emi keta kona kastikar.^d

13 Kalo noo ema nosi ita mak neon susar, di'ak liu namulak. Kalo noo ema nosi ita mak neon di'ak, di'ak liu nananu nodi tonu Na'i Maromak. 14 Kalo noo ema nosi ita mak moras, di'ak liu bolu ema sarani ulun sia. Husu sia tau mina nodi namulak, nebee Na'i Maromak beran nadi'ak nola ema moras nia.^e 15 Kalo hamulak bodik ema moras hodi fiar tebe-tebes baa Na'i Maromak, Na'i Maromak nanis nadi'ak nola ema nia. Kalo ema nia nalo sala, Na'i Maromak moos kasu niakaan salan. 16 Kalo ita katak hasai itakaan salan baa malu no hamulak baa malu, ita bele dadi di'ak.

Hanoin! Kalo ema moon namulak, niakaan hamulak nia noo beran. Na'i Maromak nanis simu. 17 Hola knaninuk hosi Bei Elia. Nia, ema raiklaran nu'u ita. Mais baa oras nia namulak nebee keta udan, udan moos nanawa to'o tinan tolu no balun.^f 18 Nunia hotu, nia namulak tenik nebee udan tau nikar. Udan moos tau kedas. Hae nakmatak, to'os moos noo isin nikar.^g

19 Mamaluk sia! Kalo ema ida nosi ita nalo sala to'o la'o nela Na'i Maromak dalan loos, di'ak liu, mamaluk ida nodi nikar nia baa Na'i Maromak. 20 Hanoin! Kalo ita tulun ema mak nalo sala nebee nia mai nikar baa Na'i Maromak, hotu nia la nalo sala tenik, ita sori ema nia, nebee nia bele moris no Na'i Maromak nohuun. Tan hodi nunia, Na'i Maromak kasu mohu niakaan salan lear.^h

Ha'ukaan hakerek narohan baa ne'e!