Na'i Maromak Niakaan Oan maka'as liu Bei Musa
3
Lia nune'e mamaluk sia! Na'i Maromak bolu nola emi ti'an. Nia moos nafoli emi na'ak, ema neon moon, nebee emi bele moris ho Nia iha lale'an. Tan lia nia sia, emi musti haneo lotu-lotuk lia nosi Yesus. Ita fiar ha'ak, Na'i Maromak mak solok Nia mai. Nia moos dadi na'ilulik boot bodik ita. 2 Baa oras Na'i Maromak solok Nia mai, Nia nalo tuir Na'i Maromak hakaran hotu-hotu. Hodi nunia, Nia dadi hanesan Bei Musa, tan Bei Musa moos nalo tuir Na'i Maromak hakaran, baa oras nia naliku itakaan bei uluk sia.a 3 Mais Yesus maka'as liu Bei Musa, tan Yesus nu'u uma kain ulun. Ema hotu-hotu natene na'ak, uma kain ulun maka'as liu ema mak serwisu iha uma nia laran. 4 Ema ida-idak nariik uma kain du'uk. Mais Na'i Maromak nariik hotu-hotu. 5 Bei Musa nalo tuir Na'i Maromak hakaran baa oras nia dadi ain-liman bodik Na'i Maromak eman uma laran. Baa oras nia, Bei Musa katak kedan lia saa mak Na'i Maromak atu nalo baa loron ikus. 6 Yesus moos nalo tuir Na'i Maromak hakaran, mais Nia lahoos ain-liman hanesan Bei Musa. Tan Yesus, mak Kristus. Nia, Na'i Maromak Oan, mak Na'i Maromak boi kedan ti'an hori uluk atu solok mai iha raiklaran ne'e. Kristus natene tebe-tebes babilan Ama Niakaan uma isin. Kalo ita kaer metin itakaan fiar, hodi haloon baa Kristus nohuun, ita moos dadi Na'i Maromak eman uma laran.Keta se'i kotuk baa Na'i Maromak hanesan bei uluk sia, tan sia la bele tama hanawa kole iha rai mak Nia nameno ti'an atu foo baa sia
7 Tan lia nia, emi musti hanono di'a-di'ak lia mak Kmalar Lulik dale na'ak,
“Ohin loron ne'e, kalo emi rona Maromak Manfatin,
8 keta ulun fatuk,
nu'u ema nia sia
mak la'o baa-mai to'o tinan haat nulu iha rai fuik.
Sia la no'uk rona baa Musa,
to'o Na'i Maromak du'uk
kre'is la bele neti neon ona no sia tenik.
9 Hanoin kokon!
Tinan haat nulu Ha'u kase'i tadak blaar oi-oik
iha siakaan oin besik!
Mais sia koko Ha'u nohuun atu nodi naree Ha'u kbele terus siakaan a'aat ka, lale.
10 Tan lia nia, Ha'u kahibu sia ka'ak,
‘Emi ne'e, liu basuk ti'an!
Emi se'i kotuk ti'an, la'o hela Ha'ukaan dalan,
hodi tuir emikaan dalan kale'uk dei!’
11 Ha'u la kterus karee emikaan a'aat nunia tenik.
Ha'u kahibu emi ka'ak,
‘Emi la bele tama ona atu hanawa kole hamutuk ho Ha'u.’”b
12 Lia nune'e mamaluk sia! Sintidu di'a-di'ak! Keta arumak noo ema nosi emi mak nalo aat, to'o nia la fiar tenik, hotu se'i kotuk la'o nela Na'i Maromak mak moris nohuun. 13 Di'ak liu, sura loron emi hakbiit malu neon. Tan emi maus kona be'ur atu halo sala, to'o dadi ulun fatuk hotu la rona tenik baa Na'i Maromak. 14 Ita bele dadi soman ai ida ho Yesus Kristus, surak ita haloon baa Nia nohuun, hanesan baa oras ita foin fiar baa Nia.
15 Kmalar Lulik moos dale na'ak,
“Ohin loron ne'e, kalo emi rona Maromak Manfatin,
keta ulun fatuk, hanesan ema nia sia,
mak la'o baa-mai to'o tinan haat nulu iha rai fuik,
tan sakar Bei Musa.”c
16 Oras ne'e, ha'u atu kusu nune'e: Ema mak rona baa Bei Musa, hotu la'o nela nia, see sia? See tenik, kalo lahoos itakaan bei uluk sia mak Bei Musa du'uk foin nodi sai nosi rai Mesir. Tebes. 17 Ema mak nalo Maromak laran manas to'o tinan haat nulu nia, see sia? See tenik, kalo lahoos itakaan bei uluk sia. Sia moris kale'uk iha rai fuik, to'o sia mate, hotu hakoi iha nia. Tebes. 18 Ema mak kona hahibun nosi Na'i Maromak, to'o la bele tama baa rai nia atu nanawa kole namutuk no Nia, see sia? See tenik, kalo lahoos itakaan bei uluk sia. Tan sia la no'uk nanono baa Na'i Maromak.d 19 Malorek ti'an! Itakaan bei uluk sia la bele tama baa rai nia atu nanawa kole namutuk no Na'i Maromak, tan sia la fiar baa Nia.