Kristus mate isin ida dei, nebee ita bele moris di'a-di'ak ho Na'i Maromak to'o nima-nimak
10
Na'i Maromak nakara foo lia di'ak baa ita, mais Ukun-badu mak Nia natuun baa itakaan bei uluk sia la nalore malorek lia di'ak nia sia. Tan Ukun-badu nia sia, foin lalatak dei. Masik ema nala'o nohuun ukun-badu sera tunun moos, sera nia sia la bele namoos tebe-tebes ema salan. 2 Kalo bele namoos tebe-tebes ema salan, ema la nodi sera tunun atu nalo baa sera ona, tan sia la noran sala tenik. Mais tuir loos, la nunia. 3 Sura tinan sia nakro'an rua-ruan, nebee Na'i Maromak kasu mohu siakaan salan, 4 tan sera tunun raan la noo beran atu soe tebes ema salan.5-6 Baa oras Kristus mai iha raiklaran ne'e, Nia katak baa Na'i Maromak nune'e:
“Na'i Maromak la nakara sera tunun no sera seluk sia mak ema natetu baa Nia.
Sia nodi sera tunun wa'in
atu nalo baa sera.
Hotu sia tunu na'an sera
nodi nusu pardua.
Masik nunia moos, Na'i Maromak neon la nakara.
Tan lia nia, Nia naruka Ha'u kmai iha raiklaran ne'e,
atu dadi baa ema raiklaran nu'u sia.”
7 Hotu, Kristus moos dale na'ak,
“Na'i Maromak! Ha'u mak ne'e ti'an!
Ha'u kmai atu kalo tuir Na'i Maromak hakaran,
hanesan Maromak mako'an nakerek nela kedan nosi Ha'u.”a
8 Lia mak Kristus dale uluk nia, mak ne'e:
“Na'i Maromak la nakara sera tunun no sera seluk sia mak ema nodi mai.
Sia nodi sera tunun wa'in
atu nalo baa sera.
Hotu sia tunu na'an sera
nodi nusu pardua.
Masik nunia moos, Na'i Maromak neon la nakara.”
Tan lia nia, ita hatene ha'ak, masik sia nala'o nohuun Bei Musa Ukun-badu moos, Na'i Maromak neon sei la nakara. 9 Baa oras Kristus dale na'ak,
“Ha'u kmai atu kalo tuir Na'i Maromak beer,”
lia nia na'ak, Kristus mai atu no'as lakon dalan tuan, seluk nodi dalan foun. 10 Na'i Maromak Niakaan beer, mak, Yesus Kristus dadi sera atu mate dala ida bodik ema raiklaran. Hodi nunia, Nia nalo ita dadi ema moos to'o nima-nimak.
11 Sura loron, na'ilulik tuan sia nala'ok siakaan serwisu, nodi nalo sera tunun. Mais tuir loos, sera nia sia la dala ida noo beran atu soe tebes ema salan.b 12 Mais itakaan na'ilulik boot Kristus, latan isin lolon du'uk nodi mate dadi sera bodik ita. Nodi dadi sera isin ida dei, Nia loke dalan atu soe mohu itakaan salan hotu-hotu. Nunia hotu, Nia namaan aan sa'e baa nabesi aan iha Na'i Maromak sorin kwana, iha fatin mak kneter kaliuk. 13 Iha nia, Nia sei nein to'o Na'i Maromak nalo Niakaan funu sia lo'u baa Nia.c 14 Nodi sera Niakaan isin lolon to'o mate isin ida nia, Nia namoos nola ita nosi itakaan salan no naloos nola ita iha Na'i Maromak oin to'o nima-nimak.
15 Na'i Maromak Kmalar Lulik katak lia nia ti'an baa ita. Nia dale kedan na'ak,
16 “Emikaan Na'in nakara katak nune'e:
Ha'u kamate menon foun ko Ha'ukaan ema sia,
Ha'u krai Ha'ukaan ukun-badu baa siakaan kakutak,
Ha'u kakerek Ha'ukaan ukun-badu iha siakaan neon laran.”d
17 Hotu, Nia tu'an tenik na'ak,
“Ha'u la kanoin tenik siakaan salan.
Ha'u kalu'a lakon siakaan hahalok,
baa oras sia nakur Ha'ukaan ukun-badu sia.”e
18 Tan lia nia, ita bele hatene ha'ak, kalo Na'i Maromak kasu mohu itakaan salan ti'an, ita lalika buka sera ona atu hodi halirin Niakaan neon.
