Keta fihir oin ha'ak see mak boot, see mak ki'ik
2
Mamaluk sia! Ema mak fiar baa itakaan Na'in maka'as Yesus Kristus, nia la fihir oin. 2 Lia hatetek nune'e: noo ema na'in rua tama baa emikaan uma hamulak. Ida tau faru maksinak. Kadeli mean moos nakonu liman fuan. Mais ida seluk tau faru kadoor. 3 Hotu emi halau aan simu ema mak tau faru maksinak, hodi hatuur nia baa fatin di'ak iha oin. Mais ema mak tau faru kadoor, emi haruka ha'ak, “O mariik iha kotuk baa!” Lale emi haruka ha'ak, “Tuur baa rai dei!” 4 Keta nunia! Tan kalo emi fihir oin nunia, emi nu'u makotu lia mak la moon. Kakutak aat dada nola emi ti'an.5 Mamaluk sia mak ha'u kadomi! Na'i Maromak boi ema mukit iha raiklaran ne'e, nebee siakaan fiar bele dadi hanesan sasoin. Nia moos boi sia tama baa Niakaan hutun-renu, tuir saa mak Nia nameno bodik ema mak nadomi Nia. 6 Mais kalo emi fihir oin nunia, emi hahaat ema mukit sia, masik sia la nalo aat baa emi. Emi halu'a ti'an see mak tonan emi? Lahoos ema mukit, mais maksoin mak nase'i lia, hotu dada nakdiuk emi baa moon-metan. Sia mak netan midar, emi hetan mamuk. 7 Emi ne'e, Na'i Yesus eman. Mais maksoin sia nahaat Niakaan naran. Tan saa emi hani'is aan ho sia?
8 Di'ak liu, tuir ukun-badu kabaas iha Hakerek Moon mak na'ak, “Hadomi ema seluk, nudaar hadomi isin lolon du'uk.”a 9 Hanoin! Kalo emi fihir oin no hola loos maksoin neon, emi hakur ukun-badu nia ti'an. 10 Ema mak moris nalo tuir hotu Na'i Maromak Ukun-badu, mais nakur ukun-badu ida ne'e, nia nakur nola Ukun-badu hotu-hotu. 11 Tan Na'i Maromak naruka na'ak, “Keta hakur biti-kluni.” Nia moos na'ak, “Keta ho'o ema.” Ne'e na'ak, kalo emi la hakur biti-kluni, mais emi ho'o ema, emi hakur hola Ukun-badu hotu-hotu.b
12 Tan lia nia, kalo emi hakara dale lia ida, musti hanoin uluk nune'e: Na'i Maromak mak atu nakotu na'ak, ita tuir Niakaan Ukun-badu ka, lale. Niakaan Ukun-badu bele sori ita nosi Niakaan hahibun, surak ita tuir hotu. 13 Na'i Maromak la titu ema mak dadomin lalek. Mais kalo ita hadomi ema seluk, Nia moos nadomi ita. Ita lalika hata'uk Niakaan kastikar, tan Nia sura hotu ti'an.
Kalo ita fiar tebe-tebes baa Na'i Maromak, ita halo lia di'ak
14 Mamaluk sia! Kalo ema ida dale na'ak, nia fiar baa Na'i Maromak, mais nia la nalo lia di'ak, niakaan fiar nia la noo folin. Fiar oin nunia, la bele sori nia. 15 Lia hatetek nune'e: Noo maun mak mukit, lale, biin mak mukit. Sia la noo tais, la noo haan bodik haa. 16 Mais emi la tulun sia. Emi dale loos ha'ak, “La'o di'a-di'ak, lale anin tama! Keta mate salaen! Nebee Na'i Maromak natuun matak-malirin baa o!” Kalo emi dale nunia mais la tulun sia, folin saa? La noo!
17 Kalo emi dale ha'ak emi fiar, mais emi la halo tuir emikaan fiar nia, lia nia la to'o dauk. Fiar oin nunia, lahoos ‘fiar’. Tan fiar nunia la noo folin, nu'u fiar mak mate ti'an.
18 Noo ema foti lia na'ak, “Ema balu fiar baa Na'i Maromak, mais sia la nalo di'ak. Balu tenik, nalo di'ak, mais sia la nodi Maromak.” La bele nunia! Tan hahalok di'ak natudu itakaan fiar isin. Kalo o la malo hahalok di'ak, ha'u la kbele karee okaan fiar isin. Tan ita hatudu itakaan fiar isin hodi itakaan hahalok di'ak. 19 Emi fiar hanorin mak na'ak, “Na'i Maromak, ida dei. Seluk la iha.” Tebes! Hanorin nia loos! Mais diabu sia moos fiar hanorin nia, to'o sia kiki no nata'uk. Mais siakaan fiar la no isin, tan sia la nalo di'ak kois. Dadi keta haneo ha'ak, fiar hodi kakutak dei to'o ti'an. 20 Lale! Fiar mak la noo isin, la noo folin. Lia nia malorek ti'an!
21 Hola knaninuk hosi itakaan bei uluk Abraham. Na'i Maromak naruka nia atu sera oan du'uk. Bei Abraham moos tuir haruka nia, to'o nodi oan Isak sera iha taroman leten. Tan baa nia, Na'i Maromak nafoli na'ak, “Abraham nia, ema loos.”c 22 Abraham fiar baa Na'i Maromak to'o nala'ok haruka nia. Hodi lia kakaer nia, ita hatene niakaan fiar nia tetuk no nesan. 23 Lia ne'e sia hotu-hotu nato'o lia iha Hakerek Moon mak na'ak, “Abraham fiar baa Na'i Maromak. Hotu Na'i Maromak nafoli nia na'ak, ema loos.” Noo tenik hakerek na'ak, “Abraham nia, Na'i Maromak belun.”d
24 Lia ne'e malorek ti'an. Na'i Maromak nafoli ema na'ak, ema loos, kalo noo hala'ok di'ak mak natudu siakaan fiar isin. Tan fiar loos dei, la to'o.
25 Knaninuk seluk nosi Ina Rahab, mak uluk feto aat. Baa oras ema Yeriko sia buka ema Isra'el siakaan ema mak nateke sia, Rahab subar sia. Nia naruka sia nalai sai nosi kota tuir dalan seluk, nebee ema keta kohi sia. Tan Rahab niakaan hahalok di'ak nia, Na'i Maromak nafoli nia na'ak, ema loos.e
26 Hanoin! Kalo ita dale ha'ak ita fiar baa Na'i Maromak, mais ita la halo lia di'ak, itakaan fiar nia la no folin. Fiar nia, nu'u isin lolon mak la no nawan, tan mate ti'an.