3 Ita fiar ha'ak, Na'i Maromak mak nase'i raiklaran no lale'an mak ita haree baa oras ne'e. Nia nase'i lahoos nodi buat mak iha kedan mak ema raiklaran bele naree, mais nase'i nodi Niakaan Manfatin dei.^a

4 Tan Habel fiar, nia nodi sera baa Na'i Maromak mak di'ak liu sera nosi maun Kain. Na'i Maromak simu di'a-di'ak Habel no niakaan sera nia, tan nafoli Habel na'ak, ema loos. Masik Habel mate kleur ti'an moos, ita sei bele hanorin aan hosi niakaan fiar nia.^b

5 Tan Henok fiar, Na'i Maromak foti sa'e nia baa lale'an, nebee nia lalika mate. Ema buka nia, mais la netan, tan Na'i Maromak foti sa'e nia ti'an. Na'i Maromak simu di'a-di'ak Henok, tan nafoli nia na'ak, “Henok ne'e, ema mak nalo Ha'u neon di'ak.”^c

6 Lia nune'e, mamaluk sia! Ita hatene ha'ak, Na'i Maromak la simu ema mak la fiar baa Nia. Ema mak nakara mai baa Na'i Maromak, musti fiar na'ak, Na'i Maromak iha nanis. Sia moos musti fiar na'ak, Na'i Maromak nakara tulun ema mak buka Nia.

7 Tan Noh fiar, Na'i Maromak katak kedan baa nia na'ak, “Noh! Ha'u atu kadodok raiklaran ne'e kodi motasa'e boot mak ema raiklaran sei la naree isin ida dauk.” Masik Noh sei la naree dauk nunia moos, nia nanono baa Na'i Maromak, nodi nalo roo atu sori niakaan uma laran isin sia. Tan niakaan fiar nia, Na'i Maromak nafoli nia na'ak, ema loos. Mais Na'i Maromak natuun kastikar boot baa ema hotu-hotu mak la fiar.^d

8 Tan Bei Abraham fiar, Na'i Maromak bolu nia na'ak, “Abraham! La'o sai mela okaan leo, baa rai ida mak Ha'u atu katudu baa o. Rai nia atu dadi bein sasoin bodik o mo okaan husar-binan sia.” Rona nola nunia, Bei Abraham nalo tuir Na'i Maromak harukan, masik nia la natene atu baa nabee.^e 9 To'o rai nia, Bei Abraham nariik batane atu nein hanesan ema matak iha rai mak Na'i Maromak nameno ti'an atu foo baa nia. Oan Isak no bei oan Yakob moos nein iha nia, tan Na'i Maromak nameno ti'an atu foo rai nia dadi baa siakaan bein sasoin.^f 10 Bei Abraham naloon atu moris iha kota kabaas ida. Na'i Maromak du'uk mak nase'i ilas atu nodi nariik kota nia.

11 Bei Abraham feen Sara moos fiar. Masik Sara sei la nahoris isin ida dauk, no masik nia ferik maran ti'an moos, Na'i Maromak nalo nebee Sara bele dadi bei uluk bodik ema klubun boot ida. Na'i Maromak nalo nunia, tan Sara fiar na'ak, Na'i Maromak nanis nalo tuir saa mak Nia nameno ti'an.^g 12 Tan Sara niakaan fiar nia, masik nia ferik maran ti'an moos, nia sei bele nahoris nola husar-binan lear to'o la noo ema mak bele sura nola. Sara husar-binan sia wa'in hanesan fitun iha lale'an, no raihenek iha tasi tehen.^h

