Kalo ita fiar baa Yesus Kristus, ita bele moris dame malu ho Na'i Maromak, hanesan ita hanawa kole ho Nia
4
Oras ne'e, ita musti hanoin halo naruk, tan sei noo mamenon ida nosi Na'i Maromak na'ak, Niakaan ema sia bele nanawa kole namutuk no Nia. Keta to'o ema ida nosi emi dudu sees Na'i Maromak mamenon nia. 2 Ita rona hola lia di'ak nia, hanesan bei uluk sia moos rona nola. Mais sia la fiar lia di'ak nia. Tan baa nia, sia la netan sotir saa ida. 3 Mais kalo ita fiar, ita bele hanawa kole hamutuk ho Na'i Maromak. Uluk, Nia nameno nunia bodik itakaan bei uluk sia, mais tan sia la fiar, Nia nahibu sia na'ak,“Ha'u la kterus karee emikaan a'aat nunia ona.
Tan baa nia, Ha'u kakotu ka'ak,
‘Emi la bele tama ona
atu hanawa kole hamutuk ho Ha'u.’”
Tuir loos, ita hatene ha'ak, baa oras Na'i Maromak nase'i lale'an no raiklaran, Nia nadi'a kedan nebee Niakaan ema sia bele nanawa kole nodi moris namutuk no Nia.a 4 Iha lia Na'i Maromak nase'i lale'an no raiklaran, noo lia nosi Na'i Maromak nanawa kole na'ak,
“Na'i Maromak serwisu notu ti'an,
hotu baa awan, mak kona baa loron dala hitu,
Nia nanawa.”b
5 Iha Hakerek Moon, Na'i Maromak dale baa itakaan bei uluk sia na'ak,
“Emi la bele tama ona,
atu hanawa kole hamutuk ho Ha'u.”c
6 Na'i Maromak nakara, nebee Niakaan ema sia nanawa kole nodi moris namutuk no Nia. Mais itakaan bei uluk sia mak rona uluk lia nia, sia la bele tama tan sia la nalo tuir Na'i Maromak hakaran. 7 Mais kleu-leur, Na'i Maromak boi leet seluk, nebee Niakaan ema bele tama nanawa kole namutuk no Nia. Nia nodi Bei Daud nakerek na'ak,
“Kalo ohin loron ne'e, emi rona Maromak Manfatin,
keta hamonas emikaan neon,
mais hanono di'a-di'ak baa.”d
8 Baa oras Bei Daud nakerek na'ak “ohin loron ne'e”, nia la natudu loron oras Yosua nala'o nodi bei uluk siakaan oan sia tama baa rai Kana'an. Lale! Tan oras Bei Daud nakerek nunia, sia hotu-hotu mate kleur ti'an.e 9 Tan lia nia, ita hatene ha'ak, Na'i Maromak nadi'a oras seluk ti'an, nebee Niakaan ema sia bele nanawa kole nodi moris namutuk no Nia. 10 Ema mak tama nanawa kole namutuk no Na'i Maromak, nanawa ti'an nosi siakaan serwisu, hanesan Na'i Maromak moos nanawa nosi Niakaan serwisu kona baa loron dala hitu, baa oras Nia nase'i notu raiklaran ne'e.f 11 Dadi hariik metin, nebee emi bele tama hanawa kole nodi moris hamutuk ho Nia. Keta to'o, noo ema mak la bele tama, tan la no'uk nanono Manfatin, hanesan itakaan bei uluk nia sia.
12 Maromak Manfatin natudu dalan moris mak loos. Manfatin nia noo beran atu tama baa itakaan neon laran, nodi tetu itakaan hanoin no itakaan hakaran hotu-hotu. Manfatin nia ro'at liu taha mak bele taa isin fera ruin. 13 Iha lale'an no raiklaran tomak, la noo lia ida kois mak nakfunin nosi Na'i Maromak. Hotu-hotu nakloke mohu nu'u ema nodi taha taa isin fera ruin ti'an. Hanoin, tan nosi ikus, ita ida-idak musti hataa baa Nia hosi itakaan hahalok hotu-hotu.
Na'i Maromak Niakaan Oan Yesus dadi na'ilulik mak maka'as liu na'ilulik uluk sia
14 Ita bele kaer metin itakaan fiar, tan Na'i Maromak Oan Yesus dadi ti'an baa itakaan na'ilulik boot. Nia maka'as liu na'ilulik seluk sia, tan Nia tama lale'an ti'an nodi naloos kedan ita iha Na'i Maromak oin. 15 Nia bele naloos ita di'a-di'ak, tan Nia moos dadi ti'an baa ema raiklaran nu'u ita. Nia moos kona hamaus atu nalo sala hanesan ita, mais Nia la monu kedas. 16 Tan lia nia, ita lalika hata'uk hare'is aan baa Na'i Maromak iha Niakaan kadera ukun. Nia laran di'ak. Kalo ita hamulak hodi husu tulun baa Nia, Nia nanis natudu Niakaan dodan nodi tulun ita, kona baa Niakaan oras.