12
Dadi nunabee, baa ita mak sei moris ne'e? Ita hanesan ema mak nalai sita. Itakaan bei uluk mak fiar baa Na'i Maromak, sia hanesan ema mahobun mak nariik nalik, atu foo babiit baa ita. Mais kalo ita sei tatalik ho sala, ita halai todan. Ita musti soe hela sala hotu-hotu, nebee ita bele halai biit. Na'i Maromak du'uk mak boi ita atu tuir sita malu ne'e. Dadi ita musti haterus aan halai to'o marak rohan. 2 Ita moos musti hatutuk matan baa Kristus dei, keta titu karuk-kwana. Nia mak loke dalan nodi tulun ita, nebee ita bele fiar baa Na'i Maromak. Hanoin ka, lale? Baa oras Yesus terus susar iha ai karuus, ema tolak nahaat Nia, mais Nia naterus aan bei-beik. Nia natene, kalo susar nia siku, Niakaan neon di'ak ona. Lia nia tebes. Nia mate, hotu Na'i Maromak foti Nia atu nabesi aan iha Na'i Maromak sorin kwana, nebee Sia rua kaer ukun bele-bele. 3 Masik ema nalo aat baa Nia moos, Nia naterus aan dei. Keta halu'a Yesus Niakaan susar ne'e, nebee emi moos bele haterus aan bei-beik.Na'i Maromak de'an ita atu nanorin ita, hanesan ama de'an oan atu nanorin oan
4 Emi sakar lia aat sia ti'an, mais sei la sakar maka'as to'o emikaan raa nakduar. Nunia tebes ka? 5 Arumak emi halu'a Na'i Maromak Manfatin mak Nia katak ti'an baa emi, hanesan aman dale baa oan na'ak,
“Oa!
Kalo Na'i Maromak taa ukun atu nodi nanorin o, nebee o moris tuir dalan loos,
keta titu haraik!
Kalo Nia de'an o atu nanorin o,
keta neon ki'ik.
6 Tan Na'i Maromak de'an ema mak Nia nadomi.
Tebes! Ema hotu-hotu, mak Nia simu dadi baa Niakaan oan,
Nia nanis de'an atu nanorin.”a
7 Tan baa nia, kalo Na'i Maromak de'an emi atu nanorin emi nebee moris tuir dalan loos, haterus aan baa. Nia nalo nunia, tan emi ne'e, Niakaan oan. Aman musti de'an oan atu nanorin oan, to'o natene moris tuir dalan loos. 8 Kalo Na'i Maromak la de'an emi nodi nanorin emi nu'u Niakaan oan seluk sia, ne'e na'ak, emi lahoos Niakaan oan.
9 Ita nanis hanono baa itakaan ama susun iha raiklaran ne'e, tan nia mak de'an no nanorin ita baa oras ita sei ki'ik. Lia nia loos. Mais ita musti hanono baa Na'i Maromak liu tan tenik, tan Nia, itakaan Ama iha lale'an. Nia de'an no nanorin ita, nebee ita moris tuir Niakaan dalan loos. 10 Itakaan ama susun de'an no nanorin la oras dei tuir saa mak nia naneo di'ak. Mais Na'i Maromak natene tebe-tebes lia saa mak ita musti hatene. Nia de'an no nanorin ita, nebee ita moris loos hanesan Nia. 11 Kalo ita kona de'an, la midar nanis. Mais kleu-leur itakaan neon moos noku, tan ita hatene ti'an atu moris tuir Na'i Maromak beer.
12-13 Mamaluk sia! Hakbiit liman mak kole ti'an. Hamaan ain mak todan ti'an. Keta halai kali aan, mais halai hatutuk, nebee ema mak kole karin ti'an moos, netan babiit atu nalai bei-beik. Hakbiit neon atu haterus aan bei-beik hodi fiar baa Kristus.b
Keta dudu Na'i Maromak laran di'ak
14 Mamaluk sia mak fiar baa Kristus! Emi musti hariik metin moris di'ak ho malu. Harui aan maka'as moris moos, tan ema mak la moris moos, la bele naree Maromak.