Ita lalika hata'uk mai iha Na'i Maromak oin
19 Lia nune'e, mamaluk sia! Tan Yesus naduar raan ti'an nodi nalirin nola Na'i Maromak neon, ita lalika hata'uk ona atu mai hariik iha Maromak oin iha Niakaan Fatik Lulik Kaliuk iha lale'an. 20 Hanoin baa Ke'an Lulik Kaliuk tuan nia. Iha nia, noo tais odamatan boot mak neli ema nebee la bele tama nasoru du'uk Maromak. Mais Yesus mate ti'an nodi loke dalan foun, nebee ita bele hasoru du'uk Maromak. 21 Liu tan tenik, Yesus dadi na'ilulik maka'as bodik Na'i Maromak eman uma laran sia. 22 Ne'e na'ak, ita bele tama dale du'uk ho Na'i Maromak, surak ita fiar tebe-tebes baa Nia hodi neon no laran. Ita bele tama, tan Yesus raan namoos itakaan neon no laran, to'o ita la hanoin lia aat ona. Itakaan moris musti moos, hanesan na'ilulik tuan mak namoos isin lolon, foin bele tama naliku Na'i Maromak.f 23 Ita musti kaer metin hotu-hotu, mak ita katak sain ti'an hosi lia Na'i Maromak, hodi haloon baa Nia nohuun. Lalika neon ruak, tan Nia nanis nalo tuir saa mak Nia mameno atu nalo bodik ita. 24 Ita moos musti hanoin malu nohuun, nebee ita hotu-hotu halo lia di'ak wa'in, hodi hatudu dadomin wa'in. 25 Ema balu la no'uk libur malu tenik no siakaan mamaluk ema makfiar sia. Keta nunia! Ita musti libur malu atu hakbiit malu neon. Liu tan tenik, tan Na'i Maromak Niakaan oras atu namaan mai nikar kre'is ti'an. Foo hatene baa sia nunia.
26 Mamaluk sia mak ha'u kadomi! Ita hatene to'o lotu-lotuk ti'an hosi lia Yesus Kristus dalan moris mak loos. Mais kalo ita tali'ur Nia, hodi halo sala nohuun, lia nia na'ak, la noo sera seluk tenik mak bele kasu mohu itakaan salan. 27 Kalo ita tali'ur nunia, ita hein hodi hata'uk, keta arumak Na'i Maromak namaan aan mai atu natuun kastikar baa ita. Ha'i naraka mak laka maka'as, tetuk ti'an atu nadodok mohu ema hotu-hotu mak sakar Nia.g 28 Uluk, kalo ema ida nakur Bei Musa Ukun-badu, no ema na'in rua-tolu dadi saksiin nunia, ema nia musti kona ukun mate. La noo pardua tenik.h 29 Oras ne'e, kalo ema nahaat Na'i Maromak Oan, lia nia na'ak, nia titu naraik Yesus raan mak nakduar ti'an nodi namoos ita. Nia moos la titu Na'i Maromak mamenon mak Nia namate no ita nodi raan nia. Nia moos nahaat Na'i Maromak Kmalar Lulik mak natudu laran di'ak baa ita. Hanoin dei! Ema oin nune'e natiu kastikar todan boot liu nosi ema mak nakur Bei Musa Ukun-badu.i 30 Na'i Maromak dale ti'an na'ak,
“Ha'u koo beran atu selu ema siakaan a'aat.
Ha'u nanis selu sia.”
Noo hakerek tenik na'ak,
“Maromak nia, mak Na'in.
Nia nanis natuun kastikar baa Niakaan ema sia.”j
31 Hanoin! Na'i Maromak moris nohuun! Ema nanis nata'uk kalo Nia kohi nola sia.
32 Hanoin baa oras emi foin hatene lia nosi Kristus no emikaan kakutak foin nakroma. Baa oras nia, masik emi hetan tonan no susar wa'in moos, emi haterus aan hodi fiar baa Kristus. 33 Ema balu nahaat emi nodi namoe emi iha ema lear oin. Balu nalo nunia no emikaan belu sia. 34 Masik nunia moos, emi neon monu baa ema iha bui laran. Ema nana'o nola emikaan sasoin, emi simu dei, tan hatene ha'ak, emi atu simu sasoin mak di'ak liu mak ema la bele nana'o nola. 35 Emi musti kaer metin emikaan fiar nia, tan Na'i Maromak atu selu wa'in boot baa emi. 36 Haterus aan baa dei! Kalo emi hala'ok tuir Na'i Maromak hakaran hotu-hotu, emi simu hotu-hotu mak Nia nameno baa emi ti'an. 37 Maromak mako'an sia nakerek nela ti'an lia nosi Ema ida mak atu mai na'ak,
“La kleur ona, Ema mak atu mai nia, natadu aan ti'an.
Keta neon ki'ik, tan Nia lai-lais mai ona.
38 Ema mak neon moos,
atu netan moris,
tan fiar baa Ha'u.
Mais, ema mak tali'ur Ha'u,
Ha'u la kbeer nia.”k
39 Ita ne'e lahoos ema mak tali'ur Na'i Maromak. Ema oin nunia kona lelen nosi Nia. Mais ita ne'e, ema mak fiar baa Nia no hetan moris nohuun ho Nia.