13 Itakaan bei uluk aan, mak Bei Abraham, Bei Isak, no Bei Yakob, sia fiar nohuun baa Na'i Maromak to'o mate. Mais oras mate, sia sei la simu dauk rai moris fatik mak Na'i Maromak nameno ti'an atu foo baa sia. Masik nunia moos, sia naloon nohuun nodi neon no laran, tan sia titu-naree rai nia nosi dook ti'an. Sia katak na'ak, sia ema maktabar mak nein heik iha raiklaran dei.ⁱ 14 Mais ema mak katak nunia, nanis beer netan fatik ida atu dadi baa siakaan rai du'uk. 15 Rai moris fatik mak sia beer nia, lahoos Bei Abraham rai huun, tan sia noo leet wa'in atu fila baa nebaa. 16 Rai moris fatik mak sia beer nia, ne'e mak rai moris fatik kabaas liu iha lale'an. Tan sia haloon nunia, Na'i Maromak simu sia di'a-di'ak atu dadi baa Niakaan ema. Nia moos nadi'a kedan kota ida bodik sia iha lale'an.

17 Tan Bei Abraham fiar, baa oras Na'i Maromak koko niakaan fiar, nia nalo tuir Na'i Maromak harukan nodi latan oan Isak dadi baa sera.^j 18 Uluk Na'i Maromak nameno ti'an nosi lia oan nia na'ak, “Nosi okaan oan Isak ne'e, o atu metan husar-binan wa'in, to'o dadi baa ema klubun boot.”^k 19 Bei Abraham nanoin na'ak, masik niakaan oan Isak mate moos, Na'i Maromak noo beran nalo nia moris nikar. Lia nia loos tebes, tan baa oras nia, oan Isak hanesan mate ti'an, hotu moris nikar.

20 Tan Bei Isak fiar, nia nusu nebee Na'i Maromak natuun matak-malirin baa oan Yakob no Esau.^l

21 Tan Bei Yakob fiar, oras nia kre'is mate, nia nariik tu-tu'uk kaer kno'an, nodi sudur baa Na'i Maromak. Hotu nia naro'an, nebee Na'i Maromak natuun matak-malirin baa bei oan nosi oan Yusuf.^m

22 Tan Bei Yusuf fiar, baa oras nia kre'is mate, nia katak kedan na'ak, Na'i Maromak atu nodi Niakaan ema Isra'el sia sai nosi rai Mesir. Hotu Bei Yusuf nameno nela na'ak, baa oras ema Isra'el sia la'o nela rai Mesir, sia musti nodi niakaan ruin.ⁿ

23 Tan Bei Musa inan no aman fiar, baa oras Musa inan nahoris nia, sia subar nia to'o fulan tolu laran, tan sia naree niakaan isin kabaas basuk. Masik Na'i Mesir naruka niakaan sondadu ti'an na'ak, “Ho'o kedan kau mea oan mane Ibrani hotu-hotu!” sia la nata'uk.^o

24 Bei Musa boot mai ti'an, nia moos fiar. Uluk, na'in Mesir oan feto nawa'i nola nia, dadi baa oan. Masik nunia moos, nia la nakara ema nafoli nia na'ak, na'in Mesir familin.^p 25 Nia naneo na'ak, di'ak liu moris susar bele-bele no Na'i Maromak eman sia, nosi moris manek no lia aat sia mak la oras dei. 26 Nia nabusik ema nahaat nia, tan nia naloon baa Kristus, Ema mak Na'i Maromak nameno atu solok mai. Musa naterus aan nunia, tan natene Na'i Maromak atu selu niakaan kole nodi saseban mak di'ak liu nosi sasoin hotu-hotu iha rai Mesir.

27 Tan Bei Musa fiar, nia nusu leet baa na'i Mesir atu nodi itakaan bei uluk sia la'o nela rai nia. Masik na'in nawan sa'e tebe-tebes, Bei Musa la nata'uk. Nia fiar nohuun baa Na'i Maromak, nu'u naree du'uk Na'i Maromak ti'an.^q

