3 Tais odamatan boot ida moos hisa iha nia, hodi heli ke'an ida seluk, mak sia nanaran na'ak, Na'i Maromak Ke'an Lulik Kaliuk.^b 4 Iha tais odamatan nia oin, noo hadak mean ida, hodi tunu ai morin bodik Na'i Maromak. Iha Ke'an Lulik Kaliuk laran noo ai balun mean ida, mak sia nanaran na'ak, Ai Balun Mamenon. Iha ai balun nia laran, sia rai naha uluk aan sia, atu nodi foo natene nosi lia Na'i Maromak mamenon mak Nia namate ti'an no sia. Iha ai balun nia noo botir mean ida mak nahisi tubi manna. Tubi nia, tubi mak Na'i Maromak natuun nosi lale'an, bodik itakaan bei uluk sia baa oras sia salaen iha rai fuik. Iha ai balun nia moos noo Bei Harun niakaan kno'an maran mak uluk noo tubun. Iha nia moos noo fatuk kabelak mak Na'i Maromak nodi ba'at Ukun-badu, mak Nia foo baa Bei Musa hori hirak nia.^c 5 Iha ai balun tatakan noo ai'oik kabaas rua. Ai'oik rua nia ilas hanesan Na'i Maromak Niakaan makbukar lale'an mahoo liras. Sia no'i nariik nodi liras nakfelar belar, taka nola ai balun nia, tan ai balun leten nia, fatik kabaas mak natudu Na'i Maromak dodan baa ema raiklaran. Mais oras ne'e, ha'u la koo leet atu kdale to'o lotu-lotuk kosi lia naha nia sia.^d

6 Siakaan lala'ok babilan naha iha Na'i Maromak Niakaan Batane Hamulak laran, nunia nanis. Sura loron na'ilulik sia tama-sai ke'an oin nia atu nala'ok serwisu.^e 7 Mais na'ilulik boot mesan dei mak bele tama baa Ke'an Lulik Kaliuk nia. Nia la bele tama sura leet, tan tinan ida laran, bele tama isin ida dei. Oras tama, nia musti nodi sera tunun raan, atu nisik baa Ai Balun Mamenon tatakan. Hodi nunia, Na'i Maromak kasu mohu na'ilulik nia no niakaan ema siakaan salan hotu-hotu. Masik sala mak sia nalo la nodi neon no laran moos, Nia kasu mohu.^f

8 Na'i Maromak nodi Niakaan Kmalar Lulik atu nalore baa ita na'ak, kalo tais odamatan nia sei neli dalan tama baa Ke'an Lulik Kaliuk nia, ne'e na'ak, ukun tuan sei nafati. Ema raiklaran la bele tama baa nariik iha Na'i Maromak oin. 9 Lia ne'e sia hotu-hotu dadi baa knaninuk mak Kmalar Lulik nodi atu nanorin ita mak moris baa oras ne'e. Uluk, itakaan bei uluk sia nodi siakaan sera tunun no sera seluk sia, foo baa na'ilulik, nebee Na'i Maromak kasu mohu siakaan salan. Mais, masik sia nodi sera wa'in boot nunia moos, sera nia sia la bele namoos siakaan neon no la bele nalakon horan sala iha siakaan neon laran. 10 Saa mak sia nalo nia, tuir ukun-badu dei. Noo ukun-badu mak naruka na'ak, sia la bele naa ne'e, la bele nemu nia. Ukun-badu seluk na'ak, musti fasi isin lolon no haa-hemu fatik tuir ukun-badu lala'ok. Mais tuir loos, ukun-badu nia sia babilan loos ema isin luan dei, lahoos babilan ema neon laran. Masik nunia moos, ukun-badu nia musti la'o bei-beik, to'o Na'i Maromak seluk nodi ukun-badu foun.

11 Mais oras ne'e, Ema mak Na'i Maromak nameno kedan hori uluk nia, iha ti'an. Nia, mak Kristus. Nia namaan aan mai atu dadi itakaan na'ilulik boot. Nia nalo lia di'ak ti'an bodik ita.^g Nia nala'ok Niakaan serwisu, hanesan na'ilulik tuan, mais Nia serwisu iha hamulak fatin mak maka'as liu tebes. Niakaan hamulak fatik nia, la iha raiklaran, tan lahoos ema raiklaran mak nalo. 12 Nia moos tama baa Ke'an Lulik Kaliuk nia atu nasoru Na'i Maromak, hanesan na'ilulik tuan sia nala'ok tinan ida, isin ida. Baa oras tama, Nia moos nodi raan atu foo baa Na'i Maromak. Mais seluk, tan Kristus la nodi sera tunun raan. Nia nodi raan du'uk, tan Nia mate ti'an dadi sera bodik ita. Nia nodi raan du'uk isin ida dei, nebee sori ita nosi sala to'o nima-nimak.

