5
Ema raiklaran ida mak dadi na'ilulik boot, niakaan serwisu mak ne'e: musti tulun ema, nebee sia bele talin malu no Na'i Maromak. Musti simu sera tunun no sera seluk sia, atu latan baa Na'i Maromak. Hotu, musti tunu sera nia, nebee Na'i Maromak kasu mohu siakaan salan. 2 Kalo noo ema mak la natene dalan moris loos, lale, ema mak sai nosi dalan nia ti'an, na'ilulik musti netu aan no sia. Nia musti natudu laran di'ak baa sia, tan nia moos ema raiklaran mak maus monu hanesan sia. 3 Tan na'ilulik moos monu baa sala, nia moos musti nalo sera, nebee Na'i Maromak kasu mohu niakaan salan du'uk.a 4 Ema la bele foti aan du'uk atu dadi na'ilulik boot. Tan Na'i Maromak mesan mak noo beran atu foti ema nunia, hanesan uluk Nia foti Musa maun Harun.b5 Nunia moos Kristus. Nia la foti aan du'uk dadi na'ilulik boot. Na'i Maromak mak foti Nia. Uluk, Na'i Maromak dale na'ak,
“O ne'e, Ha'ukaan Oan.
Ohin loron ne'e, Ha'u kfoti O atu kaer ukun.”c
6 Hakerek Moon moos na'ak,
“O ne'e, dadi na'ilulik mak oin ida nu'u Melkisedek uluk nia,
mais O dadi na'ilulik to'o nima-nimak.”d
7 Baa oras Yesus Niakaan moris iha raiklaran ne'e atu mohu, Nia namulak la nanawa nodi tanis nusu tulun baa Na'i Maromak, nebee Na'i Maromak nakbiit Nia. Nia natene na'ak, Na'i Maromak beran bele sori Nia. Hotu, Na'i Maromak nanono baa Yesus, tan Yesus nakneter Na'i Maromak tebe-tebes.e 8 Masik Yesus nia, Na'i Maromak Oan, Nia musti netan susar, atu nanorin aan tuir Na'i Maromak hakaran. 9 Hodi nunia, Nia nalo tuir Na'i Maromak hakaran to'o tetuk. Tan lia nia, Nia dadi Moris Huun bodik ema hotu-hotu mak fiar baa Nia, nebee sia bele moris nohuun no Na'i Maromak. 10 Na'i Maromak moos foti Nia dadi na'ilulik ulun oin ida nu'u na'ilulik Melkisedek uluk nia.
Keta soe lakon emikaan fiar baa Kristus
11 Mamaluk sia, sei noo lia wa'in tenik mak ha'u kakara dale kosi lia Kristus no Melkisedek nia. Mais ha'u susar kalore lia nia sia, tan emi sei hanesan lawarik momok oan mak sei la natene malolok dauk. 12 Emi ne'e fiar kleur ti'an. Tuir loos, emi musti dadi ti'an baa ema manorik. Mais hatene hodi baa, emi sei nu'u kau mea oan mak sei la bele naa dauk, tan foin sei nemu susu dei. Ema musti nanorin tenik emi lai nosi lia tatuur sia nosi Na'i Maromak Niakaan Hakerek Moon isin. 13 Ha'u kanesa emi baa kau mea oan nunia, tan emi sei la hatene dauk hanorin tatuur nosi lia Kristus mak nalo emi moris loos.f 14 Kalo kau mea oan boot ti'an, nia la nemu susu ona, mais naa hahaak monas. Emi musti nunia ti'an. Emi musti hanorin aan atu hatene tebe-tebes Na'i Maromak hanorin, to'o hatene lia mak di'ak no lia mak aat.