Paulus nakerek bodik belun
Filemon
Tabe
1
Hakerek ne'e nosi ha'u, Paulus. Ha'u ko ha'ukaan belu Timotius solok tabe baa o, mau Filemon. Nebee mau natene, ema natoos ha'u iha bui ne'e, tan ha'u katak lia Yesus Kristus baa ema.Ha'u kakerek ne'e
bodik o, mau Filemon, mak amikaan mamaluk serwisu mak ami hadomi,
2 bodik bii Apfia,a mak ami filak baa amikaan feton;
bodik Arkipus, mak narui aan no ami iha serwisu ne'e;
no bodik ema sarani sia mak libur malu atu namulak iha mau uman.b
3 Ha'u karo'an, nebee itakaan Ama Maromak no itakaan Na'in Yesus Kristus, natudu laran di'ak baa emi, nebee bele moris manek no dame.
Paulus noran sotir tan Filemon
4 Mau Filemon! Ha'u kamulak bodik o, kodi sera dodan baa Na'i Maromak, tan okaan moris. 5 Ha'u krona lia wa'in ti'an nosi okaan fiar baa Na'i Yesus, no okaan dadomin baa ema makfiar sia. 6 Tan okaan dadomin nia, o bele moris neon ida mo ema makfiar seluk sia. Ha'u kamulak, nebee emi hatudu emikaan laran di'ak baa malu nohuun, to'o emi bele hetak hatene lia di'ak hotu-hotu mak ita bele halo bodik Kristus. 7 Mau! Okaan dadomin nia, nakbiit ha'u no nalo ha'u neon di'ak. Okaan dadomin nia moos, nakbiit ema makfiar wa'in neon.
Paulus nusu nebee Filemon simu nikar Onesimus
8-9 Mau! Ha'u kbuka lia ida nune'e: Kristus foti ha'u no latan beran baa ha'u dadi baa Niakaan klosan. Tan baa nia, ha'u koo beran atu karuka mau nalo lia ne'e, mais ha'u la kakara nunia. Ha'u kusu tulun dei, hanesan ema matas ida mak tama bui ti'an tan tuir Yesus Kristus. Ha'u katene ka'ak, o madomi ema wa'in, 10 dadi ha'u kusu oan ida bodik ha'ukaan oan, Onesimus. Nia, nu'u ha'ukaan oan du'uk. Nia fiar baa Na'i Yesus ti'an, tan ha'u kanorin nia iha bui laran ne'e.c
11 Ha'u katene ka'ak, Onesimus nia, okaan ata mak nalai nela o. Uluk, nia la noo folin saa bodik o. Mais oras ne'e, ha'u kfiar, nia noo folin boot bodik ita rua.d 12 Ha'u kadomi nia basuk, mais so'in baa, tan ha'u ksolok fila nia baa mau ti'an.
13 Tuir loos, ha'u kbeer katoos nia, nebee nia seluk mau nodi naliku ha'u iha ne'e, tan ha'u ne'e ema bui. Ema natama ha'u baa bui ne'e, tan ha'u katak Lia Di'ak baa ema. 14 Mais ha'u la ko'uk mau simu lia ne'e tan mau noran ha'u kaseten mau. Ha'u kakara nebee mau nalo lia di'ak, tuir hakara du'uk, tan mau mak noo beran atu nakotu lia ne'e.
15 Arumak mau bele manoin nune'e: Na'i Maromak du'uk mak babilan nebee Onesimus la'o nela heik o, nebee nia mai nikar nein nafati no o. 16 Baa oras nalai, nia okaan atan dei. Mais oras fila mai, nia dadi ti'an baa okaan alin hadomi. Ha'u kadomi nia basuk! Dadi oras ne'e, niakaan folin hetak tu'an bodik mau, tan okaan atan nia moos dadi okaan alin mak fiar baa Kristus bele-bele no mau.
17 Lia nune'e, mau. Kalo mau filak ha'u baa maluk serwisu, ha'u kusu nebee mau simu nikar Onesimus, hanesan simu ha'u du'uk. 18 Mais arumak nia nalo sala ka, sei natusan baa mau ka? So'in baa, tan ha'u mak katiu. 19 Maree dei! Hakerek hatusan ne'e, ha'u mak kakerek du'uk kodi liman: Ha'u, Paulus, atu kselu kotu Onesimus tusan baa Filemon. To'o ti'an ka, sei? Ha'u lalika foo katene ka'ak, mau du'uk matusan boot baa ha'u, tan ha'u mak kanorin mau, nebee mau bele moris nima-nimak no Na'i Maromak.
20 Tebes mau! Tan ita talin malu ho itakaan Na'in, ha'u kusu nebee mau tulun ha'u baa lia ne'e. Simu di'a-di'ak Onesimus. Hodi nunia, ha'ukaan neon bele metin. Ha'ukaan neon moos bele biit, tan ita talin malu nunia ho Kristus.
Paulus narohan hakerek
21 Mau! Ha'u kakerek ne'e, tan ha'u kfiar mau atu nanono baa ha'u, to'o mau nalo liu nosi saa mak ha'u kusu ne'e.
22 Noo lia ida tenik. Tulun madi'a ke'an ida bodik ha'u lai. Ha'u kfiar ka'ak, Na'i Maromak rona emikaan hamulak, to'o Nia atu buka dalan nasai ha'u nosi bui ne'e, nebee ha'u ktone hikar karee emi iha nia.
23 Epafras iha ne'e. Nia moos dadi ema bui, tan katak lia Yesus Kristus baa ema, hanesan ha'u. Nia moos solok tabe bodik emi.e 24 Markus, Aristarkus, Demas no Lukas, sia moos iha ne'e. Sia, ha'ukaan mamaluk serwisu. Sia moos solok tabe.f
25 Ha'u karo'an baa itakaan Na'in Yesus Kristus, nebee natudu laran di'ak baa emi hotu-hotu.
Nunia dei!
Dame,
Paulus