13 Tebes! Kristus raan maka'as liu sera tunun raan. Tuir Ukun-badu mak Na'i Maromak foo baa Bei Musa, kalo ema nalo sala, ema nia dadi sasobos to'o la fatan lo'u-sudur baa Na'i Maromak. Kalo ema nia nakara moos nikar, nia musti baa na'ilulik atu nalo sera, nebee sera raan nia bele namoos nikar nia. Noo sera oi-oik. Balu nodi bibi raan, balu nodi karau baka raan. Ukun-badu ida tenik na'ak, kalo ema kaer ema maten, nia dadi sasobos iha Na'i Maromak oin. Kalo ema nia nakara moos nikar, na'ilulik musti foti nola ahukresan nosi karau baka salak tunun, hotu nodi ahukresan nia, nisik baa ema sasobos ulun, nebee nia dadi moos nikar.^h

14 Kalo sera tunun raan bele namoos ema isin luan, Kristus raan bele namoos liu tan tenik! Kristus raan nalo ita hakbois hosi sala, nodi namoos itakaan neon laran. Uluk, ita kona lelen nosi Na'i Maromak tan itakaan salan. Mais baa oras Kristus mate, Kmalar Lulik mak moris nohuun, tulun Nia nebee Nia latan isin lolon baa Na'i Maromak hanesan sera tunun mak kabaas. Oras ne'e, ita la kona lelen ona, mais ita bele lo'u-sudur tuir dalan loos baa Maromak mak moris nohuun.

15 Tan Kristus raan maka'as nia, Na'i Maromak nodi Nia atu namate mamenon foun no ema hotu-hotu mak Na'i Maromak bolu ti'an, atu dadi baa Niakaan ema. Baa oras Kristus mate atu sori ema, Nia moos sori itakaan bei uluk nosi sala mak sia nalo uluk aan nia baa oras Na'i Maromak namate mamenon tuan no sia. Tan lia nia, sia moos bele moris nohuun no Maromak.

16 Ha'u kodi knaninuk kosi ema simu bein sasoin. Noo ama ida nalo hakerek latan sasoin bodik oan. Mais oan foin bele simu nola sasoin nia, kalo aman mate ti'an. 17 Kalo aman sei moris, oan sei la bele dauk simu sasoin mak aman nameno ti'an iha hakerek latan nia. 18 Nunia moos, Na'i Maromak mamenon dala uluk mak Nia namate no itakaan bei uluk sia. Sia foin bele simu nola saa mak Na'i Maromak nameno nia, kalo noo ida mak mate uluk. 19 Uluk, Bei Musa libur itakaan bei uluk sia atu nalore Ukun-badu hotu-hotu mak Na'i Maromak foin natuun baa sia. Nalore notu, Bei Musa no'o karau baka no bibi, nola raan, kahur no wee. Hotu, nia nodi tali mean, futu ai lain mahoo tahan lotuk. Nia lobas baa raan nia, hotu nisik baa Hakerek Moon no ema sia hotu-hotu. 20 Baa oras nisik raa nunia, Bei Musa dale na'ak, “Raa ne'e dadi tadak na'ak, Na'i Maromak namate menon no emi. Kalo emi halo tuir Niakaan ukun hotu-hotu, Nia atu foo hotu-hotu mak Nia nameno ti'an.”ⁱ 21 Bei Musa moos nisik raa baa Batane Hamulak no baho'ak hotu-hotu iha nia mak sia nodi lo'u-sudur baa Na'i Maromak.^j 22 Tuir Ukun-badu Bei Musa, ema sasobos balu musti kona hamoos hodi raa. Hodi nunia, ita bele hatene ha'ak, kalo ema raiklaran nakara dadi moos nosi sala, musti nodi sera mak noo raan.^k

23 Saa mak ha'u kdale kosi lia itakaan bei uluk no siakaan Batane Hamulak, hotu-hotu nia, knaninuk dei, nebee ita bele hatene Na'i Maromak Niakaan Hamulak Fatin huun iha lale'an. Kalo na'ilulik tuan sia tama baa Batane nia laran atu lo'u-sudur baa Na'i Maromak, sia musti namoos uluk hotu-hotu lai, nodi sera tunun raan. Na'i Maromak Niakaan Fatin Lulik iha lale'an moos musti moos. Mais musti hodi sera raan mak maka'as liu sera tunun raan. 24 Ke'an Lulik Kaliuk mak Kristus tama nia, lahoos ke'an iha Batane Hamulak mak ema raiklaran nalo. Batane iha raiklaran nia, lalatak dei nosi mak huun. Kristus tama liu baa lale'an, atu nariik nosi ita iha Na'i Maromak oin. 25 Uluk, na'ilulik boot musti tama rua-ruan sura tinan baa Ke'an Lulik Kaliuk nia, nodi sera tunun raan, atu natetu baa Na'i Maromak. Mais Kristus tama isin ida dei, nodi Niakaan raan du'uk. 26 Kalo Nia musti tama sura tinan hanesan na'ilulik tuan sia, ne'e na'ak, Nia musti mate rua-ruan hori raiklaran foin nahuu to'o oras ne'e, nebee Nia kasu mohu ema hotu-hotu salan. Mais, Nia la nalo nunia. Tan Nia dadi sera isin ida dei, nodi ho'as lakon ema hotu-hotu salan. 27 Hori uluk aan, Na'i Maromak nakotu kedan na'ak, ema raiklaran musti mate isin ida dei, foin musti nataa iha Na'i Maromak oin. 28 Kristus moos mate isin ida dei baa oras Nia latan isin lolon nodi natiu nola ema raiklaran salan. Nosi ikus, Nia moos atu namaan aan mai nikar iha raiklaran, lahoos atu natiu ema raiklaran salan tenik, mais atu foo moris nima-nimak baa ema hotu-hotu mak naloon baa Nia.^l