28 Tan Bei Musa fiar, baa oras itakaan bei uluk sia nadi'a aan atu la'o nela rai Mesir, nia tuir Na'i Maromak ukun nodi naruka sia nalo Dahur Paska lai. Sia no'o bibi malae atu dadi baa sera. Hotu sia nola bibi malae raan, nalo baa tadak iha siakaan uma odamatan. Baa kalan nia, Maromak Niakaan makbukar lale'an ida mai no'o lawarik oa ulun hotu-hotu iha rai Mesir. Mais nia la tama baa no'o lawarik iha itakaan bei uluk siakaan uma, tan naree raa nia iha siakaan uma odamatan.^r

29 Tan itakaan bei uluk sia fiar, oras sia la'o nela rai Mesir, Na'i Maromak naketak fa'e wee iha Tasi Mean, nebee sia bele la'o nakur nodi manek iha rai maran. Mais sondadu Mesir sia mate mout hotu, baa oras sia nakur kokon te'ur tuir itakaan bei uluk sia.^s

30 Tan itakaan bei uluk sia fiar, oras sia tama baa rai Kana'an, sia tuir Na'i Maromak harukan nodi la'o nalik kota Yeriko kadidin fatuk tehen loron hitu laran. Hotu, kadidin fatuk nia moos nakro'on mohu.^t

31 Noo tenik Rahab, mak uluk feto aat iha kota nia. Tan Rahab fiar, nia simu di'a-di'ak ema Isra'el siakaan ema mak nateke, hotu subar sia iha niakaan uma. Nunia hotu, Na'i Maromak nadodok ema Yeriko hotu-hotu, tan sia la no'uk nanono baa Nia. Mais Nia sori Rahab, tan niakaan fiar.^u

32 Ha'u ksei bele dale naruk tenik kosi lia ema seluk mak fiar baa Na'i Maromak. Mais la koo leet atu dale kosi lia Gideon, lia Barak, lia Simson, lia Yefta, lia Daud, lia Samuel, no lia Maromak mako'an seluk sia.^v 33 Tan sia fiar, balu natoba sakar na'i sia. Balu tenik nala'ok ukun nodi neon loos. Sia nariik nosi ema mak la sala, no kastikar ema mak sala. Balu tenik simu mak Na'i Maromak nameno. Balu tenik natoba nola busa fuik boot.^w 34 Balu tenik no'o ha'i mak laka boot. Balu tenik, Na'i Maromak sori nola nosi ema mak atu no'o sia nodi surik. Balu tenik, la biit, mais Na'i Maromak nakbiit sia. Balu tenik, Na'i Maromak nalo nebee sia dadi meo ulun, to'o nabe'o dodok sondadu funu nosi fatik seluk.^x 35 Balu tenik, ina sia mak simu nikar siakaan famili mak Na'i Maromak nalo moris nikar.

Mais noo balu mak kona tonan tan fiar baa Na'i Maromak. Sia talin aan no Nia nohuun, to'o sia boi di'ak liu mate nosi moris tali'ur baa Maromak. Sia naloon na'ak, Na'i Maromak bele foti sa'e sia atu netan moris di'ak liu tenik iha lale'an.^y 36 Balu kona haleuk, no balu kona ta'e. Balu seluk kona dadur iha bui laran.^z 37 Balu mate, tan ema tuda nodi fatuk. Balu mate, tan ema korat saki fa'e isin. Balu mate, tan surik. Balu moris mukit, natais loos kulit, tan ema tonan no nasusar sia, to'o te'ur sia^a 38 baa nein iha rai fuik, iha foho leten, iha fatuk kuak no rai kuak sia. Tuir loos, siakaan fiar maka'as tebes, to'o ema mak nein iha raiklaran ne'e, la fatan nein namutuk no sia.

39 Na'i Maromak nakara sia hotu-hotu, tan siakaan fiar. Mais to'o sia mate moos, sia sei la simu dauk lia kabaas mak Na'i Maromak nameno ti'an bodik sia. 40 Nia nala'ok Niakaan mamenon nodi dalan mak di'ak liu, tan Nia nakara nebee lahoos sia mesan dei, mais ita moos hetan moris nima-nimak ho Nia.