Hetu ibun di'a-di'ak
3
Mamaluk sia! Ema wa'in nakara dadi ema manorik bodik ema makfiar sia. Di'ak dei! Mais hanoin di'a-di'ak, tan Na'i Maromak atu leno ema manorik todan liu ema seluk sia. Dadi keta foti karin ema atu dadi manorik. 2 Ita hotu-hotu maus monu baa sala oi-oik. Mais kalo ema bele netu nola ibun, ema nia bele babilan niakaan moris tomak. 3 Hola hatetek hosi kuda. Ita babilan kuda boot atu tuir itakaan hakara, hodi fare'u loos dei. 4 Hatetek seluk nosi roo. Anin maka'as nuu nakdiuk roo boot, tuir anin nakara. Mais hodi ai fafofen ki'ik oan ida, ema roo bele babilan nola roo tuir niakaan hakara. 5 Nunia moos itakaan ibun. Ibun ki'ik, mais bele nase'i lia boot basuk!
Ha'i lutan oan bele sunu mohu alas boot ida. 6 Nunia moos, itakaan ibun. Ita bele hodi itakaan ibun nahaat lia wa'in, to'o nadodok itakaan moris tomak. Lia aat lear iha raiklaran ne'e sai nosi ema ibun. Diabu ulun moos nodi ema ibun nala'ok niakaan a'aat.
7 Ema bele namaus nola buat fuik sia nu'u asu fuik, samea, manu fuik, no na'an tasi. 8 Mais la noo ema ida mak bele namaus nola ibun. Tan ibun nia, buat mada'ek aat ida. Nia nu'u raso mak nane'e lema isin lolon tomak, to'o no'o ema.
9-10 Hodi ibun mesak ida, ita tonu ema no ita hahaat ema. Lia nia la fatan! Ita hodi ibun tonu Ama Maromak. Hotu ita hodi ibun nia hahaat ema mak Maromak nase'i tuir Niakaan ilas. Tan saa halo nunia?a
11 Wee matan ida la bele nasai wee miis bele-bele no wee meer. 12 Hudi la bele nafua batar. Batar la bele nafuli anggor fuan. Tan ai horis ida-idak nafua tuir niakaan oik du'uk.b Ita la bele kuru wee miis hosi debu wee meer.
Matenek mak mai nosi Na'i Maromak
13 Ema mak hanoin naruk no ema mak kakutak matenek, siakaan lisan nu'u saa? Lisan nune'e. Sia la naksa'ek aan, tan sia natene na'ak, siakaan matenek nia mai nosi Na'i Maromak. Sia natudu matenek nia nodi lisan di'ak. 14-15 Mais ema mak hirus ema no ema mak buka nahonu ema, sia keta loko aan dale na'ak, sia matenek, tan sia dale tolek. Lisan nunia la tuun mai nosi Na'i Maromak, mais mai nosi ema raiklaran beer du'uk no nosi diabu. 16 Ema mak hirus ema no nakaat ema, nanis sia moos tokar lauk no nalo aat oi-oik.
17 Kalo ita simu matenek mak tuun nosi Na'i Maromak, dala uluk, ita moris moon. Hotu lisan nia nahoris kakutak malirin, neon naruk, laran luan, no hahalok di'ak. Lisan nia moos nalo ita la kli'is no la oin-kotuk. Ita hakneter ema no moris mamatek. 18 Kalo ita halo ema dame malu, ne'e na'ak ita furi fini dame mak atu nahoris lia di'ak oi-oik.