Na'i Maromak nodi Kristus atu namate menon foun mak di'ak liu mamenon tuan
8
Lia isin nosi lia mak ha'u kdale ne'e sia, nune'e: oras ne'e, ita hoo na'ilulik boot mak maka'as liu na'ilulik boot uluk sia. Nia, mak Yesus. Nia nabesi aan kaer ukun iha lale'an, iha Na'i Maromak Mak Aas Kaliuk sorin kwana.a 2 Nia nala'ok Niakaan serwisu iha Na'i Maromak Niakaan Fatin Lulik. Fatin nia, Na'i Maromak du'uk mak nalo, lahoos ema raiklaran.3 Na'ilulik boot siakaan serwisu mak ne'e: musti nodi sera tunun no sera seluk atu foo baa Na'i Maromak. Tan lia nia, Yesus moos musti nodi sera. 4 Mais Yesus la nala'ok Niakaan serwisu iha raiklaran, tan noo na'ilulik iha raiklaran ti'an mak foo sera baa Na'i Maromak tuir Ukun-badu Bei Musa. 5 Sia nala'o siakaan serwisu iha Batane Hamulak. Batane Hamulak nia, ilas nu'u Uma Hamulak Huun iha lale'an. Baa oras Bei Musa atu nariik Batane nia, Na'i Maromak foo natene na'ak, “Manoin di'a-di'ak! O musti malo tebe-tebes tuir ilas mak Ha'u katudu ti'an baa o iha foho leten nia!”b 6 Na'i Maromak katak tebes baa Bei Musa nunia. Mais Yesus Niakaan serwisu maka'as liu na'ilulik tuan siakaan serwisu. Oras ne'e, Na'i Maromak namate menon mak di'ak liu mamenon tuan, tan Nia nodi Yesus dadi ailalete, nebee ema raiklaran bele dame malu no Nia.
7 Uluk, Na'i Maromak namate menon tuan no Bei Musa baa oras natuun Ukun-badu. Mais ema raiklaran la bele moris loos tuir Ukun-badu nia sia. Tan sia la bele moris tuir Na'i Maromak mamenon nunia, sia la bele di'a-di'ak no Nia. Ne'e na'ak, musti noo mamenon foun mak natudu dalan foun nebee ema raiklaran bele di'a-di'ak no Na'i Maromak. 8 Uluk, Nia nasee Niakaan ema sia, oras sia nakur bei-beik Niakaan Ukun-badu tuan. Oras Nia la terus tenik ti'an, Nia nahibu sia na'ak,
“Rona di'a-di'ak, tan Ha'u ne'e, emikaan Na'in!
Ha'u atu kamate menon foun
ko ema klubun Isra'el,
no ema hunun Yahuda.
9 Lia mamenon mak Ha'u atu kamate ko sia nia,
la manesak no lia mamenon mak uluk Ha'u kamate
ko siakaan bei uluk sia.
Uluk, Ha'u kaer siakaan liman,
kodi kala'o sia sai kosi rai Mesir.
Mais sia la nalo tuir saa
mak sia nameno ti'an no Ha'u.
Tan baa nia, Ha'u la ko'uk titu tenik sia ona.
10 Lia mamenon mak Ha'u atu kamate ko ema hunun Isra'el,
isin nune'e:
Ha'u atu krai Ha'ukaan ukun-badu iha siakaan kakutak laran.
Ha'u atu kakerek Ha'ukaan ukun iha siakaan neon laran.
Hotu Ha'u kdadi baa siakaan Maromak.
Sia moos dadi baa Ha'ukaan ema.
11 Sia lalika hanorin tenik baa siakaan mamaluk sia ,
no maun-biin-alin sia ha'ak,
‘Emi musti hatene Na'i Maromak!’
Sia lalika dale nunia ona, tan hotu-hotu natene Ha'u ti'an,
nahuu nosi kau mea oan to'o matas.
12 Masik sia nalo sala moos,
Ha'ukaan neon atu monu baa sia.
Ha'u moos kalu'a lakon siakaan salan hotu-hotu.”c
13 Tan Na'i Maromak dale na'ak, Nia atu namate menon foun no sia, ita bele hatene ha'ak, mamenon tuan nia, la noo folin ti'an. La kleur falik, lakon mohu ona.