Ita musti moris di'ak ho malu
13
Mamaluk sia! Noo lia hira mak ha'u atu kfoo katene baa emi nune'e:Keta halu'a hadomi malu nohuun.
2 Keta halu'a atu halua laran simu ema iha emikaan uma. Dala ida mamaluk na'in hira simu ema nunia, mais sia natene nodi baa, ema nia sia, Na'i Maromak Niakaan makbukar lale'an.a
3 Keta halu'a tau matan baa ema iha bui. Musti tulun sia, hanesan emi du'uk mak kona kohi.
Keta halu'a tulun ema mak kona tonan. Haliku sia di'a-di'ak, hanesan emi du'uk mak kona tonan nia.
4 Hafoli lia feen-la'en, tan lia nia, lia moos. Keta to'o lia moos nia, dadi sasobo. Na'i Maromak nanis kastikar ema mak nakur biti-kluni.
5 Keta rotus osan. Emi musti horan to'o baa saa mak emi hoo. Tan Na'i Maromak dale ti'an na'ak,
“Ha'u la kalu'a kedan emi.
Ha'u la kla'o kela emi.”b
6 Dadi hakbiit emikaan neon, hanesan noo ema nakerek na'ak,
“Tan ha'ukaan Ulun mak tulun ha'u,
ha'u la kata'uk.
Masik ema koko ha'u moos,
ha'u la kakoen.”c
Keta haloon hikar baa ukun-badu tuan, mais fiar baa Kristus nohuun
7 Keta halu'a baa sarani ulun sia mak nanorin Maromak Manfatin baa emi. Hanoin siakaan moris dalan di'a-di'ak, hodi haninu siakaan fiar. Tan sia fiar na'ak:
8 Yesus Kristus la filas aan kedan.
Nia nafati hori uluk,
oras ne'e, to'o nima-nimak.
9 Tan lia nia, keta tuir hanorin kale'uk. Na'i Maromak nakbiit emikaan neon ti'an, nodi natudu laran di'ak baa emi. Nia nalo nunia, mais lahoos tan emi tuir ukun-badu haa-hemu mak la noo folin.
10 Uluk aan, iha Na'i Maromak Niakaan Batane Hamulak lalawar, noo sera fatik bodik ema natetu sera tunun baa Na'i Maromak. Na'ilulik mak naliku iha Batane Hamulak nia, bele naa na'an sera iha sera fatik nia. Mais oras ne'e, ita hoo sera fatik seluk.d Na'ilulik tuan la bele naa iha nia. 11 Uluk, sura tinan na'ilulik boot nodi sera tunun raan, baa natetu iha Na'i Maromak Ke'an Lulik Kaliuk. Hodi nunia, Na'i Maromak nalu'a lakon siakaan salan. Nola raan hotu, sia nodi isin baa tunu iha kota luan.e 12 Yesus moos nunia. Nia dadi baa sera, nebee Na'i Maromak kasu mohu ema raiklaran salan. Baa oras nia mate, ema moos dada nodi Nia atu baa no'o iha kota Yerusalem luan. 13 Tan lia nia, ita musti mai baa Yesus hodi fiar Nia nohuun. Masik ema nahaat ita, ita simu dei, hanesan Nia. 14 Ita hein heik iha raiklaran ne'e. Mais ita haloon, nebee hein iha lale'an to'o nima-nimak. 15 Tan Yesus dadi sera ti'an bodik ita, ita lalika buka sera tunun ona atu hatetu baa Na'i Maromak. Mais ita musti hatetu sera tonun mak foti-nahaas Niakaan naran. 16 No tenik, keta halu'a halo lia di'ak bodik ema seluk. Kalo sia buka saa, tulun baa. Hahalok nunia sia hanesan sera mak nalo Na'i Maromak neon di'ak.
17 Musti hanono baa sarani ulun hotu-hotu mak naliku emi, tan sia daka emikaan kmalar loron-kalan. Nosi ikus, sia musti nataa nosi siakaan serwisu iha Na'i Maromak oin. Dadi, rona baa sia di'a-di'ak, nebee sia bele nataa nodi neon di'ak. Keta to'o sia nataa nodi neon dodok, tan emi la'o hela Kristus dalan moris. Tan kalo nunia, emi la sotir ona.
Ema mak nakerek ne'e, namulak bodik ema Ibrani
18 Mamaluk sia, keta halu'a hamulak bodik ami. Ami hatene amikaan neon loos nanis. Ami moos beer halo lia di'ak nohuun. 19 Kaliuk tenik, hamulak nebee ha'u kbele fila lai-lais baa emi.
20-21 Na'i Maromak nia, mak nalo ita neon noku. Ha'u kakro'an, nebee Nia tulun emi to'o emi bele halo tuir Niakaan hakara hotu-hotu. Nebee, Nia moos tulun ita hotu-hotu, to'o dadi baa ema mak nalo Nia neon di'ak. Na'i Maromak nodi Yesus Kristus raan mak nakduar, atu namate menon foun no ita. Mamenon nia nafati to'o nima-nimak. Na'i Maromak moos nalo itakaan Na'in Yesus Kristus moris nikar. Oras ne'e, Yesus Kristus naliku ita hanesan makbalin maka'as. Etuk, ita foti-hahaas Niakaan naran, hodi tonu Nia nohuun! Tebes!
Dame
22 Mamaluk sia! Ha'u kusu nebee emi simu ha'ukaan hakerek ne'e hodi laran maluak. Hakerek ne'e, badak dei. 23 Ha'u kbeer nebee emi hotu-hotu hatene ha'ak, itakaan maluk Timotius sai nosi bui ti'an. Kalo nia mai lai-lais baa ha'u, ami rua bele-bele baa emi.
24 Ha'u ksolok dame baa emikaan ulun sia, no emi hotu-hotu mak fiar baa Yesus Kristus. Mamaluk sia nosi rai Italia moos solok siakaan dame.
25 Ha'u kakro'an, nebee Na'i Maromak natudu laran di'ak baa emi hotu-hotu.
Nunia dei.