Keta tuir raiklaran beer
4
Ha'u krona emi toe malu no hakaat malu. Lia nia sia mosu mai nosi nabee? Lia nia sia mosu mai, tan noo ema iha emikaan klaran mak buka nafurak aan du'uk. 2 Emi harui aan atu hetan buat ida, mais liman la to'o. Hotu emi hirus malu, toe malu no hakaat malu, to'o la hata'uk ho'o ema.Hanoin! Emi la hetan mak emi buka, tan emi la hamulak hodi husu baa Na'i Maromak. 3 Mais kalo emi husu tuir emikaan beer aat du'uk, emi nanis la hetan. Masik hamulak hakotu ai no fatuk moos, emi la hetan.
4 Emi huun, ema mahalo lia kfo'er, nu'u feen-la'en mak nahaat uma kain du'uk. Kalo hametis aan ho raiklaran beer, emi funu Na'i Maromak. 5 Hakerek Moon na'ak, “Na'i Maromak rai Kmalar Lulik baa itakaan neon. Kmalar Lulik beer nebee ita rai tomak neon baa Na'i Maromak.” 6 Na'i Maromak moos nakara foo tu'an Niakaan laran di'ak baa ita. Tan Hakerek Moon na'ak:
“Na'i Maromak sakar ema mak naksa'ek aan,
mais Nia natudu laran di'ak baa ema mak naraik aan.”a
7 Tan Na'i Maromak mak itakaan Ulun, ita musti sera isin lolon baa Nia hodi tuir Niakaan beer. Keta tuir diabu ulun beer, mais musti sakar nia maka'as, nebee nia nalai nela emi. 8 Harui aan atu moris neon mesak ho Na'i Maromak. Hodi nunia, Nia kre'is baa emi.
Emi mak moris kadoor, musti hamoos emikaan moris. Emi mak neon ruak, musti tuir lo-loos Na'i Maromak dalan. Keta sees karuk-kwana. 9 Kleur ti'an emi moris hafurak aan hodi hanasa hahaek. Oras ne'e hanawa ona! Di'ak liu halo neon aat hodi tanis, tan emi neon ruak no emi halo sala ti'an. 10 Kalo emi hatene aan ha'ak, emi la fatan hariik iha Na'i Maromak oin, Nia atu foti emi dadi ema mak fatan iha Niakaan oin.
Keta dale hadois ema
11 Mamaluk sia! Keta dale hahaat malu naran. Kalo dale hahaat malu naran no sasu'at malu, emi hakur Na'i Maromak ukun-badu mak na'ak, “Hadomi maluk nudaar hadomi isin lolon du'uk.” Kalo emi hakur ukun-badu nia, emi haksa'ek aan aas liu Na'i Maromak ukun. 12 Na'i Maromak du'uk mak nakadak ukun nia. Nia mak noo beran atu nakotu itakaan lia. Nia noo beran atu sori ita. Nia moos noo beran taa ukun mate baa ita. Mais emi la hoo beran atu hakotu ema lian. Ne'e na'ak, emi moos la hoo beran atu dale hahaat malu naran.
Keta hameno karin
13 Keta hameno karin ha'ak, “Ohin loron, lale awan, ami baa kota nebaa atu hein tinan ida iha nia. Ami atu baa buka moris iha nebaa!” 14 Keta hameno kedan nunia, tan emi la hatene saa mak atu dadi baa awan. Ema raiklaran moris la oras dei, nu'u ababun tubu, hotu lakon.b 15 Di'ak liu emi dale ha'ak, “Kalo Na'i Maromak nadomi, ita bele moris. Kalo Na'i Maromak nakara, ita bele halo nune'e.” 16 Kalo emi la dale nunia, emi ibun boot loos dei. Emi sala ti'an, tan halu'a lakon Na'i Maromak.
17 Hanoin di'a-di'ak! Ema mak natene lia loos, mais la nalo tuir, nia nalo sala ti'an.