Hakerek bodik ema
Ibrani
mak foin la'o nela siakaan bei uluk hanorin nodi fiar na'ak, Yesus mak Kristus
Na'i Maromak Niakaan Oan maka'as liu Na'i Maromak mako'an uluk sia
1
Uluk, Na'i Maromak nodi Niakaan mako'an sia atu dale no itakaan bei uluk ema Ibrani sia.a Nia dale no sia dala wa'in, nodi dalan oi-oik.b 2 Mais oras ne'e, Na'i Maromak solok Niakaan Oan ti'an, atu dale du'uk no ita.Hori uluk, Na'i Maromak boi nola Niakaan Oan ne'e,
atu kaer ukun namutuk no Nia.
Baa oras Na'i Maromak nase'i lale'an no raiklaran no sasoin hotu-hotu,
Niakaan Oan ne'e namutuk no Nia nase'i hotu-hotu.
3 Niakaan Oan ne'e natudu Maromak Niakaan kabaas,
hanesan loro matan sinak mak tubu nosi lalenok.
Niakaan ilas, oin ida no Maromak.
Hodi Niakaan Manfatin maka'as,
Nia nala'o hotu-hotu iha lale'an no raiklaran.
Nia moos loke dalan
atu kasu mohu ema raiklaran salan,
nebee sia dadi moos.
Hotu Nia namaan aan sa'e baa lale'an,
tuur nabesi aan iha Maromak sorin kwana
iha fatik mak kneter kaliuk.
Na'i Maromak Niakaan Oan maka'as liu Maromak Niakaan makbukar lale'an sia
4 Na'i Maromak Niakaan makbukar lale'an sia maka'as tebes, mais Niakaan Oan mak maka'as kaliuk, tan Nia liu sia hotu-hotu. Na'i Maromak Niakaan kneter-taek, aas kaliuk. Nia latan kneter-taek nia baa Oan. Etuk Niakaan Oan maka'as liu nosi Niakaan makbukar lale'an sia.
5 Dala ida Na'i Maromak dale baa Oan na'ak,
“Ohin loron ne'e, Ha'u kfoti O dadi makaer ukun.”c
Na'i Maromak moos dale na'ak,
“Ha'u ne'e, Niakaan Ama.
Nia moos, Ha'ukaan Oan.”d
Na'i Maromak dale kedan nunia nosi lia Niakaan Oan, mais Nia la dala ida dale nunia nosi lia Niakaan makbukar lale'an sia.
6 Baa oras Na'i Maromak solok Niakaan Oan maka'as kaliuk nia mai raiklaran ne'e, Nia naruka Niakaan makbukar lale'an sia na'ak,
“Hei! Makbukar sia!
Emi musti foo kneter,
hodi lo'u-sudur baa Ha'ukaan Oan!”e
7 Na'i Maromak moos dale lia nosi Niakaan makbukar lale'an sia na'ak,
“Ha'u kase'i Ha'ukaan makbukar lale'an sia,
dadi lais hanesan anin.
Ha'u kase'i Ha'ukaan ata lale'an sia,
dadi hanesan ha'i.”f
Na'i Maromak dale nunia, tan Niakaan makbukar lale'an sia, Niakaan ain-liman dei.
8 Mais Nia dale seluk tenik, nosi lia Niakaan Oan du'uk na'ak,
“O ne'e, Maromak.
O atu tuur baa kadera ukun to'o nima-nimak.
O atu kaer beran nebee ukun modi neon loos.
9 O neon di'ak, kalo O maree ema moris loos.
Mais O neon susar, kalo O maree ema moris kale'uk.
Tan lia nia, Ha'u neon di'ak,
to'o Ha'u kfui mina baa Okaan ulun,
kodi foti O dadi baa Na'i, liu ema seluk sia.”g
10 Na'i Maromak moos dale baa Niakaan Oan na'ak,
“Oa!
O ne'e, Na'i mak ukun kedan hori uluk.
O ne'e, mak maruka to'o lale'an noo kedan.
O ne'e, mak maruka to'o raiklaran dadi kedan.
11 Nosi ikus, lale'an no raiklaran dodok mohu.
Nosi ikus, lale'an no raiklaran lakon mohu.
Mais O du'uk moris nohuun.
12 Nosi ikus, O atu foti soe lale'an no raiklaran,
hanesan ema foti soe tais aat.
Nosi ikus, O atu taruka lale'an no raiklaran,
hanesan ema taruka tais foun.
Mais O du'uk la nunia.
Tan O moris nima-nimak.”h
13 Na'i Maromak moos dale baa Niakaan Oan na'ak,
“Oa!
Mai tuur iha fatik kneter kaliuk
iha Ha'ukaan sorin kwana ne'e.
Ha'u atu kalo Okaan funu sia
to'o lo'u baa O.”i
Na'i Maromak dale kedan nunia nosi lia Niakaan Oan, mais Nia la dala ida dale nunia nosi lia Niakaan makbukar lale'an sia. 14 Niakaan makbukar sia nanis noo folin. Tan Nia solok sia atu baa naliku Niakaan ema hotu-hotu, nebee natudu dalan moris baa sia. Masik makbukar lale'an sia maka'as nunia moos, Na'i Maromak Niakaan Oan liu sia hotu-hotu.