6
Tebes, mamaluk sia! Emi musti hanorin aan hosi hanorin mak le'an liu, tan ema fiar kleur ti'an. Kalo ema ida foin fiar baa Kristus, musti nanorin aan nosi lia tatuur nu'u: lia ema musti la'o nela siakaan salan sia; lia ema fiar baa Na'i Maromak; 2 lia sarani; lia rai liman atu simu Na'i Maromak Kmalar Lulik; lia Na'i Maromak atu nalo ema mak mate ti'an moris nikar; no lia ema musti nataa Na'i Maromak nosi siakaan hahalok. 3 Lia nia sia fatan bodik ema mak foin fiar. Mais ita lalika hanorin aan rua-ruan hosi lia tatuur sia. Kalo Na'i Maromak foo leet, ita musti hanorin aan hosi lia mak le'an liu lia tatuur nia sia.4 Tuir loos, noo ema mak natene ti'an Kristus hanorin. Sia noran ti'an Na'i Maromak laran di'ak, to'o Na'i Maromak solok Niakaan Kmalar Lulik bodik sia. 5 Sia natene ti'an Maromak Manfatin. Sia noran ti'an Niakaan beran mak Nia atu tau baa oras rai falu fila. 6 Masik nunia moos, sia soe lakon siakaan fiar nia, nodi tali'ur la'o nela Kristus. Tan lia nia, la noo dalan ona bodik sia atu bele fila nusu pardua, hotu moris di'a-di'ak nikar no Na'i Maromak. Tebes. Kalo ema la no'uk nalo neon aat nunia, lia nia hanesan sia na'in du'uk nedi no'o nikar Na'i Maromak Oan baa ai karuus, hotu nale'uk Nia iha ema lear oin.
7 Ema oin nunia, hanesan rai isin aat. Tuir dalan loos, kalo udan tuun ti'an, rai di'ak bele nasai isin mak noo folin bodik ema mak fila rai. Hotu Na'i Maromak natuun matak-malirin nebee nalo rai nia isin hetak wa'in. 8 Mais ema mak tali'ur Kristus, hanesan rai mak nasai ai tarak dei. La noo folin ona. La kleur falik, Na'i Maromak namaan aan mai kastikar rai nia. Hotu Nia sunu mohu rai isin mak la noo folin nia.a
9 Mamaluk sia mak ha'u kadomi! Masik ha'u kdale maka'as nunia moos, ha'u katene, emi la se'i kotuk baa Kristus. Emi fiar Nia ti'an. Emi moris moos noo halo di'ak ti'an. 10 Hanoin! Na'i Maromak neon loos. Nia la nalu'a emikaan kosar ween. Emi serwisu maka'as ti'an atu tulun no hadomi Niakaan ema sia. Emi hala'ok Niakaan serwisu nia hori uluk. Oras ne'e moos, sei nunia. 11 Mais oras ne'e, ha'u kakara nebee emi serwisu maka'as liu tenik, hodi halo tuir nunia bei-beik. Hodi nunia, emi atu simu lia di'ak hotu-hotu mak emi haloon hosi Na'i Maromak. 12 Surak, keta baruk teen! Haninu ema mak fiar kleur ti'an baa Na'i Maromak. Tan sia naloon nohuun baa Nia, to'o sia simu nola saa mak Nia nameno ti'an baa sia.
13-16 Knaninuk hanesan itakaan Bei Abraham. Uluk aan, Na'i Maromak namate menon no nia, nodi narai aan. Kalo ema raiklaran narai aan, sia temi Na'i Maromak naran, nebee Na'i Maromak dadi baa siakaan mataa lia, tan Na'i Maromak boot liu sia. Kalo ema raiklaran nalo lia, sia moos natebes dalen nodi narai aan, temi Na'i Maromak naran. Ema raiklaran siakaan hahalok sia, nunia nanis. Mais baa oras Na'i Maromak narai aan no Bei Abraham, Nia nodi Niakaan naran du'uk, tan la noo naran mak boot liu Maromak. Nia nameno na'ak,
“Ha'u nanis katuun matak-malirin
baa o mo okaan husar-binan.
Sia atu bea wa'in,
to'o la noo ema mak bele sura nola sia.”b
Na'i Maromak nameno notu nunia, Bei Abraham moos fiar nodi naloon nohuun baa Na'i Maromak, masik kleu-leur foin nia simu saa mak Na'i Maromak nameno ti'an nia. 17 Hodi nunia, ita hatene ha'ak, kalo Na'i Maromak namate menon no Niakaan ema, Nia narai aan atu natebes na'ak, saa mak Nia nameno nia, nanis tebes. 18 Noo lia oik rua mak la maseluk. Ida mak, Na'i Maromak mamenon. Ida tenik mak, Na'i Maromak narai aan nodi natebes mamenon nia. Kalo Na'i Maromak nameno lia ida ti'an, Nia nanis nalo tuir, tan Nia la bosok. Ita lalika neon ruak baa Niakaan mamenon nia. Tan ita halai baa buka moris ti'an iha Nia, oras ne'e ita hein hodi haloon baa Nia nohuun. 19 Hodi nunia, ita neon noku ti'an, hanesan bero sai nosi laloran, nakrai aan baa namon. Ita haloon baa Yesus Kristus, mak itakaan na'ilulik boot. Uluk, kona baa ema Yahudi siakaan loron di'ak, na'ilulik boot loke tais odamatan iha ke'an hamulak fatik atu tama baa nasoru Na'i Maromak iha Ke'an Lulik Kaliuk.c 20 Oras ne'e, Yesus tama uluk ti'an atu loke dalan bodik ita. Nia, na'ilulik boot oin ida nu'u Melkisedek uluk nia. Mais Yesus maka'as liu na'ilulik uluk sia, tan Nia nala'ok nima-nimak Niakaan serwisu.d