15 Hakbiit malu neon, nebee keta to'o emi balu se'i kotuk baa Na'i Maromak no la horan Niakaan laran di'ak. Daka di'a-di'ak, nebee keta rai hirus baa malu. Hirus malu nia, hanesan raso moruk mak nahaat ita.c 16 Daka di'a-di'ak, nebee keta emi ida nalo lia kfo'er. Nebee keta titu haraik Na'i Maromak, hanesan Bei Isak oan ulun Esau. Baa loron nia, Esau fila nodi salaen, hotu nusu haan bikan ida nosi alin Yakob. Tan Esau salaen basuk, nia fa'an niakaan beran oa ulun, bodik sosa haan bikan ida.d 17 Mais la kleur, Esau neon sadi'a. Baa oras aman Isak atu nusu Na'i Maromak foo matak-malirin oa ulun baa Esau, Isak la bele nusu tenik bodik Esau ona, tan Esau soe butan niakaan beran oa ulun nia ti'an. Masik Esau tanis nanse'ur aan moos, nia la bele netan nikar.e
18 Lia nune'e, mamaluk sia! Ita bele mai baa Na'i Maromak tuir dalan foun mak Nia loke ti'an bodik ita. Uluk aan, bei uluk sia la bele nunia. Baa oras Na'i Maromak namate menon no sia, sia nein kre'is baa foho ida naran Sinai. Iha foho leten nia, ha'i laka no anin dadurus. Nakukun luri moos nakalus nola foho nia, to'o sia nata'uk tebe-tebes. 19 Baa oras nia moos, sia rona kfui lian. Hotu, Na'i Maromak lian maka'as sai nosi foho nia. Rona nola nunia, sia hetak nata'uk, to'o nusu baa Bei Musa na'ak, “Adeei! Ami la bele terus rona lia maliak ne'e ona!”f 20 Tebes! Sia la bele terus, tan lia mak Na'i Maromak naruka nia, todan liu resik. Nia katak na'ak, “La bele sama foho ne'e. Masik ema raiklaran ka, osa ka, lotuk ka, la bele! See mak sama, musti kona tuda fatuk to'o mate.”g 21 Tebes. Saa mak sia naree iha foho nia, nalo sia nata'uk tebes. To'o Bei Musa du'uk moos kiki tan nata'uk.h
22 Mais oras ne'e, dalan baa Na'i Maromak nakloke ti'an to'o ita bele dale du'uk ho Nia. Oras ne'e, ita mai iha foho ida naran Sion. Iha nia moos noo kota Yerusalem. Lahoos kota Yerusalem iha raiklaran, mais kota Yerusalem foun iha lale'an, mak Na'i Maromak Niakaan tofatik. Iha nia, Niakaan makbukar lale'an wa'in lo-loos nadahur bele-bele. 23 Kota nia moos dadi baa libur malu fatik, bodik ema hotu-hotu mak fiar baa Kristus. Na'i Maromak nalo hakerek iha lale'an atu nakerek siakaan naran ida-idak. Iha nia, Na'i Maromak atu leno nodi tetu ema hotu-hotu moris. Iha nia moos, libur malu fatik bodik ema hotu-hotu mak uluk aan Na'i Maromak simu tan siakaan fiar. 24 Iha nia moos, Yesus dadi baa ailalete bodik Na'i Maromak no ema raiklaran. Yesus mate naduar raan, nebee Na'i Maromak namate menon foun no ita. Yesus raan nia nalirin Na'i Maromak neon. Mais, Yesus raan seluk nosi Habel raan. Iha lia Kain no Habel, ita hatene ha'ak, baa oras Kain no'o Habel, Habel raan mak nakduar nia, nalo Na'i Maromak laran manas, to'o natuun kastikar baa Kain.i
25 Ta'an tilun, rona di'a-di'ak saa mak Na'i Maromak atu dale baa emi. Keta halo nu'u bei uluk sia mak dudu sees Bei Musa dalen, baa oras nia dadi Maromak mako'an iha raiklaran. Etuk, Na'i Maromak natuun kastikar baa sia. Saa tenik no ita! Kalo ita la ho'uk rona Niakaan dale nosi lale'an, Nia atu natuun kastikar todan liu baa ita.j 26 Baa oras itakaan bei uluk sia nariik iha foho Sinai, Na'i Maromak lian maka'as to'o nalo rai kakekuk. Oras ne'e, Nia nameno na'ak,
“Ha'u atu kalo raiklaran kakekuk dala ida tenik,
mais lahoos raiklaran mesan mak kakekuk dei,
tan lale'an moos nakdoko tuir.”k
27 Baa oras Na'i Maromak dale na'ak, Nia atu nalo hotu-hotu nakdoko “dala ida tenik”, ne'e na'ak, Na'i Maromak atu doko hotu-hotu mak Nia nase'i ti'an iha lale'an no raiklaran, to'o mak la bele naterus aan, lakon mohu. Hodi nunia, mak bele naterus aan atu nein nafati.